Dream Car

古早味回歸 PORSCHE 911 Targa 4S

Ads by Google

從來潮流都係一個巨輪,不斷轉,但總有一日回到原點。 Porsche 911 Targa有 48年歷史,初代一出即以手動硬頂開篷、加上銀色 B柱 Roll-Over Bar爆紅!不過經 2代發展後,車廠自 1996年、編號 993開始轉為當時最潮嘅玻璃頂,從此銀色 B柱 Roll-Over Bar絕跡車壇。
2014年今日, Porsche再次為最新一代 911、編號 991配用銀色 B柱 Roll-Over Bar,並且用電摺硬頂,集復古與新潮於一身。

 

Porsche 911 Targa 4S Spec.
引擎: 3,800c.c.水平對向六汽缸
馬力: 400hp/7,400rpm
扭力: 44.9kgm/5,600rpm
傳動: 7前速雙離合器自動波、附+/-系統
懸掛:前支柱式、後多連桿
制動:前、後透氣碟
車身: 4,491× 1,852× 1,291( mm)
車重: 1,555kg
0-100km/h: 4.6秒
車價:$2,443,550起
查詢: Porsche Centre HK( 2926 2911)





巨形玻璃尾冚

Porsche為 911車系攪盡腦汁, 1個車系變出多個版本,其中 Targa可算係個異類,因為佢嘅重點唔在於馬力有幾勁、外表有幾惡,反而係 sell一種態度。 993之後嘅 Targa,車頂由一大片玻璃構成,推出之初當然極之爆,邊有跑車有咁大個透明車頂?而且採光度亦比以往高得多,令車廂空間感前所未有咁大,最重要係可以開住冷氣曬太陽。
不過今日連 7人車都有巨形天幕頂時, Targa已經冇新鮮感,所以今代 Targa玩復刻,重現銀色 B柱 Roll-Over Bar及將斜尾改為弧形玻璃罩,令初代形態重現之餘,其實亦喺硬頂同軟篷版之間,提供多一款電摺硬頂選擇。此外,硬頂部分亦跟足初代,由一塊過布料纖維製成,可以電動收埋入車尾,唔需要好似初代咁人手裝拆,方便及文明得多。不過約 18秒開閂過程就同開篷 911唔同,需要整個玻璃尾冚揭起,而且要停定車先可以進行。


銀色嘅 B柱 Roll-Over Bar極之搶眼,亦都係今代復刻最大特徵,其中側邊有好似鯊魚腮嘅坑紋最點題。 

993、 996同 997嘅 Targa玻璃車頂雖然可以縮入車內同尾玻璃重叠,達到開頂效果,但兩邊仍有支柱阻住晒。 

手動硬頂開篷

Porsche 911車系 1963年推出, 1966年已經有 Targa型號,歷史悠久。特點係喺 B柱設置橫跨車身嘅 Roll-Over Bar,後面配上極之立體嘅弧形尾擋風玻璃,前面就裝有可拆式硬頂,既可提高安全性,唔開篷時又有接近硬頂版嘅外觀美感。當年開發出嚟嘅賣點同今日興電摺硬頂一樣,既有開篷車嘅快感,又有硬頂車嘅舒適性。而且初代 911 Targa除硬頂可以拆開,連尾擋風玻璃都可以移除,開揚感更強!不過當然所有嘢都要手動,拆出嚟亦要搵地方擺啦!

Targa名稱有版權

其實 Targa車型並唔係 Porsche首創,事源係 60年代傳聞美國交通部因開篷車反車意外太多傷亡,計劃禁止開篷車入口,所以車廠就開始設計 B柱有 Roll-Over Bar嘅開篷車, 1961年 Triumph嘅 TR4已經有類似設計,甚至 1965年嘅 Toyota Sports 800都有。不過 1966年 Porsche推出時就用咗當時贏到開巷嘅 Targa Florio賽事個名,將呢種車型命名為 Targa,仲攞埋版權,所以其他車廠推出類似車型,都冇一部叫 Targa。

久違了的開揚

比較上幾代玻璃頂嘅 Targa,新一代雖然唔可以變成一個溫室車廂,但開頂後冇咗天幕框架,又係另一種久違嘅開揚感。在前座而言,同開篷版可謂完全冇分別,頭頂可以同清風來個全面接觸,而後座就比較辛苦,畢竟玻璃斜尾並唔可以好似初代咁拆走,頂頭在所難免,當成臨時位屈就一吓啦!
Targa車廂佈局同一般嘅 911 Carrera一樣,分別只在於波棍後有一按式開閂硬頂掣,而值得留意係測試車加咗唔少 option料,冷氣座位、 Sports Exhaust、 Sport Chrono Package等,其中冷氣座位絕對係不可或缺,事關香港天氣潮熱,再加上今次測試車係 4S版本,高速駕駛時難免令人緊張,冇冷氣座位隨時會汗流浹背。

 

 


5圓表板係 911車系一大特色,新一代已將轉數表右旁改為 LCD mon.,可顯示更多資訊。 

車廂整體佈局同其他 911車款大致相同,測試車就選用咗全黑真皮內籠配鋁合金裝飾。 

刺激腎上腺素

廠方似乎冇打算為 Targa推出尾驅版本,因為一推出就只有 Targa 4及 Targa 4S版。測試車 Targa 4S採用同 Carrera 4S一樣嘅 400匹、自然吸氣水平對向六汽缸引擎,早喺去年已領教過 Carrera 4S嘅威力,大致上都估到有幾堅,不過世事往往有驚喜。
筆者試車大部份時間都開頂,而且會開啟 Sports Exhaust系統及切換為 Sport Plus駕駛模式,發覺引擎、排氣喉聲冇過濾地傳入車內,比交響樂更好聽。而且引擎高轉表現出色,筆者好多時都催谷至超過 6,000rpm先轉波,聲音同力量倍增!興奮度一定高過硬頂嘅 Carrera 4S。閂篷頂後嘅 Targa 4S表現亦都出色,隔音水平介乎硬頂 Carrera 4S及軟篷 Cabriolet之間,如要再舒適一啲,關閉 Sports Exhaust系統,切換駕駛模式到 Normal,即時斯文晒。


3.8公升引擎藏於玻璃蓋之下,要開篷頂時先睇到,不過聲音就好明顯,開啟 Sports Exhaust系統後,引擎同排氣喉同時爆響! 

強烈建議為前座增設冷氣功能,烈日當空之下都可以坐得舒舒服服。 

 

 


換上靚靚銀色 B柱 Roll-Over Bar後,後座空間其實比 Carrera更細。 

前座有多方位調節,而且包承力豐富,一貫 Porsche高水準。 

波棍下方設有多個系統開關掣,包括有 SPORT及 SPORT PLUS行車模式切換、懸掛設定、 ESP系統、尾翼升降、 Sports Exhaust系統及停車自動熄匙。 

7速 PDK波箱都唔需要多介紹,表現極之出色,集「快、狠、準」於一身。 

配四驅有原因

或者有人會問為何 Targa只得四驅型號,而冇尾驅?其實以現時 Targa 4S為例,車重已比硬頂 Carrera 4S重 110kg,亦比開篷 4S Cabriolet重 40kg,而且沉重嘅玻璃斜尾都係壓喺尾轆上,對車身動態或多或少都有不良影響,所以配用可自動分佈輸出嘅四驅絕對有必要,令到行車更靈活及增加安全性。

接近對手唔多

市面上根本冇類似 Targa 4S嘅玻璃車尾設計,價格同性能相近嘅開篷跑車就有 Maserati GranCabrio MC及 Jaguar XKR-S。

 

意國代表
Maserati GranCabrio MC
意大利開篷跑車中同 Targa 4S價位接近嘅只有 Maserati GranCabrio,賣$2,388,000,採用 460匹 4.7公升 V8引擎,惟獨仍配備 6速自動波箱比較輸蝕。

 

英倫貴族
Jaguar XKR-S
XKR-S可以話係 Jaguar現時最堅開篷跑車,以 550匹 5.0公升 V8 supercharged引擎配 6速自動波箱,而且形象典雅高貴,性能超班,但只賣$2,468,000。


撰文:袁國基
攝影:葉偉豪

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()