新車激試

又要威又要 7座位  Nissan X-Trail

Ads by Google

對於想買車嘅家庭客,揸 SUV好似好潮好有性格,但買 7座 MPV又有心寧慰藉,是旦揀一款買完都係心思思想換車!其實,個世界一早就有 7座 SUV呢款「瀨尿牛丸」,不過以歐洲車居多,最平都要 50萬以上,唔係一般家庭願意負擔。好在全新第 3代 Nissan X-Trail化身成 7座 SUV, 30萬有找車價只係貴中型 7人車幾萬,有 wild嘅外形兼日本大牌信心保證,連 Stream車主試過都有讚冇彈!

自動尾門方便

初代 X-Trail誕生於 2001年,正係日本 RV喺香港低沉時期,當年嘅 Toyota RAV4同 Honda CR-V銷量都走下坡,所以 X-Trail喺香港未算好紅,反而喺日本及歐美就有唔錯成績, 2007年仲推出埋香港冇引入嘅第 2代。全新第 3代再次重臨香港市場,最大轉變一定係個外表,完全洗去上兩代嘅呆笨感覺,採用類似 Qashqai嘅車頭設計, V形電鍍鬼面罩極之搶眼,而且頭、尾燈全採用 LED設計,比 Xenon更高級、更耐用及慳電。
對比 Stream一類 7人車, X-Trail可以話係一個大隻佬,車身高達 1,710mm,而且全車裙邊都用黑色塑膠,越野味濃。問到 Stream車主 Brian覺得 X-Trail外表吸唔吸引:「新款好靚仔!望落去好有活力,而且我好欣賞佢電尾門有得自動開,我有時攞住成手貨,根本冇手開門,𠵱家只要用物件輕輕喺車牌位掃吓就自動開門,方便到暈。」


Brian最 like就係自動開啟尾門,只要用手或物件喺車牌位一掃,即可自動升起,而且可設定開啟高度,避免室內撞到天花。 

X-Trail車身高達 1,710mm,比 Stream之類中型 7人車有氣勢得多,而且離地距高一大截,上壆落斜易如反掌。 

X-Trail車長 4,640mm,但軸距只有 2,705mm,即代表車身比 Stream長 70mm,但軸距短 35mm。

日韓 7座 SUV

日系死敵  Mitsubishi Outlander
車價 30萬以下,仲要有 7個位嘅日本 SUV幾乎絕種,除 X-Trail外就只有 Outlander。採用 2.0公升、 150匹馬力引擎,都係用前驅設定,又係用 CVT波箱,不過就有+/-系統。車價$292,800

 

高質齊料 Hyundai Santa Fe
今代 Santa Fe有好大進步,除咗車內車外用料高質之外,更重要係夠晒大部,車身長達 4,690mm,而且配 2.4公升、 192匹馬力引擎,力水唔差,就算載滿 7人都有唔錯加速表現。車價$358,000

 

抵食大件 Kia Sorento
Sorento係 Kia嘅頂級 SUV,其實同 Hyundai Santa Fe共用底盤、引擎及波箱,駕駛感有 8成相似,但用料就明顯有所不及。 Sorento主打平價市場,就算全齊料車價都唔過 30萬。車價$299,000

巨天窗最吸引

7人車其實都已經力求做到好舒適、好優閒咁,但始終少咗 Wild外表,而 X-Trail唔單只有姿勢,車廂亦都有實際。最吸引到 Brian注意一定係巨形玻璃天窗。「好似我部車個天窗其實作用唔大,好似 X-Trail呢個咁嘅天幕就正嘞!前、後座都受惠,而且令空間大啲。」講到空間, X-Trail其實同 Qashqai共用底盤,軸距自然一樣,所以可以預料得到後排唔會大得去邊。「我有 6呎高,坐入 X-Trail後排當然比 Stream更辛苦,不過我又唔係太在意,因為我部車後座至今用唔夠 5次,多數都係摺埋佢載嘢,座位只係臨時用, X-Trail有中排冷氣可以令後排都受惠,已經唔錯嘞。」
X-Trail有一樣設備係 Brian留意唔到,但好得筆者歡心,就係波棍後嘅杯架內藏出風口,可吹出冷氣或暖風,冇一款 7人車有呢個設備,窩心!


巨形天窗覆蓋面積極大,對角長度達 47吋!而且可以開啟前半截, Brian話呢個天窗夠晒正,後座乘客一定冧。 

駕駛艙佈局同 Qashqai有 9成相似,係少咗中控台 mon.,電子泊車手掣及+/-波操作。 

 

 


杯架內有出風口,可以隨冷氣系統吹出風,開冷氣就有凍飲,開暖氣就有熱飲囉! 

尾箱空間因座位佈局而有所增減, 7座位時有 135L; 5座位時有 445L;而 2座位時就有 1,982L,靈活性極高。 

引擎新增可變吸氣及排氣時間系統,令燃油有更好效益,慳油又好力。

Advanced Xtronic CVT波箱來自 Qashqai,不過就少咗+/-系模式,少咗啲玩味。 

表板內可設定 Chassis Control系統內嘅功能,切合唔同人嘅駕駛風格。 

 

Nissan X-Trail Spec.
引擎: 1,997c.c.直 4
馬力: 144ps/6,000rpm
扭力: 20.4kgm/4,400rpm
傳動:無段變速自動
懸掛:前麥花臣支柱、後多連桿
制動:前透氣碟、後實心碟
車身: 4,640× 1,820× 1,710(mm)
耗油: 13.7km/L
車價:$299,800
查詢: Honest Motors Ltd.( 2803 5333)



Brian表示 X-Trail唔算好好力,不過行車寧靜而且睇位容易,估唔到咁易揸。 

X-Trail

筆者坐入後排之前必先要中排乘客移到較前位置,但腳部空間仍然剛剛好,講唔上舒適。



中排如移到最後,腳部空間長度達 660mm,同中型房車接近。 

前座雖然只用絲絨料,但暗花好靚,而且質素高,筆者鍾意絲絨多過真皮。

Stream

Stream後排座墊較高,所以雙腳位置更自然,而且膝部唔會頂到中排。

車身側都易揸


高速入彎會有一定傾側,但多得內置 Active Trace Control系統,令行車保持穩定。 

SUV係就係高頭大馬好有型,不過型係要負出代價,因為 SUV大多數配四驅系統,耗油量一定比前驅多,但有幾多人真正需要用到四驅?郊野公園啲路靚到拉利都行到,如果只係為間中郊遊一下而硬食四驅,實在唔抵!有見及此,代理聰明地只引入前驅版 X-Trail,再配合新引擎及 CVT波箱,令耗油量低至 13.7km/L,即係約$1.2/km,同一般 7人車相若。 X-Trail引擎同波箱都嚟自 Qashqai, 1,997c.c.引擎輸出 144匹馬力,數值上唔錯。「我覺得 X-Trail都係比較重,加速有力但唔算快,比較驚喜係高車身喺轉彎時雖然有明顯傾側,但前輪驅動都冇乜推頭情況出現,係就係冇 Stream咁好飛,但揸得呢啲車就唔好預飛,輕鬆咁 hea揸先享受到佢嘅好處。」


撰文:袁國基
攝影:葉偉豪

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()