今日好玩嘢

多啦 A夢 x海洋公園 萬聖節魔法歷險

Ads by Google

《多啦 A夢》每年都有一部大長篇電影版,帶你進入不一樣的冒險國度,今年萬聖節多啦 A夢、大雄跟成班朋友仔仲會玩轉海洋公園哈囉喂,破天荒將原先嘅「威威天地」搖身一變成全亞洲首個大型多啦 A夢主題萬聖節王國,等鍾意多啦 A夢嘅 Ladies and Gentelman,細紋仔大人,一齊過番次充滿童年味道嘅開心萬聖節!

 

成個場地都有1: 1真人比例萬聖節新多啦 A夢、大雄、靜香公仔,超可愛!大雄排牙咁尖,唔怕畀科學怪人胖虎蝦啦!


多啦 A夢法寶屋

由細到大睇都超想去大雄間房玩玩,玩下佢啲法寶,走入時光機書檯影相打咭,今次終於有機會喇!


多啦 A夢咁多樣法寶入面,你最想要邊樣呢? 

時光機,求你帶我回到過去抽多幾次 iphone 6吖! 

識得瞓一定係同多啦 A夢一齊瞓衣櫃!

小夫平時牙擦擦,今日竟然笑笑口打開度隨意門俾我?有咩居心呀你?!原來裝咗鏡頭偷影我!想合照點解唔開聲呢? 

「 Trick or Treat!」點解真人大雄會同 model一齊伸手呃糖食嘅?原來園區內會有「真人版」角色出沒,四圍行陣就可能會撞到! 

 

多啦 A夢哈囉喂派對
地點:海濱樂園威威天地
開放時間: 11am~11pm

H14瘋人院 入夜轉 mood逼到你痴線

入黑啦,送走晒班細蚊仔&老人家,可以正式玩到癲!今年海洋公園呢個 H14瘋人院絕對係突破驚嚇極限之作,唔係單純有鬼彈出嚟嚇你咁流,而係要將人心底最深層嘅恐懼逐一勾起。頂得順嘅話,你嘅恐懼就可以醫好;頂唔順嘅話就,哈哈哈哈!聽到覺得正斗呀,唔怪得首 3輪網上預約一下子就爆哂棚喇!

防菌戰衣

一開始竟然要求穿上保護衣先可以入去玩,可想而知入面有幾咁兇險!嘩!使唔使呀!真係想同你講聲加油!

驚曱甴?

話明突破驚嚇極限之作,點會淨係同你玩假嘢呀? Cherry開頭好淡定咁成個人瞓落去,點知仔細一望隻隻小強都識行識走,真係即刻嚇到彈起!雖然有片膠板隔住,但彈得咁大力,小心踩爛咗走晒出嚟!

驚虫虫?

H14內會不斷有魔間院長𥄫實你,會根據你入場前填寫問卷,安排最能令你嚇到瀨尿嘅房間,同埋做唔同 task去挑戰你極限。 Cherry最驚蟲(其他選擇仲有血、便便等等),院長竟然要佢喺一堆蟲入面搵鎖匙開門!啲蟲仔又肥又白仲識躝上你隻手!隨之而來當然又係一輪嗌到深圳都聽到嘅尖叫聲!

驚公廁?

人有三急,仲要撞著個極度 dirty嘅公廁,有時真係恐怖過撞鬼,點知呢間房唔止污糟,仲真係有鬼!見到個咁鍾意玩 Condom嘅痴線女人都唔緊要喇,最難頂係要你喺個鬼咁濕笠笠嘅廁所入面爬地下,真係 Oh! My! God!

驚痴漢!

話明係瘋人院,當然會有其他院友,佢哋仲會隨時隨「地」,喺地下彈出嚟捉住你唔俾你走㗎!

Final Test要殺人?

幾經辛苦終於都嚟到最後一間房,最後一個 task就係要你電死樓上個重犯!只要電死佢。呢一刻,就係考驗人性嘅時候喇!

 

地點:高峰樂園動感天地
開放時間: 11am~11pm
註: H14乃限制級鬼屋,只限 16歲或以上及能接受極度驚嚇人士參與。 H14將於指定日子接受網上預約登記,每日只開放 1,000個預約名額,詳請將於網上公布。

拍 MV拍 MV

「星魅製片廠」,會有專業團隊幫你拍一齣恐怖科幻片。呢個場入黑時會變成「奧屍卡製片廠」,場內伸手不見五指,得返一支螢光棒照明,妖魔鬼怪仲會隨時嚇你一驚,你個驚到瀨屎嘅樣仲會被拍片公諸於世!


 

地點:海濱樂園廣場
開放時間: 11am~5pm; 5pm~11pm
註:遊人可以租用自拍鏡頭進入屋內錄影,將驚嚇實錄帶回家重溫。體驗價為港幣$100。

東瀛魔界遊

呢個充滿日本江戶時代味道嘅庭園,有龜背河童喺池塘等你,行到入屋仲有長頸女鬼、傘妖、單眼小僧呢啲可愛鬼怪隨時送上驚喜,記得擺個最可愛嘅鬼臉同佢哋合照喇!

 

地點:高峰樂園怡庭
開放時間: 1pm~11pm

 

海洋公園哈囉喂全日祭
日期: 10月 2~5、 10~12、 17~19、 23~26、 30~31
時間:哈囉喂景點各有特定開放時間;海洋公園開放時間: 10am~11pm
票價:成人港幣$320、小童( 3~11歲)港幣 160
其他詳請可參閱網址 http://halloween.oceanpark.com.hk 或致電( 852) 39232323


撰文:陳可兒
攝影:彭自維
Model: Cherry@Unique Model

全站熱搜

tvb4life 發表在 痞客邦 留言(0) 人氣()