黃秋生着晒火企硬擺拍

多年沒有拍劇的影帝黃秋生近月參演無綫新劇,期間多次呻要「貼錢開工」,劇組近日往上海拍外景,秋生與無綫因住宿事宜再爆事端,據知影帝級的秋生不滿住五星級酒店的差額要自己補貼,因此據理力爭聲稱「唔搞掂間房唔開工」,但無綫基於政策問題,一於「執正嚟做」拒作優待,雙方一度處於拉鋸局面,氣氛緊張!

Ads by Google


(設計圖片、真實對白)

兩屆金像影帝黃秋生近月「拍膊頭」拍攝無綫新劇《梟雄》,剛烈敢言的他直指是「貼錢開工」,另外有指他經常「改劇本」,同劇的黎耀祥及吳卓羲均力挺秋生。

近日劇組移師上海拍攝外景,黎耀祥、吳卓羲及梁琤已抵埗,馬國明、陳煒及唐詩詠則於今日到達,惟秋生前日出發時,因颱風令航班延誤,秋生只好爆返歸,改於昨晨自費商務機位飛抵上海,昨日秋生接受電話訪問,直指航空公司處理不當:「掛八號風球開始我已經一直問,航空公司話冇問題,會照飛,點知去到櫃位,竟然話架機仲喺上海,唔知幾時起飛!據我所知,上咗機嘅乘客等咗四至五個鐘。」


劇組昨日已在上海進行拜神儀式,祈求一切順利。

黃秋生畀面無綫拍劇,即獲安排兩大美女胡杏兒及蘇玉華「左擁右抱」,不過只限劇中咋。
拒隨劇組住三星酒店

豈料到達上海後「一波未平,一波又起」,秋生因住宿問題與無綫起爭論,據知《梟》劇全體人員入住三星級酒店,以便劇組隨時將房間改建成化妝間、服裝間,由於五星級酒店不容許如此改動,故所有劇組人員均被安排入住三至四星級酒店。無綫向來一視同仁,不論演員卡士,也會安排兩藝人入住雙人房,若有人要求「包房」或安排助手隨行,則要自行補貼差價。

不過,影帝級的秋生近年甚少拍劇,可能不熟悉此政策,除要求入住五星級酒店,更不滿要自行補貼的政策,昨日他說:「入房又話啲房唔包,叫我自己畀錢(補差價),好奇怪!條件之前傾好,助手(費用)唔包冇問題,但要我畀差價?我留個半月,要補成七萬幾蚊,唔通要拎咁多錢上嚟找數咩,我帶十幾萬呀?我冇帶咁多錢上嚟,搵條命找呀?」秋生堅持不會補差價,事件未解決亦不會埋位拍劇,他續說:「本來冇通告,今晚又要我拍一場,搞掂啲房問題先開工啦!一陣拍完返嚟畀人丟晒啲行李出去點算呀?我要求係好正常、合理,都係為工作,就算飛機搭經濟客位都係求工作方便,唔通叫我住150蚊啲房呀?我咁大個仔都未住過!演員要share房,但我助手係女仔,點同我住一間房呀?」

霍汶希撐秋生冇要求

事件擾攘短時間後終獲解決,監製王心慰表示工作日程照舊,而秋生事後則說:「經理人(霍汶希)話全數唔使我出,會去今晚通告!」有傳費用由經理人霍汶希「擺平」,霍汶希對此拒作回應,但認為秋生的要求只是一線演員的基本條件,很多內地明星要求更多:「五星級酒店、坐商務機位,一加一(助手)都係好正常,佢係畀面TVB先返去拍戲,拍開電影收貴好多,佢同TVB合作已經係冇要求。」

文:影視組

王心慰冇有怕:會按本子辦事

身在上海的《梟雄》監製王心慰昨日接受電話訪問時,被問到秋生認為「要自費房間差價的做法很過分」一事,她坦言公司一向有公司的規矩,更坦言秋生要求住五星級酒店,她說:「佢要住五星級酒店,我都搵人幫佢搵咗,要去食牛扒、龍蝦,咪要自己畀囉!我哋所有一線演員都係住同一間酒店,大家出嚟拍戲好一致、合群,冇問題,有啲人好尊貴!冇問題o架!」說到秋生聲稱如果「未搞掂間酒店房唔會開工」,王監製回應:「我哋一早已經畀咗通告,佢一陣都會嚟拍。(怕唔怕合作時面左左?)唔怕,按本子辦事。」



區偉林表示公司有公司的規矩。

至於無綫助理總經理區偉林接受訪問時坦言已收到劇組消息,亦知道監製已處理好事件,他謂:「有啲嘢係公司一路以嚟規矩,會一視同仁,唔會因為卡士而改變,除非有好特殊嘅情況例如健康或缺陷問題,先會有特別安排。如果係演員個人要求住好啲,呢啲個人決定咪自己畀錢囉!」

娛圈判官愛抱不平

藝人黃秋生性格一向爽直,不畏強權的他經常不平則鳴,更不時為他人發聲爭取公道,被視為圈中有名的義氣仔女!



黃秋生

於2010年有色情網站公然將女星的靚相「加工」變三點盡露,一向敢言的秋生看不過眼,為一眾受害女星抱不平之外,並強烈要求政府有關部門主動調查和跟進事件。

2012年台灣歌手羅志祥(小豬)與周杰倫(Jay)粉絲在網上掀起罵戰,秋生為了力撐契仔Jay,在微博上留言:「最近有很多評論,但羅志祥是誰?」因而引起小豬粉絲不滿。事後秋生解釋此言沒有貶義,並稱已於微博上向小豬致歉。


羅志祥

黃秋生

今年有意參選演藝人協會新會長的秋生,到了投票當日卻被會方人士拒諸門外,事後他想再找大會了解,但在演藝人協會門口按鐘良久卻不得其門而入,但他揚言為演藝人謀福利的想法不會因此熄滅。

黃宗澤:補錢換私隱都值

無綫小生黃宗澤(Bosco)經常為公司出埠拍劇,已習慣公司的一貫制度,他稱數年前為《摘星之旅》到大陸拍外景時,在酒店住宿方面因想住得較舒服,並擁有私人空間,所以最後自己補錢住單人房,差額約為「一萬幾千」,Bosco坦言拍攝之前會向公司問清楚:「其實個個外景地方唔同,有啲會有酒店贊助,演員想住單人房會容易啲,但我早幾年幫公司去大陸拍《摘星》外景,起行前都問清楚,最後公司有公司制度,我係明白嘅,咪自己補差額囉,一萬幾千左右啦,換嚟個人私隱都值得嘅!」



黃宗澤經常為無綫出埠拍劇,並稱不介意補錢換來私隱。(資料圖片)

馬國明:公司制度一向係咁

與好戲之人黃秋生同拍《梟雄》的同戲演員馬國明與唐詩詠今日將出發到上海,會合《梟雄》劇組開始拍攝,而吳卓羲日前則已跟大隊一同出發。談到秋生因要自費補酒店差價一事而大動肝火,馬國明言坦言在無綫工作多年,制度一向如此,他謂:「要求一個人房嘅話,每日要幾十蚊差額,唔需要補太多,不過公司向來出埠拍嘢超過三日嘅trip都會有pocket money畀番,嗰條數其實都cover到,咁都好啲。」他又坦言平時拍劇不會聘請助手,因為與劇組本身也很熟落,大家能夠互相照應。問他會否要求住五星級酒店?馬國明謂:「唔使,我哋啲小演員,跟大隊就得。」



馬國明

至於唐詩詠亦坦言向來也是自付差額,問她覺得是否合理?她謂:「我諗每個製作單位都有唔同準則,之前出去拍電影,係有啲舒服嘅環境,方式唔同,我入TVB以嚟一路都冇變,對我嚟講問題不大。」至於吳卓羲亦自言會有助手隨行,但亦是自行補錢,並早已習慣TVB多年來的模式。

 


唐詩詠

吳卓羲

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()