插圖:詹震寰 

八卦陣

點解佔中叫去飲?

Ads by Google

佔中行動如箭在弦,呢排政界、社運界、傳媒中人碰面嘅場合,成日聽到呢一句:「你去唔去飲?」當然大家明白「去飲」即係參與佔中。其實,佔中嘅正式代號係「擺酒」,唔係「去飲」,兩者有少少分別。

 

話說今年初,一班佔中義工開始討論佔中細節,但喺茶餐廳呢啲公眾地方大大聲討論佔中都幾突兀,於是有義工講笑咁將佔中變成「擺酒」,就可以光明正大傾吓幾時擺、邊度擺、邊個坐「主家席」、邊日最多人方便「去飲」、「去飲」嘅人使唔使「打定底」食嘢等等。
雖然偶爾產生誤會,但「擺酒」呢個詞語太好用,連三子都好 buy,最後變成「官方語言」,仲繁衍出唔少周邊用語。例如本月九日嘅剃頭行動係「訂婚日」,用剃頭展示「結婚」嘅決心;本週日黑布大遊行係「過大禮」。有義工話正考慮「派帖」,等「去飲」嘅人做足準備。「擺酒」日子已定,傳聞係「九月三十一日」,大家去到坐落去就得,唔使做人情㗎!
佔中發起人戴耀廷話,黑布大遊行未有大規模動員,都有幾千人參加,相信「去飲」嘅人會比預期多。記者沿途訪問遊行人士,好多都以為其他人唔再支持佔中,自覺責無旁貸要撐起香港,其實公民醒覺嘅力量先係最重要。

學者暗號「心不死」見光死


五百幾名學者聯署表達「民主之心不死」宣言,下星期大學罷課期間,會舉行一連串公民教育嘅課堂,讓學生「罷課不罷學」。(莫智謙攝) 

來自廿幾間大專院校、聯署咗「民主之心不死」宣言嘅五百多位教職員,同樣想用暗語溝通。呢批學者諗住為罷課學生搞公民講課,下一步仲落區做公民教育。中大社會工作學系副教授黃洪話,佢哋會透過 facebook群組繼續討論日後工作,呢個群組叫「心不死」,只邀請聯署者加入,大家見到「心不死」三個字就知道係自己人,以免被反罷課人士攻擊。但有與會人士話,群組名稱公開咗,即係已經見光死,黃洪笑住話會再改名。
聯署者除咗香港講師,仲有澳門代表,連學院嘅圖書館、文職人員都可以參加,睇嚟人數會逐漸增加。不過,暫時聯署嘅外籍教職員較少,原因係大會最初只係準備咗中文版聲明,未趕及翻譯英文版,由學者向所屬院校嘅教職員廣發電郵。有位學者話,佢唔好意思幫大會翻譯,發電郵時叫外籍學者用 Google翻譯成英文,真係有啲急就章。

肥龍七件棉衲輪流著


六十六歲嘅肥龍出名怕凍,日日西裝加冷衫出入法庭,棉衲更加唔離手,入到法庭要即刻披番先夠暖。(王偉洪攝) 

許仕仁涉貪案已經審咗接近八十日,法官預計審到明年二月。綽號「肥龍」嘅許仕仁上星期開始自辯,出名怕凍嘅佢,日日著西裝加冷衫出入法庭。入到法庭,冷氣都開得幾大,肥龍誇張到要披住件大棉衲,仲要拎住保暖包作供。
肥龍做官嘅時候,已經出名怕凍,大熱天著長袖衫出席活動,曾經貴為馬主嘅佢,有時天氣凍起上嚟,更加寧願由老婆代替去馬場落沙圈,自己唔願郁。睇開中醫嘅佢,多年來都改變唔到怕凍嘅問題,難怪同案被告之一、新地執董陳鉅源都笑說︰「佢有六、七件裡面唔同款式嘅棉衲,每日會換,你唔使驚佢全年都著同一件!」
家庭醫生鄭志文話,肥龍熱天都著咁多衫,可能天生體質比較弱,而且缺乏運動,導致血液循環減慢,亦都可能係有甲狀腺素過低嘅問題,甚至患上「愛迪生氏病」( Addison's disease,即「慢性腎上腺皮質機能減退症」)。患者難以控制體溫,好容易嘔吐同埋暈。佢建議肥龍做多啲運動,注意飲食,可能對身體有幫助。

黃均瑜大展「紅」途


黃均瑜(橙衣)港大畢業後喺李兆基中學教化學,九七年轉到左校福建中學(小西灣)做校長,開始力推國民教育,近期更狂轟學民思潮及佔中。(《蘋果日報》圖片) 

教育工作者聯會會長黃均瑜近期語出驚人,話學民思潮搞罷課係準備造反,推翻專制政權。之前佢又指團體鼓勵中學生參與罷課,同黑社會吸納新成員手法相似。大家都好想知道呢位仁兄為人師表時係點樣。
黃均瑜去年退休前喺小西灣福建中學做校長。咪以為佢一直「紅底」,原來佢早期喺葵盛嘅順德聯誼總會李兆基中學做副校長,兼教化學,有當年學生話佢講書時都唔覺佢有咁多政見。
校長崔康常九六年離開李兆基,幫手創辦恒生商學書院,成為專產狀元嘅「 A工廠」廠長。黃均瑜以為有望升任校長,點知俾人截胡,於是佢離開傷心地,九七年去咗啱啱轉為津貼學校嘅福建中學,亦開始佢一路向北嘅旅程,包括做國民教育推手、擔任國民教育服務中心董事、一一年獲頒發銅紫荊星章。他早年接受報章訪問時曾自述身世,五十年代喺廣州出生,約五歲來港,喺名校荃灣官立中學畢業,之後入讀香港大學。


全站熱搜

tvb4life 發表在 痞客邦 留言(0) 人氣()