• 用洛神花焗出來的花茶呈深紅色,有點像「利賓納」,用上幾粒乾花沖水,已經非常酸,如果吃不消,可以加入冰糖調味,令其變得可口。 

    壹知全解

    洛神花傳說

Ads by Google

洛神花相傳是由洛神的血淚幻化而成,所以花朵呈暗血色,不過大家不要誤會,真相是由英文 Roselle音譯過來而得名,其又名玫瑰茄。
除了名字富詩意,洛神花都唔只得個樣,仲可以降血壓,真定假呢?

 


現時不少有機耕作農場都有種植洛神花,九月到十一月是花期,要買新鮮洛神花就要趁現在。 

洛神花愈來愈多人知,亦都愈來愈多人買,九龍城街市花店梁太就有賣乾洛神花,二兩一小包二十蚊,像一朵朵乾花,聞上去,有一陣天然酸味:「好似花茶咁樣焗,寫字樓妹妹仔用幾粒就沖成日,沖熱水陣味酸酸哋,唔受得酸味就要加糖,新鮮就可以用嚟做果醬浸酒,或者用嚟煲水落片糖。」她所賣的洛神花通常是來自元朗農地。
乾花見得多,原來中秋已過,也正是洛神花開花時節,走訪位於元朗大江埔村的歐羅有機農場,看見一株株瘦弱小矮樹,上面結咗一朵朵暗紅小花,正是新鮮洛神花。
場主黃如榮告訴記者,春天四月份他已經開始育苗。現時洛神花剛開,盛開之後,大概一隻半鵪鶉蛋大左右,「花期大概兩、三個月,由而家開始開花,去到十一月都仲有,但十一月就叫尾水。十月最茂盛,想買新鮮洛神花就喺嗰段時間買,其他採收咗落嚟之後,我哋就會風乾佢或者曬乾封存,平時可以用番。」黃說十二月花期完結後,整株就不能再用,因為洛神花是「一年生」植物,花期一過就會枯萎,要第二年重新育苗。
他三年幾前開始從台灣引入洛神花種子,全因為要趕上潮流:「台灣早喺七、八年前已經開始流行,呢幾年傳到香港。用嚟沖水飲焗茶功效係可以祛血脂降血壓,排毒美顏,仲有瘦身功效,好多人當佢係寶,所以有機耕種,好多時都會種洛神花。」現時除了貪靚女士會買之外,也愈來愈多老人家幫襯。
註冊中醫師麥超常博士就指洛神花可以清熱解毒,亦可以利尿。雖然沒有臨床數字可以證明可降血壓祛血脂,但麥就解釋其利尿作用或對血壓有幫助:「正如西藥入面嘅利尿藥,因為排尿可以排走啲鈉,將體內電解質(例如鈉高)平衡番,就可以降到血壓。同埋,血壓高有時係因為熱毒,清咗熱毒就可以降到血壓,好似我哋有啲情況下,都會開夏枯草俾病人,清熱順便降血壓。」

 

不過,洛神花性味屬寒,麥提醒陰虛火旺(即常面赤紅喉嚨乾)、氣虛陽虛(即身體較弱,容易覺得冷)都要注意:「飲咗有機會暈,個人唔舒服,嚴重可能會頭痛。」如果嫌太寒又想飲,可以試試加入紅棗,其屬溫性,可以將洛神花的寒性降低。


撰文:林丹霞
攝影:鄒潔珊

tvb4life 發表在 痞客邦 留言(0) 人氣()