阿超及阿豪(左及右)首次創業即贏得人氣及掌聲,未來守業將是兩人的最大難題。 

壹盤生意

宅男開「豆腐花米線」 盲舂舂發圍

Ads by Google

二十多歲的阿超和阿豪(張超及麥泳豪),年初上大台創業節目《我要做老闆》,造型似宅男多過老闆。一口鄉音的阿超,一開聲更令人爆笑。兩人揚言賣雲南名物豆腐花撈米線,目標是以「平價的野心」打入市場,回饋社會。兩人的熱誠打動評判,得到節目廿萬元資助,並在深水埗欽州街開設「豆花妹撈米線」。開鋪當日,主持王貽興和森美現身支持,日賣千二碗米線。「創業」第一關,通過!
話咁快,近月銷量已因缺乏宣傳而急跌至每日四百碗,來到生意的第二關──「守業」。這時,兩名並不相識的投資者,主動提出加盟、甚至借出四十萬予他們開工場及分店,讓「豆花妹撈米線」在半年間開了六家分店,月賺九萬!然而幸運之神帶來的,卻可能是另一場危機。

 

阿超和阿豪是中學同學,兩人同是從內地來港,分外啱 key。中五畢業後,同樣在餐廳做廚師,又五年。兩人嫌工字不出頭,於去年暑假,齊齊辭工,走到阿超的家鄉雲南昆明,學煮豆腐花撈米線,「雲南好多美食,但要用番雲南嘅食材煮先好食,豆腐花撈米線係當地一般家庭食物,容易整。」阿超指正宗撈米線較重口味,「好鹹、好辣,又勁多油,但要迎合香港人口味,要調得冇咁鹹,辣味亦要改成麻辣。」
阿豪甚至想將話梅米線帶來香港,但用過多隻話梅,味道總是不正宗,於是略為創作,改成「喜樂牛肉米線」:「將七喜同可樂撈埋,就有話梅嘅酸酸甜甜感覺。」他們亦學煮牛尾米線及荔枝米線,「荔枝米線唔用麻辣用芥辣,再配啲甘筍、青瓜同蟹柳。」
滿腹大計,但創業欠資金,他們膽粗粗向青協申請創業資助。兩人面試時被問到鋪租、食物牌照費等,通通答不上,被對方責罵準備不足。兩人再花幾天時間,準備一份七十頁計劃書,才令青協改觀,並推薦他們參加電視台舉辦的創業節目,最終獲得二十萬資助,並再向銀行借三十萬開檔。他們高呼:「好似發夢一樣!」十五元一碗的外賣豆腐花撈米線,有客人喜歡,亦有人未能接受,總之就夠綽頭。但熱潮過後,這條創業路並不平坦,擴張處處難關。


豆花妹走外賣小食路線,每當下午放學至晚飯期間,門外會出現人龍。 

除了豆腐向維他奶攞貨外,其餘食材如牛肉、辣醬、花生及葱等均由自己配製。 

難關一 極速膨脹 質素難保

開業時,豆花妹米線每日可賣千碗,但近月已減至日賣四百碗,月賺三數萬。今年六月,一個機會翩然而至。有投資者主動向他們提出加盟,他們自然「𦧲飯應」!阿超說:「其實我哋唔想咁快搞加盟,但真係無錢自己開。而家一間店收十五萬加盟費,另外每月五千元特許經營費,並且要透過我哋入貨,我哋賺埋貨錢。」有錢流入,他們即時開慈雲山分店,又在寶琳新都城的百佳美食廣場設點,「唔使交租同水電費,只係將營業額兩成二分俾百佳,嚟緊十月喺天水圍百佳再開多間!」實行趁熱潮,開得多、賺得多!
對他們來說,更「幸運」的是,其中兩名加盟的投資者 Simon和 Martin,願以免息貸款方式借四十萬予兩人,在葵涌開設中央工場,不過條件就十分之辣,「以後每開一間加盟店,收取的加盟費,其中一半要分俾 Simon和 Martin。」阿超苦笑指是無奈決定,「無錢嘛。佢哋兩個真係幫咗唔少,教我哋合約條款。而中央工場出貨,賺嘅錢都係我哋。」即是說,豆花妹收到的加盟費,一半交 Simon和 Martin,另一半要還四十萬貸款,一樣是交 Simon和 Martin。阿超和阿豪,要極速膨脹,才有錢落自己袋再作投資,然而開店快,質素便難保證。


每間分店均設有大電視,不停播放有關豆花妹上《我要做老闆》的節目,利用明星來提高人氣。 

一碗豆腐花撈米線,會落齊五種配料,全部由工場預先製作,加快上菜速度,客人可再因應口味,而加錢買配料,如雲耳、排骨等。 

豆花妹在旺角的加盟店放上兩人肖像紙板,用來提高店鋪人氣及知名度,但記者觀察,吸睛程度不太高。

難關二 工場賺蝕打個和

無論如何,他們開加盟店的步伐愈來愈快,近兩個月分別在旺角登打士街及尖沙咀厚福街開店,其中登打士街加盟店老闆 Jacky,擺到明賺快錢。他表示開店首月已收支平衡,「嚟緊十月喺太子開多間,趁住依家有熱潮要盡快開多啲。」現時加盟店已開到過澳門,年尾前店鋪總數可達十間!
不過,豆花妹毛利率只有六成,較一般食店約七成為低,阿豪透露已不斷壓低食材成本,但已無節省空間,「以前用街市豆腐,依家入咗維他奶嘅山水豆腐,批發價平啲又滑啲。米線以前係買現成已煮熟嘅,依家係自己入米線再喺工場煮熟,慳到一成錢。肉類又搵到供應商比市價平半成,跟住自己用料炒熟。日後要賺多啲,惟有靠賣貨俾加盟店。」記者跟他計計數,現時工場每月營業額約三十萬,但食物成本已佔去十八萬,人工亦佔十萬,連同租金兩萬,基本上是打和,要賺錢維持有點難度。阿豪解釋:「工場二千六百呎,預咗產能供應到廿間分店,到時就有錢賺﹗」


阿超先在工場將米線預先煮熟,其後再運送到各分鋪,顧客落柯打時,職員只須將米線加熱即可食用,大家都做到身水身汗。

這碗冰鎮荔枝米線,是兩人為迎接夏天而設計的,用芥辣醬代替麻辣醬,味道酸甜開胃。 

難關三 無自設車隊


這幾位年輕人見不少朋友來幫襯,故他們又前來試食,他們覺得整體味道不錯,但略嫌太辣太油。 

阿超及阿豪無做資料搜集,開店已經常被搵笨,「深水埗店的上一手做車仔麵,我哋用十五萬元頂手費頂下鋪位,諗住好多嘢都用得番,點知開鋪第三日『矮仔爐』已壞咗,買過要六千;一個星期後雙門雪櫃又壞,再使咗五千,仲有好多器材都壞,同換過一批新嘅冇分別!」阿超笑笑口說當交學費。慈雲山店頂手費只需三萬元,但接手後亦中伏,「裝冷氣系統用了兩萬幾,但其實市價只係萬幾蚊,條渠又有問題成日塞住,又要使錢重新整過去水,真係每次開店都有新問題!」
無做功課,問題一籮籮。記者發現他們是每天要處理六間分店的食材,包括木耳、排骨、雞肉等,到年底前要處理十間分店,但竟沒有自己的運輸車隊,要每天 book貨車送貨。阿超承認計劃欠周詳,「試過有人叫我哋去東涌開店,因為有 outlet,就有自由行。但計過數車費太貴,運貨要用百幾二百,仲未計青馬大橋收費,所以告吹。我考慮緊組建車隊,依家資助一位員工考車牌,將來幫手送貨。」阿超又透露,現時免費幫加盟店送貨,若以元朗每日運費一百五十元計,每月運費支出達四千五百元,正好抵銷每月五千元加盟費,即只得五百蚊落袋﹗現時阿豪與阿超這兩位年輕人,心目中只有三隻字:「開分店」,但缺乏周詳規劃及長遠藍圖,只能再贈他們三隻字:「有排執」!

開業資料( 3/14)

租金^: HK$100,000
裝修和頂手費: HK$150,000
入貨: HK$20,000
雜費: HK$100,000
人工: HK$80,000
總投資: HK$450,000
^兩上一按及經紀佣金

營業資料( 8/14)

營業額*: HK$695,000
租金#: HK$70,000
人工: HK$185,000
入貨: HK$350,000
盈利: HK$90,000
*三間自營店、三間加盟收入(每間$5,000)及工場
#三間自營店及工場

一點意見 星林居老闆陳縉燊

有超過十六年餐飲經驗,香港擁有四間分店的麻辣米線專門店,他聽罷豆花妹兩位老闆的故事,認為他們有不少問題:
加盟費太低:十五萬都唔係咩大數目,收得太低啦!加盟月費五千都係好少,依家送貨要自己送,車費都蝕埋。
利潤率太低:我間鋪都有 30%啦,譚仔仲高,做米線唔可以淨做外賣,要做埋堂食,相輔相成先留到班熟客,賺錢先夠多。
加盟模式不可取:加盟方式係人哋出錢開鋪,鋪頭不是自己的話風險太高,以前麥當勞同人和荳品都係加盟店,但最終全部變番自己做。加盟賺嘅貨錢又唔多,人哋加盟耐咗,可能會自立門戶,米線不是太難煮的食品,很易被取代。


撰文:陳新政
攝影:關永浩

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()