Tim Cook今次在台上的表現明顯比上次生鬼,雖然仍未亦無可能及得上 Steve Jobs,但 Apple fans已經收貨。 

CLOSE-UP

美國直擊  iPhone 6巨屏駕到

Ads by Google

苦等多時的大屏幕 iPhone,終於有實物。 iPhone 6同 iPhone 6 Plus分別配備 4.7吋及 5.5吋屏幕,預期今次 Apple將可搶番不少用家。最難得是傳聞多年的 iWatch,亦有同步發布,更正式命名為 Apple Watch。
難怪今次 Apple特登移師大場,原來有大把本錢揸手。

經典會場

一改近年慣例, Apple的發布會未有在總壇舉行,而是選址距離總壇兩公里、位於加州 Cupertino的 Flint Center。除了貪地方夠大可容納三千人,原來 Flint Center同 Steve Jobs充滿淵源,因為第一代 Mac機,就於三十年前在這裡發布,可說是 Apple發迹的地方。


位於 Cupertino大學區內的 Flint Center,當年 Steve Jobs就在這裡發表 Macintosh。 


在發布會場旁的臨時白色建築物,正是 iPhone 6及 Apple Watch的試玩區,發布會一完,所有 Apple fans搶先排隊試玩。

新機規格

 

尺碼解封

講真,原本仲以為要入場瞓番半個鐘,先會入正題講新 iPhone,但可能 Apple知道網上早已瘋傳相片影片,怕大家睇到厭,所以 Tim Cook一開場就直接講兩部新機。先講 iPhone 6,如傳聞所言屏幕加大至 4.7吋( 1344× 750解像度),同時終於打破教主 Steve Jobs「規定」新機一定要單手操控的枷鎖,推出巨屏版本 iPhone 6 Plus,屏幕加大至 5.5吋( 1920× 1080解像度),追貼 Samsung GALAXY Note 4( 5.7吋)。可惜屏幕未有採用藍寶石水晶(可能產量不足或成本太高?),亦無 2K解像度,同傳聞略有出入。
外形變成弧邊,機能亦大幅提升,新一代的 64bits A8處理器,比起初代 iPhone快 50倍,用落感覺,好爽!點玩都感覺不到窒慢。兩部機都支援 4G LTE cat 4(下載速度達 150Mbps),亦同時對應 VoLTE(利用 4G網絡作語音通話,比傳統更清晰)。機能加強,機身卻只厚 6.9mm( iPhone 6)以及 7.1mm( iPhone 6 Plus),比 iPhone 5s至少薄 0.5mm,手感都算舒適。


iPhone 6 Plus擁有 5.5吋大屏,但因為機身夠薄,再加上弧邊設計,仍可以單手拎住用。 

高清慢拍

當其他對手的手機都配置過千萬像素攝力, iPhone 6及 6 Plus卻原地踏步,只得 800萬像素,睇落都幾蝕底。但 Apple在拍攝功能上落足功夫,配備 F2.2大光圈之餘,亦內置防震系統( iPhone 6 Plus更對應更強的光學防震),拍夜景絕無甩拖。全新的 Focus Pixels對焦系統,亦大大提升速度更快。為照顧 selfie需要,前置相機對應 burst mode快速連拍,自拍更加快而準。拍片方面,新機可拍攝 1080p 60fps全高清影片外,更可玩埋 240fps慢動作影片,玩法更多。


雖然已盡力偷薄機身,但鏡頭始終有一定厚度,水平睇就會發現鏡頭位凸了出來。 

由於機身較大,所以 iPhone 6 Plus可以放埋光學防震系統入去。 

按下 home掣,就會將 app的畫面縮至下半部,方便單手操控。

新機試玩

兩部新機變大了不少,但一拎上手,竟比預期中輕,相信長時候拎 iPhone 6 Plus打機,都不會太累。內置單手操作功能,只要按兩下 home鍵,就可以將 app畫面縮至下半部,方便單手操控。另外, iPhone 6 Plus的主畫面更可以好似 iPad一樣橫向顯示,打 email時鍵盤上可顯示更多快捷鍵,以及同時顯示更多郵件資訊。用慣大芒機的話,就會發現新機的操控更加易用同就手。
試玩過兩部機後,始終對 iPhone 6 Plus較有好感,特別是拍攝功能及電量都稍強,要換新機的話,建議都是直接買 iPhone 6 Plus好過,免得後悔又要重新再買。


跟機同時推出 iPhone 6、 iPhone 6 Plus不同顏色的專用皮套($358、$388)及矽膠套($258、$298)。 

屏幕的對比度比上一代提升六成,影像更加立體。 

搶機攻略

iPhone 6售價由$5,588起,而 iPhone 6 Plus則由$6,388起。今次新機並無 32GB版本,只得 16GB、 64GB同埋 128GB。問到兩部機邊部較好炒,先達 G-World老闆 Lo哥就對 iPhone 6 Plus睇高一線,「始終個芒大,一定好多人搶住買,炒價自然高。」當中又以 128GB版本會較搶手,「因為之前無,需求自然大。」
Apple由 9月 16日起會提供網上預約買機( http://www.apple.com/hk/retail/iphone ),與 9月 12日的網購方式不同直接速遞上門)。網上預約買機每日預約數量有限,成功預約人士要在第二日去 Apple分店買機。不過,以往有「抽過獎」的話,都知預約名額好難中,仲有什麼方法提升出機率?

 


3HK設有新 iPhone預先登記,只要進入專頁後 Like 3HK的 facebook,再填埋姓名、電話、電郵等個人資料就搞掂。 

電訊商登記
其實 3HK、 SmarTone、 CSL及中國移動香港四間電訊商,都有提供預先登記服務,登記方法好簡單,主要是做指定動作(例如 Like電訊商 facebook專頁),再填好姓名、電郵同流動電話號碼,當接受預訂 iPhone而又被選中,就會通知你去門市辦手續。據以往經驗,出機 plan都要等正式推出先有定案。

 

登記網址
3HK: http://iphone.three.com.hk 
Smartone: http://redpass.smartone.com/tc 
csl: http://www.hkcsl.com 
中國移動香港: http://www.hk.chinamobile.com/tc/flagship_handset_registration 

 

門市碰運氣
開賣頭幾日上午,其實可以去各大電訊商門市問一問發售情況,就以 iPhone 5s的開賣情況為例,門市通常都預留小量現貨,可以直接買到機,所以不妨行多幾間門市,可能有驚喜。

去舊迎新

打算買新機自用的話,舊機就可以拎去手機鋪回收。不過賣機之前,首要工作是清除手機入面的資料,以免個人資料外洩。

先做備份

剷機前一定要備份,如果有用開 iCloud而又有付款加大容量的話,只要進入手機內的設定→ iCloud→儲存與備份,開啟「 iCloud備份」將資料同步上雲端即可。
但如果只用緊免費的 iCloud 5GB容量,或者怕放上 iCloud易外洩,亦可以將手機連接安裝有 iTunes的電腦,然後在左上角功能選單揀檔案→裝置→備份,就可以將手機入面的資料同步到電腦。不過,以上兩種方法都只會備份手機入面的相片、影片、行事曆、聯絡人、短訊、 app等資料,至於音樂檔則不能備份。


只要進入手機內 iCloud的儲存與備份,就會自動計算雲端空間,並將手機內資料上載到 iCloud備份。 

怕雲端備份不夠安全,亦可以用 iTunes。 

重置手機

做好備份之後,就可以開始清理手機資料。最簡單方法是用手機的重置功能,進入設定→一般→重置,再選擇「清除所有內容和設定」一項,便能將手機所有資料清除。
不過,如果你的手機曾經 jailbreak過,由於有部分資料會殘留在系統檔案內,以上方法未必能完全清除,要解決可利用 DFU模式幫手。只須連接電腦,同時按下手機的開關鍵及 home鍵 10秒直至手機關機,之後放開開關鍵,保持按住 home鍵約十秒,直至電腦上的 iTunes出現「偵測到一台 xxxx(手機型號或預設用家名稱)在恢復模式」為止,之後再揀「回復 xxxx(手機型號或預設用家名稱)」選項,就會自動重新安裝 iOS及將舊資料徹底清除。


大部分用家只要在手機進行「清除所有內容和設定」,即可將手機內所有資料刪除。 

如果曾經 jailbreak過手機,最好用 DFU模式重置手機。 

早賣遲賣?


提醒用家一定要用 iCloud才可完全備份 WhatsApp及 LINE的多媒體內容。 

舊機要賣,好多人會諗是否需要在 iPhone 6推出前放機?先達 G-World老闆 Lo哥表示原來已不重要,「 iPhone 6發布後, iPhone 5同 iPhone 5s已即時減價,由於易手價都是跟行貨價而定,所以無論是 iPhone 6開賣前或開賣後,都不會影響舊機回收價。」現時 iPhone 5s的易手價約為$3,200,除了視乎部機的外形新舊,仲要睇埋配件,「最好有齊盒、耳機、充電器等,如果拎部淨機去賣,完全無配件,回收價就要減$100。」

還有 Apple Watch

講完兩部 iPhone 6, Tim Cook仲有「 One more thing」,就是傳聞的 Apple Watch,現場即時嘩聲四起,好似 Apple Watch先至是主角。
今次將會推出三個版本,分別是 Apple Watch、 Apple Watch Sport以及 Apple Watch Edition,三款都會推出 38mm及 42mm錶殼,照顧男女用家。
三個版本主要從物料區分:普通版採用不銹鋼製錶殼及陶瓷錶底,錶面就選用藍寶石水晶; Sport版就以陽極處理的鋁金屬錶殼配強化 Ion-X玻璃(還未知道是什麼物料); Apple Watch Edition則是高貴版本, 18K黃金/玫瑰金錶殼、藍寶石水晶錶面,再配以皮錶帶,望落矜貴得多。



三個不同版本的 Apple Watch,迎合不同用家口味。 

亮麗屏幕

講番功能,基本上同 Android Wear類似,同樣有心跳偵測、手機短訊提示、遙控拍攝及地圖導航等功能,亦可以安裝不同 apps擴充用途。試戴上手,藍寶石水晶弧形錶面賣相高貴,手錶比想像中輕,不覺負累。 Retina屏幕(仍未知道屏幕 size及解像度)夠亮麗,而且觸控反應夠快之餘,亦區分到不同按壓力度。內置 NFC感應器,對應 Apple Pay電子錢包功能。

易控錶冠

雖然功能同 Android Wear相若,但玩落就發現內置 apps的功能更加完善,例如地圖導航所顯示的資訊更多、運動及心跳監測會以圖像顯示資訊。為提升操控,錶側設置 digital crown(數碼錶冠)及 Friend按鈕,扭動錶冠可以放大縮細屏幕內容,按下錶冠代表返回主畫面。至於 Friend鍵,用途是呼喚出手機內的朋友 contact list,可以即時語音傳訊,或者於錶面上畫公仔來傳情達意。

等待來年

雖然使用感覺良好,不過,九成功能都要搭住 iPhone先用到,比新一批 Android Wear輸蝕。新錶最快都要明年初才推出,價錢由 349美元(約$2,750港幣)起錶。現時規格上仍有很多資料不詳,例如內置記憶體、如何安裝 apps、屏幕解像度、防水效能等,相信要等到年尾先會披露。


數碼錶冠及 Friend按鈕設置在錶的右側 

用地圖導航,不會得個箭嘴,而會有詳盡資訊。 

可以隨時 send公仔圖案,甚至將心跳傳送俾朋友。 

單講造工, Apple Watch絕對比現時的 Android Wear精細。 

新機新感覺


介紹 iPhone 6新功能時, iOS 8都是重點之一。 

有新 iPhone,自然有新 iOS。 iOS 8雖然早於六月公布,但配合 iPhone 6或 iPhone 6 Plus使用的話,仲有小量新增功能。

 


要用指紋認證先俾到錢,保安做到足。 

一嘟俾錢
果迷期待已久的 NFC,終於在新一代 iPhone出現。 iOS 8亦配合此功能加入 Apple Pay,只要將信用卡資料存入 Passbook,以後嘟錢找數時只要將 iPhone 6或 iPhone 6 Plus放近付款機就得。 Apple強調保安及私隱程度好高,不單要配合 Touch ID用,而且萬一遺失手機,都可經 Find My iPhone終止 Apple Pay功能。發布會上公布的 Apple Pay(同 AE、 Visa及 Master Card合作的電子信用卡系統),暫時只會在美國先行推出,未知香港的銀行幾時會採用?

 


橫向加 dual-pane介面,用得盡個大芒。 

橫向睇
iPhone 6 Plus加入 Landscape橫向顯示模式,而且部分 apps例如 Messages同埋 Mail,橫向時會變成左右雙介面,操作更方便。

 


打一個字,下面即刻出三個選擇(紅框)俾你揀。 

估打字
新款 QuickType鍵盤支援智能聯想字功能,提供三個預測選擇,大大減少打字時間。中文用戶最興奮莫過於 iOS 8終於開放使用其他鍵盤及輸入法,不再硬性規定用原廠輸入法。

 


自拍時可選擇 burst連拍模式,影到靚先至 save。 

影相多花臣
iPhone 6賣點之一是相機功能大大加強, iOS 8亦有相應改動,例如對焦時上下拉動畫面,就可以調校曝光補償,而且加入自拍掣,可以選擇倒數 3秒或 10秒影相;執相功能亦加強了不少,可以更仔細調校曝光、亮度及對比度。

 


成日搵的朋友基本上一定見到,開電話簿的頻率低好多。 

快打電話
㩒兩下 home掣不單可以管理背景運作的 app,仲出埋最近聯絡過的朋友,即時通電,幾乎不用回主頁開電話簿,打電話更快手。

 


有電話時,用 iPhone、 iPad或者 MacBook都可以接聽。 

與 OS X相連
利用 Handoff功能,連接 iOS同 OS X Yosemite,除了可以在 MacBook接聽 iPhone來電,如果在 MacBook睇緊網頁要出門口,拎起 iPhone就會自動載入同一個網頁流動睇,總之方便隨時換裝置。

 


想知隔籬聽緊邊隻歌,而家問 Siri就答到你。 

Siri認歌
新版本 Siri加入 Shazam功能,附近播緊歌時, Siri只須「聽」 7秒就認得出歌名,甚至連埋去 iTunes Store買歌,驚死你不幫襯。

 

只要在 Facebook以「 NEXT 3.0」為關鍵詞搜尋,或以手機的「 QR code」 app掃描,就可以睇到更多新聞同產品情報。


text:科技組

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()