漫遊毒物

Bigger than BIGGER  KAWS Clean Slate七米巨人

Ads by Google

iPhone 6你揀買大定更大?學先達 Lo哥話齋: Why not Both?
好似海港城新起嗰隻巨型 KAWS Companion雕像, 7米高交叉眼公仔都一樣抱住兩隻 3米「迷你版」囝囝,大同更大一次過睇晒!
其實,新展覽叫 Clean Slate,即落堂刷黑板咁解, KAWS話要放下過去、再次出發呀!咁呢兩隻 3米囝囝係咪唔要拎去掉?我勉為其難幫你收養吖!

室外最高交叉眼

其實 2010年 KAWS已經應海港城及策展商 AllRightsReserved邀請來港,展出第一隻巨型雕像 Passing Through,後來更在世界各地展出。 4年後呢隻 figure比上次更大,動作同結構都好複雜, KAWS睇完完成品牌非常滿意手工。問 KAWS將來會唔會搞更巨型 figure,佢表示 2013年幫 MTV Awards重新設計過 moonman獎盃上隻太空人,頒獎禮入面隻巨型 moonman足足 10米高,但今次呢隻係佢最巨型嘅室外展品。

 

 


千嬅都有去陪 KAWS剪綵,如果大會搞多件千嬅× KAWS交叉眼 tee就正啦! 

海鷗到賀, 8號風球期間海港城班技師仲要冒風雨裝嵌,辛苦晒。 

KAWS:「我唔再畫交叉眼?大家諗多咗啦!」

上海港城個畫廊睇睇,原來 KAWS今次拎咗 90年代至今 20張不同時期作品來港,由早期在 CK廣告上塗鴉,以至最新作品「 Presenting The Past」,當中有非賣品、有部份亦有定價出售。
再聽到 KAWS話要放低過去,加上去年佢結束同 MEDICOM合作多年的品牌 Original Fake,令 fans非常擔心佢真係好似隻 7米 Companion咁,掉晒批交叉眼公仔! KAWS就話其實每次做完一個 project,都係抱住 Clean Slate呢份心情,整理好頭腦再搞下一單,但佢絕冇諗過要放棄自己任何一個時期嘅風格,仲笑言大家諗多咗。

 


UntitledKAWS在紐約最出名就係半夜偷偷出動,將巴士站上的 CK廣告海報改頭換面,引起全城熱話!呢張就係同期作品,在模特兒人樣上再搞花臣,以半透明色印上骷髏頭。( 1999年作品/非賣品) 

FACE:今次來港有乜私人活動?
KAWS:我喺香港好多老友,當然想見見面、一齊飲飲食食吹水。
FACE: NIGO最近都清晒啲舊收藏話要再上路,你係咪都想走入人生下一個階段?
KAWS: NIGO係我好朋友,我都知佢搞拍賣,當中仲有我整嘅 figure,我唔會去估佢點諗,但係話我搞展覽係想清算人生某個階段未免太誇,我完全冇呢個意思。
FACE:但係你舊年仲結束咗同 MEDICOM合辦嘅 Original Fake品牌呀!
KAWS:只係 O.F.呢個 project完成咗歷史任務,我同 Medicom仍然有好好嘅關係,將來一定會再合作。(作為玩具迷的筆者表示開心!)
FACE:咁未來仲想去邊個國家搞展覽?
KAWS:我未去過韓國同意大利,有少少興趣!尤其係韓國,我曾去過日本、香港、中國,但就未體會過呢個亞洲國家嘅文化。

 

Untitled
(Calvin Klein)
經典「精蟲」捲名模系列,呢張 CK海報 KAWS話已經得番 1張,只係想畀大家睇睇真品,係唔賣㗎!( 1999年作品/非賣品)

 

Running Chum#1/2/3
3張為一套,係 KAWS相當經典的米芝蓮人畫作,已經好難搵。( 2000年作品/$200,000三張)



 

Companion
早期版本的 Companion,當時手幼腳幼更加似某隻老鼠形角色, KAWS話呢張作品已經所餘無幾。( 2001年作品/粉紅、灰各$85,000)

 

Kate Moss, White Gloves
在名模 Kate Moss的廣告海報上再加上半透明的白手套、骷髏頭交叉眼,所有 KAWS成名元素集一身。( 2001年作品/$135,000)

 

Ups and Downs
10張為一套的大 project,睇落會聯想到海棉寶寶吞緊自己對大眼睛,可愛鮮艷中帶點血腥。( 2013年作品群/全套 10張$445,000)

全新作品

Presenting The Past
主角輪廓隱約跟某隻卡通貓類似,貓貓更將炸彈當保齡球咁掉,將建築物同某隻四隻手指的卡通人物「打散」,成張畫都刻意唔畫任何 KAWS標籤性「交叉眼」或「骷髏骨」,可見其突破。( 2014年作品/$41,000)

 

有 Tee買
9月 29日,仲有呢件 tee賣,其中$100捐作公益金作慈善用途。$580(灰白兩色/Free size/約為男裝 L碼)

KAWS: Clean Slate.刷新展

日期: 9月 18日至 10月 19日免費參觀
地點:尖沙嘴海港城露天廣場及美術館
時間:美術館開放時間為 11am至 10pm( 207號舖)


撰文及部份攝影:鍾世傑
攝影:羅巧怡

tvb4life 發表在 痞客邦 留言(0) 人氣()