程耀邦 香港「核」危機 II導演三十多歲對於現在的香港,程耀邦總結一個字:「灰」,但既然返唔到轉頭,只能做該做的事,在一片紛亂的香港,捍衞真相、自由。 

坦白講 程耀邦

回不去的伊甸園

Ads by Google

理工大學建築系學士畢業,還唸了個 MBA,正職是工程師,中學開始醉心戲劇,一投身便是十八年。
眼見近年不論左中右的港人均高舉「核心價值」,於是努力鑽研,創作兩齣有關核心價值的舞台劇,最後發現回不去不分善惡、只談風月的伊甸園。

 


戲劇中學生受到校方威逼利誘,供出貼大字報的學生;現實亦有周融大搞舉報罷課熱線,比戲劇更荒謬。 

我玩咗 drama十幾年,參與過好多製作,講愛情,講成長,乜嘢類型都有,就係未試過講呢啲。「核心價值」呢個題目真係好惡啃,愈掘得深,愈難受。
近幾年,香港發生好多事。香港勝在有 ICAC?偏偏 ICAC阿頭牽涉醜聞。香港有新聞自由?《明報》阿頭就被人襲擊。特首成日話捍衞核心價值,咁點解呢啲價值逐漸消失?於是舊年八月,我同其他 drama人創作一個以學校為背景嘅故事,講述有老師帶學生親身了解碼頭工潮,點知學校高層係商界中人,老師最終失去教席,連學生都怯於校方而掉轉槍頭。當時我想講嘅係關於「不平則鳴」嘅故事。
只不過短短一年,香港時局變得更複雜、更緊張。我哋創作咗另一個古仔,以校報揭發學校延誤工程醜聞做主軸,校方為咗控制輿論,不惜大減校報資源,仲成立另一個校園電視台,就好似依家嘅香港,你佔中,我反佔中;你支持,我反對;只有分裂,不斷內耗。當中有段情節,學生周圍貼大字報,校方唔單只嚴厲打壓,仲威逼利誘其他學生篤人背脊,估唔到公演之後,周融就搞個舉報熱線出嚟,原來呢啲咁戲劇性嘅事會成真,真係好得人驚。
套劇唔係一面倒,學生靜坐抗議,有人鬧佢哋霸佔球場,仲有其他學生鬧佢哋破壞學校。其實香港社會就好似一個金字塔,不理世事嘅人始終佔大多數,即使頂層嘅人,都會因為唔同原因而忘記所謂嘅核心價值。故事入面有個曾經支持校報嘅老師,最終選擇去第二間學校做校長,接受訪問時同記者講咗個古仔,話從前亞當同夏娃喺伊甸園生活,非常開心,直至佢哋偷食咗分辨善惡嘅果實,眼睛從此明亮,當包容同和諧都變成貶義詞,我哋就唔能夠再返去伊甸園。

 

活喺伊甸園,的確好幸福,但其實我無得揀,自從眼見咁多我以為唔會發生嘅事正在發生,已經返唔到轉頭。惟有利用戲劇發聲,啟發更多返唔到轉頭嘅人,盡力分辨假象背後嘅善與惡,將呢個社會變成另一個伊甸園。

由你開講

一切好人好事,壞人壞事,先吐為快。
你敢坦白,我敢講。
電郵: mailto:voice@nextmedia.com


撰文:林璐菁
攝影:王偉洪

全站熱搜

tvb4life 發表在 痞客邦 留言(0) 人氣()