Geek友講場

電玩新趨勢  TOKYO GAME SHOW 2014

Ads by Google

9月尾聲,香港還是烈日當空,但東京己開始入秋,溫度下降但熱情不滅,皆因踏入年尾、新年將是新一輪遊戲、動漫熱潮之始。一年一度在幕張舉行的東京遊戲展( TOKYO GAME SHOW)剛完結,《 FACE》直擊揭示電玩新趨勢。再加記者親身走訪東京街頭,發掘宅宅新潮流,去過至知比卡超遇上勁敵妖怪貓,原來運動美男精品好賣過萌萌女角,睇完包你變潮宅。

日 game非主角  TGS兩大焦點

一走入會場,會發覺今年東京遊戲展跟過往不同,不再是日系遊戲天下,一方面公布大量歐美遊戲新消息,另一方面 Sony更出招搶攻亞洲區市場。單係這兩點已睇到來年電玩趨勢。

VR眼鏡大激鬥

韓國在 IT界同日本正面交鋒,估唔到 Samsung今年更同虛擬實境( VR)技術公司 Oculus合作推出 Gear VR踩入東京遊戲展,力挑 Sony嘅 Project Morpheus!試玩覺得 Morpheus遊戲互動感較高,娘娘杜小喬試玩潛水遊戲《 DEEP》好似真係遇溺咁尖叫求救,可惜虛擬追女 game《 Summer Lesson》臨時抽起冇參展。而插三星 GALAXY Note玩嘅 Gear VR軟件就略嫌簡單,可見 VR能否成功軟件可玩性最重要!


Gear VR需要插 Note玩, VR要隨街玩其實好大限制,以手機作輸出媒介似乎仍未適合。推出日期: 2014年內售價:未定 

小喬大讚 Morpheus超逼真,仲話好似真係見到鯊魚咁驚,見住佢玩到又嗌又轉,真心信娘娘又 pure又 true。推出日期: 2015年售價:未定 

Oculus自家製的 Rift,主要駁電腦用,受到歐美用家大好評,目前是開發者版本。推出日期: 2015年售價: 350美元(開發者版本)

Sony全力漢化

開幕前 Sony於亞洲區發布多款中文化遊戲,對香港玩家嚟講可能好震撼!大人氣嘅《人中之龍 Zero》亦首次中文化,唔使再靠書仔睇劇情。其中部分作品如《 Biohazard Revelation 2》同《 The Evit Within》乃跨平台遊戲,當中後者已講實是 PS4版獨家中文化,對香港玩家選擇版本實有影響。







重回新主機 谷底待反彈

兩大焦點都冇講 game,望真啲今年 TGS缺乏全新 title公布,不得不承認日本遊戲市場萎縮,猛料早前已喺美國 E3講晒,令 TGS定位尷尬!話雖如此,但現場都睇到唔少日廠不再龜縮手機或手提機,力谷 PS4等新主機作品,加上歐美遊戲漸受日本玩家重視,相信有助日廠作新嘗試,日本遊戲業喺不久將來唔難復甦歸來。

Sony暗黑侵攻

Sony將《 The Order 1886》同《 Bloodborne》兩款遊戲作左右門神,前者為《 God of War》班底嘅第三身槍 game、後者出自難度高、死不停嘅《 Demon’ s Soul》開發團隊,兩款都走暗黑血腥路線,同日系遊戲大不同。除大作外, Sony都好肯支持下載形式發售的小型遊戲,香港老機迷唔會陌生嘅《三國戰紀》意想不到喺 TGS展出 PS4新作。不出續作出新作、支持小型廠, Sony在遊戲界廠商中算勇氣可嘉。


《 Bloodborne》唔用盾,改玩左手拎槍右手近戰,唔可以再舉盾等反擊,戰鬥比《 Damon’ s Soul》更緊張。PS4/SCE/ARPG/15年 2月 5日 

DQ無雙《 Dragon Quest Heroes》限定版人人讚靚,液體史萊姆係 USB防塵蓋,可拆下,未有日期售價,但鐵定會有亞洲版。 

PSV粉紅色會同日本一樣於 11月 13日推出。

Sega龍如壓陣


前排右至左為大槻響、有村千佳、紗倉真菜、上原亞衣;後排初美沙希、佐藤�ヾ B友田彩也香、白石茉莉奈、朝倉琴美,記者真係大飽眼福。 

《人中之龍 Zero》未有試玩,但卻是場中焦點,皆因 10名早前於網站投票、會於遊戲出現的人氣 AV女優到場造勢,甚有山雨欲來風滿樓,大作推出之感!今集叫得 Zero梗係前傳,故事為 1988年嘅日本,當時主角桐生一馬仲係一個周圍辣火頭欠人周身債嘅小混混,性格會同過往嘅仁義老江湖大為不同。搵錢係今集重點,會開夜總會、搞地產賺大錢,重溫泡沫經濟紙醉金迷嘅日本 80年代。

Capcom人氣續作


《 Monster Hunter 4G》試玩區內不得拍照,影唔到新機,但實試過右桿靈敏度不錯。3DS/Capcom/ACT/14年 10月 11日

Capcom一向係排隊試玩反應最熱烈廠商之一,今年《 Monster Hunter 4G》及《 Biohazard Revelations 2》兩條隊王,前者留守 3DS,後者係 Bio首戰新家用機。排隊實試《 MH4G》,用上 11月先出嘅 3DS新機,新加右控桿雖然細粒,但玩落順手,可惜唔夠時間試打隊友上天等新動作。《 BR2》兩位女主角可隨時切換,今集會有 4個章節分 4個星期更新,吊癮得嚟又幾新穎,唔通係學韓劇睇反應 update?

Microsoft日系潛行


XBox展區以《 Call of Duty Advanced Warfare》及 2K重頭力作《 EVOLVE》主打,但兩款都是跨平台遊戲。 

XBox One日本首賣日雖被網友影到好多雪糕筒但無人排隊,不過 Microsoft於 TGS也有驚喜。會場以《 Call of Duty》新作主打,原來更有唔少日本製作遊戲暗自推出。用 Kinect玩嘅查案遊戲《 D4: Dark Dreams Don't Die》已於 9月 19日出售。神級製作人神谷英樹主理嘅《 Scale Bound》亦於會場提供試玩,可見 Microsoft仍未放棄日本市場。

《 Bloodborne》製作人-山際真晃

《 Demon’ s Soul》同《 Dark Soul》系列大受歡迎,製作組卻在 PS4挑戰全新作品,製作人山際先生就咁講:「續集作品好易愈做愈窄,既然係為 PS4呢部新主機開發遊戲,好自然會想去做一款全新作品。不過我保證新作會保持以往《 Soul》系列嘅戰鬥、育成自由度。」

在日留學生-茲

日本留學生阿茲因工作關係,嚟到 TGS覺得今次廠商沉實應戰。「係冇乜驚喜,不過就睇得出廠商肯發展家用機,冇以前咁多手機遊戲。例如我好鍾意嘅格鬥遊戲《 Guilty Gear》終於有新作喺 PS3同 PS4推出。」

5大宅系新指標

去完幕張打機,出返東京市區走一轉,驚覺 ACG界( ACG指 Animate動畫、 Comic漫畫、 Game遊戲)多咗勁多新 icon,《妖怪 Wacth》、船梨精、復古版仙魔大戰,仲有估唔到連漫畫男角都走賣肉路線。宅文化變化之快不比任何潮流資訊遜色,一齊追貼以下 5大嚴選宅系新指標。

1.乙女大愛 運動系美型男

這世上,有宅男,亦有宅女,女性向動漫畫一向都有,但最近女讀者最愛看的不是戀愛題材,而是運動美型男。剛完結漫畫連載嘅《黑子的籃球》就是佼佼者,而《排球少年》及男主角們愛穿泳褲四圍走的《 Free!》都能在市區找到專賣精品店。呢類新興女性向運動漫畫角色比較美形,但仍注重友情同熱血,可見女讀者對男子間嘅友情甚為欣賞,或者帶點妄想!



澀谷 Parco的《排球少年》精品店,很多商品都已經完售。 

池袋向來是乙女(日文解少女,這裡指女動漫迷)集中地,位於 JR站旁的 Pacro就有多間乙女向精品店,其中新開嘅 B Point專賣《 Free》精品。 

於池袋 Sunshine City的 Tokyo Jump World,《黑子》、《排球少年》都有長駐展區,其他展區則是《龍珠》、《 One Piece》、《火影忍者》 3大神作。 

2.比卡超天敵 妖怪 Watch

傳說 Level5這間遊戲廠想開發足以挑戰《 Pokemon》的作品,因為比卡超樣子似老鼠,所以就想到以貓作主角的地縛貓推出遊戲《妖怪 Watch》。目前《妖怪 Watch》已是遊戲、玩具、動畫、漫畫四方大熱的話題作,其中妖怪金幣更是日本小學生時下最熱衷玩意。說能勝過《 Pokemon》還言之尚早,但已是掀起社會現象的大熱作。



妖怪金幣除咗用嚟儲,仲對應用 3DS遊戲及商店內嘅遊戲機,呢部位於新宿 Yodobashi嘅機,夜晚都有幾個大人排隊玩,因為有機會抽到珍貴金幣,唔排除係炒賣之用。 

整個位置都是賣《妖怪 Watch》的玩具。

3.最癲吉祥物 船梨精

日本各地都有吉祥物,例如熊本熊就好多人識。不過講到人氣最勁一定係千葉縣船橋市非官方吉祥物船梨精。有別於其他動作慢吞吞嘅吉祥物,船梨精經常快速擺動雙手,彈跳力更十分驚人,喺多個現場演出都留下話題。澀谷近期就有餐廳與船梨精合作化身 Funa Cafe,記者親身觀察,星期三閒日 11點開店前 1小時已大排長龍,預計等候時間需要兩小時!


位於澀谷 Parco Part1七樓的「 THE GUEST cafe& diner」,船梨 CAFE開到 9月 30日,這店經常會和卡通角色合作,之前是 My Melody。 

4.日本掃貨抵 四驅車回歸

日本同香港最近都興返玩迷你四驅車。 10月會有《四驅兄弟》新漫畫,講星馬豪 20年後長大成人嘅故事,預計到時會更多人玩。四驅車盒車、零件喺香港已水漲船高,唔只貴,仲難搵。去到日本,旅遊旺區比較難搵模型鋪,但新宿 JR東口附近嘅 Yodobashi絕對係寶庫,零件齊全,加上日圓夠平,喺深水埗賣成嚿水嘅導輪,日本只係賣 700幾 yen(約 50港幣),計落平一半,車迷必掃!



零件超齊全,售價更低出不少。不過賣田宮模型車的地方不多,即使是中野、秋葉原也少見。 

車款唔多,但售價比較便宜,正常款 780日圓(約 56港幣),比起香港賣$80多元又平了一截。 

8月時出過高清版《四驅兄弟》 Blu-ray,但喺日本都搵唔到! 

5.經典復刻 仙魔大戰

之前《仙魔大戰》同 PAD合作抽蛋,唔少人都唔敢講自己細個食朱古力餅抽《仙魔大戰》貼紙,驚暴露年齡!唔使驚啦,今年《仙魔》 30周年,喺日本好多復刻活動,有原畫集、新版貼紙。去玩具聖地中野 Broadway走一轉,發覺舊版仙魔大戰咭十分保值。一張珍貴貼紙可以賣數萬至十多萬日圓,大多係錯體版或是原廠印出未經裁剪版,而普通貼紙多數只值幾百 yen,如果大家床下底仲有不妨拎去日本碰碰運氣。


LOTTERIA Cafe正做緊《仙魔》合作,復刻新版貼紙唔難搵。 

貴嘅一張可賣過 15萬日圓(約 10,700港幣),不過多數是特別版。 

中野 Broadway入面多層都有著名二手店 MANDERKE,其中咭店有很齊全的《仙魔》舊咭。

撰文、攝影:司徒港燊

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()