插圖:王健威 

中環人語

今次陳德霖𤓓了

Ads by Google

嚟緊呢個禮拜四,就係蘇格蘭公投獨立嘅大日子;獨派、統派,鬥得難分難解。反應最敏感嘅,當然係英鎊。英鎊由七月至今已跌逾五個巴仙,預計「蘇獨」成功的話,會再跌一成。結果單係八月,已有一百六十八億英鎊(約二千一百億港銀)流出英國。因為咁,小宗就諗起一個人。

 

上年十一月,金管局與英國上市地產商 Great Portland Estates合資,以約兩億英鎊(即約廿五億港銀),買入位於倫敦西部、仲係樓花嘅「漢諾威廣場綜合商住項目」。今次係金管局少有投身房地產開發,仲要喺倫敦咁遠。金管局由陳德霖(攞命陳)揸庄,當時已有人批評,投資英國樓風險高。不過金管局只話當地房地產夠蓬勃,唔肯講回報率有幾高喎。
若然英鎊貶值影響回報,受嘅咪又係納稅嘅香港人!須知道金管局嘅責任,係捍衞聯繫匯率,以及促進香港銀行業穩定等。主動揸鑊鏟,點都有風險㗎!

中環寸嘴 豆腐渣變燒鵝

工廈大王楊耀松大仔,家族的收租物業,遍布港九,屬正牌收租公。自認寸得起,謂「有我咁得閒,無我咁有錢;有我咁有錢,又無我咁得閒」,經常流連富豪飯堂品嘗美食,仲喜歡到新開食肆「踢竇」試新菜。
返溫哥華一趟,望吓過期雜誌,阿發(馮景禧長子)娶新抱嘅新聞鋪天蓋地,我死鬼老豆同馮景禧老死嚟㗎,唔係生意夥伴,而係出嚟「威」嗰隻。阿發喺溫哥華貴為僑領,喺婚宴致辭提到話唔想個仔做 parasite generation,即依賴祖業而生存嘅寄生蟲,仲話呢個詞彙連西方傳媒都未聽聞,唔係「化」,等我露兩手,家陣都唔興乜鬼 silver spoon,潮語係 The Lucky Sperm Club,形容有祖蔭嘅富家子弟,咁就祝對新人早生貴子。
禮拜六,去銅鑼灣間「慶有餘」食晏,之前喺附近做完 facial,撞入去醫肚食過吓,位置吊腳啲,樓上鋪,唔熟路四圍搵,真係搵到「㷫有餘」,餐廳英文名幾扮嘢,叫 Cornucopia(註:取自希臘神話中裝滿花果穀物的山羊角,象徵豐盛),貪呢間餐廳標榜靚食材,用本地無激素健味豬,蔬菜來自私家農場,點咗個太爺雞、雪山叉燒包、蟹肉蟹黃煎米粉、冬瓜粒湯,食品可以啦,不過太多「阿太」喺附近,講嘢唔方便,下次要 book間房先得。


四十蚊有咁多金華火腿骨,加埋支$78燒酒,都仲平過買一條黑毛豬骨。 

楊國佳 K.K. Yeung(嚴寶權攝) 

 

食完晏行落去搭地鐵,經過老三陽,有啲金華火腿骨賣,四十蚊一大包,抵到爛, city'super賣黑毛豬骨,一條要$120蚊㗎,咪以為我識食唔識煮,喺屋企由我做菲傭嘅武術指導;嗱,買多支 53度嘅汾酒,用嚟同火腿骨出出水,「[!8BCD]賴[!8BCD]賴」佢,先好用嚟熬上湯,話晒大陸嚟,點知會唔會用工業鹽嚟醃火腿,呢招就係 mix& match,用技術搭夠,出嚟嘅上湯,味道濃過用 city'super嘅黑毛豬骨熬嘅。呢啲就係用豆腐渣嘅價錢,整出燒鵝嘅味道。

許晉亨兄低調出殯


許晉乾做恒生非執董絕非只掛個名,而係會好認真咁出席業績發布會等,面對吓傳媒。(林志謙攝) 

李嘉欣老公許晉亨、阿仔 Jayden,連同老爺奶奶,成日見報,一度令人誤以為,老爺許世勳只有許晉亨一粒仔。上週報章刊登一則訃聞,好多人先知許晉亨有個胞兄許晉乾,於本月初逝世,享年七十五歲,訃聞更加在出殯翌日才刊登。外界對佢所知不多,甚至誤會係許晉亨堂兄。
咁又難怪嘅,許世勳喺十八歲時,就生咗許晉乾,隔咗成二十三年,先至生許晉亨,故兩兄弟年齡相差極遠。不過咁,佢一樣住喺屬於家族產業嘅司徒拔道曉廬,兩兄弟買物業亦拍住上,好似西環寶翠園、九龍站凱旋門、荃灣萬景峯等。許家乃城中望族,當年阿爺許愛周發財時,李超人都仲係穿緊膠花。而許晉乾貫徹低調作風,曾任恒生非執董長達十九年,至去年五月才離任。

本週圖片


(張國慶攝) 

呢個神器效用成疑,但標價就相當貴呀!

新盤宣傳綁住手腳


以往各樓盤推售,都會有大量實用嘅宣傳品,當中以利是封最受歡迎。 

近期一手樓又在熱鬧,小宗同個賣樓嘅老友傾開,先知一手銷售新例實施後,度橋宣傳綁手綁腳,好多限制。佢話以前推新盤,會製作毛巾、雨遮、朱古力,以至利是封,印埋樓盤名大大隻字。不過呢一年,無晒!皆因細到如一支筆、一個鎖匙釦,都被視為宣傳品;而根據《一手銷售條例》,所有宣傳品都要列明樓盤相關網址、區域、街道名、門牌、賣方、項目認可人、律師行、貸款機構,等等等等,最攞命係字眼不論中英文,都要用指定嘅大小及字體!唔跟足的話,最多可罰五十萬銀!吓?小宗唔少老友都用新盤利是封,貪唔使錢又印刷精美,如今要印咁多資料喺利是封度,分分鐘連「恭喜發財」都唔夠位印呀!

金牙大狀講嘢 有毛主席至有紅衞兵


冇毛主席,又點會有紅衞兵呢,請問?插圖:祝健中 

北大教授、《基本法》委員、一錘定音否定公民提名嘅饒戈平勸香港學生唔好重蹈覆轍做紅衞兵,更強調,打老師、鬥群眾,最先係由中學生發動。若非扮失憶,饒一錘梗係忘記咗紅衞兵係點樣嚟嘅矣。
六六年五月,北大哲學系黨總支書記聶元梓同六名教師喺北大飯堂張貼大字報,毛澤東撐佢哋,以《炮打司令部,我的第一張大字報》附和,由是展開造反有理之鬥爭。到咗八月,佢老人家仲扣上紅衞兵臂章、企上天安門接見紅衞兵,將轟轟烈烈之文化大革命推上高峰。
姑勿論紅衞兵係由中學搞起抑或喺北大點起火頭,請問饒一錘,如果冇毛主席,又會唔會有紅衞兵呢?當今香港又有冇毛主席呢?靠嚇都要有根據至得㗎,話晒都係教授噃。

中環人語迷你版

“香港不應為一間公司改變自己原則”

估中邊個中環人講呢句說話,送你 JWATCH J-37尊貴版藍寶石鏡面限量版手錶一隻有意參加者,請於九月十七日(星期三)下午一時後,將答案、姓名及聯絡電話電郵至 mailto:centralman@nextmedia.com小宗只接受電郵,郵寄免問。

本刊員工及直系親屬不得參加。
為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。

上週人語揭曉答案

“用恐怖熱線的方式去打擊學生參與罷課。”

黃之鋒
得獎者: Eunice Y
中獎時間: 1:00pm 10/9/14

廣告時間

你有某財團嘅黑幕想爆?你知邊間上市公司造假?
你仲想舉報地產霸權嘅不公?
歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!
爆料熱線/whatsapp: 6829 5929

tvb4life 發表在 痞客邦 留言(0) 人氣()