真人騷

Rest in Piece 從錯誤中學習 連詩雅:人誰無過

Ads by Google

上次見連詩雅是她 24歲,這次再見,她剛滿 26歲。

她說女孩子 25歲是個分水嶺, 25歲前還是小女孩, 25歲後就真的要長大了。
連詩雅的成長體現於:十幾歲時夜夜笙歌,現在一年只有生日去一次蘭桂坊慶祝:「朋友圈中最早睡早起就係我。」
當年無仔不歡,早過 Miki戀永安太子爺、同 DJ曲赤密照傳得滿天飛,現在早已經忘了戀愛滋味:「單身四年,我想搵個可以陪我行好耐嘅人。」

以前最緊要相識滿天下,現在明白朋友重質不重量:「朋友少咗好多,但關係更緊密。」

還有,小時候最要面子,現在則學會了自嘲,多得鬧出經典「 Rest in Piece」笑話後俾人笑得多,上月再被河國榮揪出「 Although…… but……」的文法錯誤已經識得笑咗先:
「開頭我好介意,但諗諗下,社交網絡最緊要係抒發得即時,下下要思前諗後、 check完又 check,會唔會太唔人性化?做人會唔會太攰?
小心啲係要,但係有人會由出世到最後冇犯過錯咩?我唔相信!」

這番話,你可以解讀成連詩雅不認錯不虛心,我倒覺得從膽戰心驚到理直氣壯也是一種成長,是誰規定藝人就要是道德完人和文字專家?郁啲就要開記招向公眾道歉?
又不是老師,又不是得罪了全天下……
不過咁,連詩雅入行前的確是老師,專教幼兒英文。

教書時 我會小心得多!

人誰無過係真,但我唔係好明,你話晒入行前教過好多年英文( Baby Gym英文導師)、做過好多年兼職翻譯(加拿大領事館)?
教書時我當然會特別小心,教材一定會事先自己反覆校對。但係發 post……我承認係自己唔小心。媽咪話得啱,由細到大我份人都好大意,好多嘢就算擺喺面前,我都可以睇唔到……以為啱就一路沿用,冇斟酌過到底係唔係啱。 rest in piece就係一個錯。至於最近 although嗰次,我真係冇諗咁多,前排全神貫注綵排拉闊音樂會,絕跡社交網絡一排。嗰一個 post,就係即時一個抒發,冇諗過會被放得咁大。

 

你抒發心情,被人捉錯處,覺唔覺得好慘?
入行前已經知道,藝人做嘅所有嘢都會被放大,但係冇諗過𠵱家真係好細微好生活化嘅嘢都會好執着。冇辦法,報紙雜誌需要好多 information,啲 information點嚟?就係要將小事放大。社交網絡有好處亦有壞處,等於我有嘢想知,提出一個問題會得到好多答案,相對哋,佢幫到我哋,我亦要承受隨時會有好多惡評。

 

聽講你個 rest in piece經典,連同事朋友都會取笑?
我都真係慣咗,仲識得自己笑埋一份。當你可以自嘲時,即係已經放低咗,即係已經接受咗。今日你哋笑完,聽日咪又係俾另一個新聞吸引?呢樣嘢係我呢幾年學識,每遇到一樣嘢,我都當佢係磨煉。冇人保證你做咗同一樣嘢十年就唔會再出錯,你滾咗廿年無事,亦唔保證永遠都唔會出事。日日都會遇上新磨煉,媽咪教我,唔好理人點講,煮到埋嚟就食。

 

剛出新 EP,又剛剛完成入行來最大型的演出,唱過拉濶音樂會,你覺得離自己開個唱的夢想更近了嗎?
開騷好易,但係開完騷得到好口碑好難。以前細個,覺得自己好叻好巴閉,但係越大,越覺得呢個世界好大,自己做得好唔夠。就算係歌手,都需要 practice,個 practice唔係我喺錄音室、喺唱歌堂無限唱就得,而係需要上台面對觀眾。偏偏我嘅自信就係嚟自觀眾,而香港歌手又最欠缺呢種現場訓練。我唔妄求一步登天,但係每多一次上台經驗、每累積到多一個歌迷、每次學唱歌學跳舞我見到自己又比尋日行多一步,我就知道自己離理想近咗一步。大家都話選擇太多,香港市場太細,歌手越嚟越難彈起,呢個世界係爭唔晒亦都學唔完嘅,我唔求自己係最叻嘅一個,只係想同別人唔同,叻過尋日嘅自己。」

怕寂寞 因為驚撞鬼!

生日被拍到夜蒲拖仔,是新戀情嗎?
唔係,仲喺瞭解中。其實我覺得好無奈,被人影過蒲咗晚,就會被人當正晚晚都夜蒲,係常客。其實真心嗰句,我好耐冇去玩,一年就係得嗰一晚,因為慶祝自己生日。平時事實上我晚晚早睡早起,朋友當中最早上床就係我。

 

可惜早睡早起生活健康冇圖片表達、冇人有興趣報導。
係囉……其實我真係好耐冇玩。細個最怕一個人,做咩都要搵人陪,最鍾意一大班人柴娃娃,係因為我驚鬼。

 

下?你見過鬼?
有呀,喺我九歲、十歲嗰年。公公過咗身,我試過見到佢企喺我床頭,又試過連續幾晚發夢夢見過。佢企我床頭戴嗰個冷帽同着嗰套衫,我從來冇見過,但係事後形容番俾婆婆知,又真係有。佢喺我夢中揸住個龍頭拐杖原來我出世之後都冇用過,但媽咪話公公真係有個龍頭拐杖;我十歲前讀國際學校,真係識零中文,但係夢入面公公俾咗封信我,我會知嗰個上款係寫俾媽咪;我仲記得公公幾次報夢,我都好驚,但係佢見到佢嚇親我仲更加驚,直到有一次我喺夢中同佢講「你要唔要食粒糖呀?」開始唔抗拒,從此以後佢再冇喺我夢中出現。其實咁多個孫,公公最錫係我,但係佢過身後唯一會驚佢嘅孫都係我。我諗佢一直放唔低呢樣嘢……

 

害怕一個人,係唔係都因為父母離異,媽媽又成日唔喺香港,屋企成日淨番你一個?
都係嘅……媽咪一個月幾要飛幾次,成日一去就一兩個星期,屋企大部份時間得我一個,細個最怕淨番一個。但係隨住年紀增長,我開始習慣一個人,亦都學識享受一個人生活。

 

不過總要人陪㗎?低落時總會想要一個擁抱㗎?
係呀,出到去、喺人哋面前,遇到咩、有幾難過都要撐住都要堅強,係返到屋企、喺媽咪面前我又可以做番小朋友。我係嗰啲鍾意報喜不報憂嘅女,但係好在唔使講到明,媽咪都會知我幾時需要一個擁抱,幾時需要對住我講句「 everything gonna be ok」。嗰刻,未來係唔係 ok唔重要,我淨係需要有個人、喺嗰一刻講俾我聽。

唱情歌 但不知情滋味!

所以生日陪你慶祝生日的闊少瞭解成點?
都仲瞭解緊。我細個好鍾意拍拖,戀愛大過天,但係𠵱家大個女,我唔再係要一個男朋友咁簡單,我係想真係搵一個人陪我行一段路。呢個人係唔係可以陪我行耐啲?我需要多啲時間瞭解,所以我話,仲瞭解緊。

 

單身咗幾耐?
入行時同上一個男朋友分手,已經單身咗四年。本來我幾驚拍拖,我太疑神疑鬼、睇得感情太重、太容易被愛情影響心情。諗下都幾驚,成日猜疑人好煩,嬲、嗌交都好攰,好似同工作拍拖件事仲簡單仲開心。

 

𠵱家唔同咗諗法?
開始轉變中……我啲歌以情歌為主,當我唱唱下,開始覺得人歌合一有難度,開始覺得歌詞感覺離我好遠,會驚覺原來我已經好耐冇拍過拖,已經就嚟唔記得戀愛嘅感覺。越耐冇拍拖,個人越係會覺得怯,呢幾年唔係冇遇過適合嘅人、唔係未試過覺得可以去馬,但係人大咗會變得好多疑問、好怕被拒絕、亦都怕唔可以天長地久。我都試過當我以為一切都適合嘅時候,對方接受唔到我嘅工作性質、嫌我唔可以陪到佢。朋友可以約唔到呢個打俾第二個,但係伴侶唔可以我唔得閒走去搵第二個做伴侶。世事就係咁,到我想有嘅時候未必可以遇上,但係我唔係呢一時半刻要人陪,係想搵一個人可以陪我行一段長嘅路。

第一次與第十次

上次專訪連詩雅,我特別記得她一番話:「一出道我就好大壓力,想做好自己每次表演,後來我開始跑步,慢慢明白到一個道理,機會重要,經驗更加重要,第一次上台永遠唔會做到第十次上台嘅感覺,有啲嘢急唔嚟,跑步同做人、做呢行都係一個道理。」
年紀小小,一番話說得一點不簡單,尤其是出自這個 16歲已經食住煙蒲夜店、遇過唔少渣男的連詩雅。曳過又如何?正如網上 post文串錯字,你有你取笑和幸災樂禍,你笑完就算,但是從錯誤中學習和長進的,是當事人、是連詩雅。



一年去得一晚蘭桂坊,被人影到相就係蒲精……《蘋果日報》圖片 

藝人言行往往被放大但係我早睡早起勤跑步冇人會講……網上圖片

下下計得咁盡、唔可以出錯,會唔會太攰…… 

〈說一次〉提醒咗自己,原來我已經冇拍拖好耐…… 

啲嘢爭唔晒學唔完㗎,我淨係想每日叻過尋日小小…… 

喺出邊要扮硬淨,返到屋企我淨係想喺媽咪面前做返小朋友……《蘋果日報》圖片 

撰文:朱小博
攝影:范仲良
髮型: Jimmy@Hair Culture
化妝: Kris
服裝: initial、 Vivian Westwood
首飾: Novelty Lane
場地提供: LUPA

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()