iPhone 6 Plussize: 158.1× 77.1× 7.1mmiPhone 6size: 138.1× 67× 6.9mm 

電訊型科

一手揸唔哂! iPhone 6/6+齊現真身!

Ads by Google

香港人口裡說不、身體誠實,次次 iPhone有新機都例必唱衰,過時科技、冇創意、品牌效應,講到細路仔都識背,偏偏冇人解釋到點解只有 iPhone
可以令全世界人人搶:只計香港, 12號預購當日 Apple Store
即時全線被攻陷,數日後香港 iReserve功能首次開放,唔夠 2分鐘亦告全滅,有如都市傳奇!
成日話 iPhone 6 Plus巨芒好大部,但實際上到底有幾大?睇呢張真實比例圖,一清二楚!

 

受惠 6 Plus成部大咗,如果你用土豪金,聽電話時會十足放舊金磚响塊面度。浮誇定潮流?答案都係睇你個樣。至於用後感, model話單手轉珠有難度、自拍都好難篤,似乎女生出機自用前真係要考慮一下揀邊個尺寸。

一日玩唔哂!史上最強 iOS 8

講親 iPhone都係炒,何必令自己個世界咁細,不如用心睇睇今次 iOS 8有乜玩唔哂嘅新功能! iOS 8稱為史上最重大的 iOS更新,加入數以百計新功能,其中幾個重點值得一講,而且就算你用 5s或 5c一樣有份升,如記者部 5s升級後用到相機新功能,亦冇窒冇 bug,係精神嘅!

家人共享 多謝老細


除咗 App Store,其實「家人」仲可以 share日曆、個人位置等項目,偷食男女有難。 

以往用一個 Apple ID就可於多部 iDevice中互通,本來已夠厚道,但 iOS 8更癲,皆因今次可與最多 6位家庭成員齊齊共享 iTunes、 iBooks和 App Store的購買項目。以自己個 Apple ID再邀請其他帳戶成為「家人」後就可齊齊受惠,最多 6位,留意係唔使齊齊用同一 Apple ID,絕對屈機!

相機功能 接近完美


除咗相機功能更強,後製亦更多玩法,如可做水平扭曲、色彩效果等,慢慢試啦。 

iPhone相機 app向來都冇太多功能,來到 iOS 8加入對焦後再調整曝光數值及 Time-Lapse縮時攝影模式、自拍 timer等等,無須再靠其他 app。值得一提, iPhone 6或 6 Plus由於鏡頭更強,可以做到 fps240的超高速影片拍攝,想知效果?留意《 FACE》今期有片睇。

身體健康 要襯 Apple Watch

iOS 8已預載新 app「健康( Health)」,睇名都估到功能,用家只要輸入個人資料就可分析並整合出身體數據,如心跳率、卡路里消耗量、血糖及膽固醇等,亦可製作醫療卡描述自己的問題,並設定 iPhone可在緊急情況下予第三者開啟。明顯地,要玩盡呢個 app要配合明年先出嘅 Apple Watch一齊用。


網上已有一堆「如果 Apple Watch由名牌設計」的自製概念圖,要 Smart watch流行,似乎都係靠 Apple。 

想渣 iPhone 6,問過我未?(設計對白) 

搶機咪信機械人  iReserve最穩陣

以往炒家最愛用 BOT機械人程式搶機,但呢個方法今次已經唔 work,最後都係要用返 Apple Store俗稱「 iReserve」嘅預約功能,預約後再等 Apple通知你幾時去 Apple Retail Store拎機。用 iReserve只需有 Apple ID、香港身分證、手機用作接收及傳送 SMS預訂代碼即可。當中竅門講求一個「快」字,寬頻速度、電訊商收發 SMS速度、輸入速度全部都係關鍵,由於 iReserve系統設於外國,故請留意自己所用寬頻供應商的海外頻寬是否高速。江湖傳聞,目前最信得過的,有可能是一部 Macbook加 Apple Retail Store的 Wi-Fi,但朝早 8點邊個可以連到蘋果店個 WiFi?
https://reserve.cdn-apple.com/HK/zh_HK/reserve/iPhone/availability 


轉為「預約抽獎」機制後香港已冇首賣人龍, 19號朝早 8點都只係咁。仲會通宵排隊搏 walk-in嘅,應該得返好少出銅鑼灣嘅 MK肥龍同唔係幾識中文嘅南亞幫。 

其實要揸 iPhone都唔係唔得, Apple Retail Store全部 iPhone都係任揸,買唔到都過吓手癮。 

iP6 Plus收萬八 一部炒唔哂

就算 iPhone 6幾強、 iOS 8幾勁,無可否認,所有人都好可能仲要面對幾個月先會停嘅炒風,自用難、想入貨發達更難,最具標誌性嘅旺角先達廣場,首賣當日未夠 11點已經戰雲密佈,買賣人潮一直湧去對面街百老匯,想買機、賣機定純粹路過食花生,一樣家家有求。 6/6 Plus兩部 iPhone同樣轉手即賺,一部的確炒唔晒,想知今次最貴炒到幾錢?可以炒幾耐?長揸定短線?邊部最好炒?都係等先達 Lo哥親自醒你兩句啦!

即日轉手 一機賺一萬

iPhone炒價向來海鮮,以首賣當日為例,下午三點回收價, iPhone 6 plus 16GB土豪金已去到$14,500, iPhone 6 16GB土豪金亦有$8,500,簡單計,即係轉手已賺一倍,最貴回收價仍然係最高規格嘅 6 plus 128GB,朝早市況吹到過 2萬,最終回落至$18,500亦賺過萬,如此吸引,又確實好難怪人人炒機。對未來炒價, Lo哥雖唔敢拍心口,但都尚有信心,不過始終交易買賣都有風險,閣下自理啦!


Lo哥出名到本地各大傳媒都識搵佢,現場記者近二十,唔知以為劉華嚟咗! 

當日淨係 G-World一間,排隊龍尾都已排到扶手電梯位置,連問價都要排隊,可見市況十分活躍。 

先達以外, Apple Retail Store門口都係收機熱點,如唔想煩,門口啱價已可即收現金走。 

南亞裔朋友都有加入收機行列,淨係希慎 Apple Retail Store門口最少有十堆人做緊一樣嘅嘢。 

想自用 上台最快

iReserve冇你份,又唔想食炒價買 iPhone 6,都係上台出機最快最隱陣。 3HK中環店開賣當日亦搞足一日活動,下午就請一班名人明星撐場,係例牌咗少少,但有星睇吓都 OK啦!


各大電訊商都有上台出機計劃,果粉及潮人唔想炒機只想自用,其實唔駛太擔心。 

截稿前朋友收到電訊商短訊,話如肯轉型號可一星期有機,咪即係間接話你知 6 Plus較渴市? 

撰文:熊俊彥
攝影:彭自維、陳嘉元

tvb4life 發表在 痞客邦 留言(0) 人氣()