《 HIM》(她消失以後)及《 HER》(離開他以後),講占士及謝茜嘉扮演的新婚夫婦,經歷喪子之痛後又要面對分離,然後從男女雙方角度看分離一事。 

西面

絕世好橋 記得他是她

Ads by Google

一套戲吸唔吸引,除咗睇卡士夠唔夠照,亦都要睇吓有冇新元素,如果玩到新橋,相信套戲已經成功咗一半。
荷里活新紮導演尼迪賓遜( Ned Benson),處男作竟然開創先河玩一雞兩味,將一個愛情故事《 The Disappearance of Eleanor Rigby》拍成 2部同期上影的電影《 HIM》(她消失以後)及《 HER》(離開他以後),特點係兩套戲分別以男女角度拍攝,解構一段愛情男性及女性截然不同的想法。呢條一雞兩味橋觀眾受唔受仍未知,但單係講創意,已值得畀 10個 like。

 

《 HIM》(她消失以後)
上映日期: 10月 2日


謝茜嘉嗌分開後,占士一時激動,衝出馬路,更被一部的士撞暈。 

謝茜嘉分手玩失蹤,搞到占士垂頭喪氣,經常打電話問親友謝茜嘉下落,又自責未有幫老婆擺脫困苦,拍緊拖嘅男人通常都唔會好緊張女友,但失去咗就真係返唔到轉頭,果然中晒男人心聲。 

 

《 HER》(離開他以後)
上映日期: 10月 2日


《 HER》係以女性角度拍攝,戲中同一場撞的士戲,謝茜嘉的記憶中,占士係着住西裝褸撞的士,但占士的記憶中就冇着西裝褸。證明所有女人都對西裝男情有獨鍾。 

喪兒後謝茜嘉極度痛苦,不惜逃返娘家避開老公,努力忘記過去,仲重返校園過新生活。分開後,女人一定比男人積極,又中女人心聲喎! 

1.點解會將 1個愛情故事拍成 2套電影呢?


今年 5月,導演尼迪賓遜(右二)帶住男主角占士麥艾禾(右一)同女主角謝茜嘉西婷(右三)踩入康城影展舉行首映谷宣傳。 

拍開短片的導演尼迪賓遜,因希望自己執導的首部長片可以打破傳統,於是便想出絕世好橋,將一個故事用兩個角度拍成兩套電影的構思。同時因愛情片比較容易處理,於是便向愛情故事方面埋手,最後度出 1個講述一對男女分手後各走極端態度的故事,展現出男女對同一事件有不同看法和記憶。

2.雖然條橋好創新,但拍攝有冇難度呀?


由於 1個場面要以多個角度拍攝,而演員亦要配合,同 1個鏡頭要重複演出多次,所以占士同謝茜嘉試過 1日之內連拍 15粒鐘冇休息。 

當然有,導演尼迪賓遜就話拍 1套戲已經有好多挑戰要面對,而拍兩套有關連的電影,挑戰多出兩倍,要將兩個故事的連貫位拍到冇反駁已經好難。拍攝期間,要拍兩個主角謝茜嘉西婷同占士麥艾禾同時出現的場面時,除要用多部攝影機以多角度攝影,而且演員又要重複演出同一場戲多次,然後揀邊個 take放於《 HIM》,那個 take放於《 HER》,所花費的時間及精神,其實比拍兩套戲多出 1倍。

3.點解揀《 HIM》男主角占士麥艾禾同《 HER》女主角謝茜嘉西婷做主角呢?


謝茜嘉曾於訪問中自爆,因首次同占士合作,所以起初都擔心同占士唔夾,但相處後覺得占士好幽默,而且好演技,希望可以同佢再合作。 

因謝茜嘉有份參與劇本創作,一早已了解戲中女主角角色,而且謝茜嘉出名係好戲之人,所以早已認定她做女主角。至於搵占士麥艾禾做男主角,事關導演覺得占士麥艾禾好有幽默感,帶點傻氣,好有魅力,而且好切合戲中男主角性格。

4.仲有另一個叫《 THEM》嘅版本?


除《 HIM》同《 HER》之外,導演額外剪輯一個 122分鐘嘅版本叫《 THEM》。雖然條橋係好,但似乎用得太盡。 

係呀,除《 HIM》及《 HER》之外,導演再將兩套電影合而為一,重新剪輯一個版本叫《 THEM》,以旁觀者的角度再看一次整個愛情故事,但因《 THEM》有太多相同的場面,加上節奏比較慢,所以香港片商決定只在香港推出《 HIM》及《 HER》。


撰文:何家文

tvb4life 發表在 痞客邦 留言(0) 人氣()