爆壹爆

水貨客強霸的士站

Ads by Google

精於算死草嘅內地水貨客又有新招,佢哋發現咗上水坐的士去落馬洲或羅湖火車站,原來仲便宜過搭火車,於是上水的士站就咁被內地人攻陷了。

 

條數原來咁樣計,由上水去羅湖或落馬洲火車站,成人單程飛要廿三個半,但的士只要七十蚊,五個人除開即每人十四蚊,加埋行李費都係抵過搭火車,加上落馬洲檢查過關比較寬鬆,因此造成大量水貨客搭的士。
爆哥同老友飲完中午茶後,行去上水符興街的士站望望,大約下午兩點已見大陸水貨客排晒隊等的士,有唔知情嘅本地居民照排隊,以為可以等到的士,但班大陸水貨客一路排就一路俾自己友插隊,搞到本地居民根本一直上唔到車,附近商鋪員工話,由中午至傍晚,千祈唔好嚟呢度等的士,否則谷氣上唔到車之餘,隨時同班大陸水貨客嘈交兼打交。

陳慎芝紅上大陸

壹仔早前訪問完十三太保陳慎芝後,聽聞佢真係周身唔得閒,江湖中人撞口撞面都話佢呢期當紅。話口未完,佢嘅事跡已經傳到上大陸,好多大陸人都對佢產生興趣,呢個星期大陸一本雜誌《南方人物周刊》,就搵咗佢做封面人物,大談香港黑白兩道和本地滄桑歲月變遷。呢份雜誌在國內一向大膽,主要讀者群係知識分子,連奧巴馬和李嘉誠想講嘢,都指定由呢家集團報刊來訪問。而咁樣搵香港黑道人物做封面都唔係第一次,之前已經有 14K鬍鬚勇,出完書喺大陸賣斷市。
何解大陸人咁鍾意追香港黑社會報導呢?聽聞原來好多大陸人都係睇港產片大,其中黑社會劇情仲係耳熟能詳,所以佢哋都好喜歡了解香港黑道歲月。講番篇報導, 16版訪問中陳慎芝由港島到九龍逐個區數江湖秘聞外,亦都有爆曾志偉當年被人打經歷,原來王晶都係狙擊目標之一。另外,文中更有提及反佔中和佔中,自己及江湖人物都曾積極參與。

大陸富豪自己種菜養豬

中港台三地俾黑心豬油及毒食物搞到一頭煙,估唔到兩岸三地因咁樣而「大融合」。上週六,爆哥忽然間接到內地陳總電話,吹完一輪水之後,陳總猛叫爆哥上去佢北京別墅玩,仲話佢哋一班富豪,一早已唔食大陸黑心食物,因已買地請人自己耕種,仲自養豬牛羊雞鴨等,連水源都自己請人去掘新水井喎,總之,要完全隔絕坊間黑心食材。雖然陳總有啲招積,但佢所講絕無誇張,好多內地富豪都係咁樣,之前,爆哥一位專搞室內水耕無菌菜嘅友人,佢當初以為咁新嘅 idea及行業,入內地發展未必有人識貨,點知佢去搵內地 partner時,估唔到成班富豪爭住入股,其中一個仲好豪氣咁講,話即使啲菜賣唔晒,自己食及送俾高官同富豪友人等,都會好受歡迎。
雖然話自種食物隔絕外界污染,但內地空氣污染問題嚴重,雖然個腸胃唔使吸毒,但行出街點算呢,唔通要自備氧氣樽先得?




爆哥乜料
金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!

全站熱搜

tvb4life 發表在 痞客邦 留言(0) 人氣()