米高佐敦 1比 6 figure$1,998洛文 1比 6 figure$1,788EnterBay開創先河,把 NBA球員造出一個個 action figure,在 figure界掀起一股收藏熱,最新推出為 1比 6洛文 figure。 

創業通

Figure大王

Ads by Google

34歲的 Bill(陳颷)創立本土 figure公司 EnterBay,由一個門外漢發展成為現時不得不提的 figure王國,全憑着 Bill的大膽和創新,當初向親戚借錢製作李小龍 figure起家,創業過程中經歷大起大落,一度因債台高築而想放棄,但 Bill堅持下來,之後更成為首間生產 1比 6的 NBA球員及米高佐敦的 action figure公司,以其高像真度成功在 figure界佔有一席之地。

 

Enterbay是本地首間推出 NBA action figure的公司,更曾與不同的中外電影合作,製作出的洛文、米高佐敦、尚格雲頓、李小龍、鐵甲威龍及 Mr. Bean等 figure,每個都栩栩如生,深受市場歡迎,是玩 figure之人必收藏之作。
創辦人 Bill說︰「我哋每個 figure大約會出 3千至 5千隻,其實香港嘅 figure市場好成熟,佔公司銷售額約 30%,國內則佔約 15%,其餘分銷到歐美等地,今個月 20號我哋仲邀請咗前 NBA球員洛文嚟專門店,為自己個 figure做宣傳。」
身為 figure王國大腦的 Bill,自問不是讀書的材料,讀了半年大學便輟學,「中學成績麻麻,之後去澳洲讀大學,屋企環境唔係好,要靠自己打工賺生活費。讀咗 1年,覺得讀書浪費時間,亦唔係唯一出路,不如早啲出嚟打工。」
99年回港後, Bill做過 sales、保安,一直在尋找創業機會,終在 01年成功賺第一桶金,「當時女友係日本人,不時會去日本搵佢,見到內地對日本二手電腦及電話有好大嘅需求,咁啱搭到路,可以喺日本收手機賣返去內地,有貨就一定賣得出,算易搵錢。」
但好景不常, Bill很快要面對創業路上的挫折,「做唔夠半年,合作開嘅日本人喺一次交易中拎晒啲錢走佬,我每次都係畀晒錢先拎貨,大部分積蓄就咁冇晒,係一個好大嘅教訓,令我反省做炒賣生意唔係長遠之計。」

長遠生意

Bill希望發展一門長遠的生意及創立自己的品牌,他將目光放在 figure上,「創過業唔想返去打工,就不斷諗有咩好做,自己鍾意李小龍,有收集相關嘅產品,但一直都冇自己滿意嘅 figure,靈機一觸,做高品質嘅 figure得唔得呢?就即刻搵資料,睇吓市面上有咩 figure公司、水平如何及點拎版權等。」
Bill在 05創立 EnterBay,當時香港有 2間專門生產 figure的大公司,他不怕競爭,並寫好 proposal,向美國環球片場申請李小龍的肖像版權,「最初拒絕咗,我用 email同佢哋傾咗幾個月,最終傾成,但版權費要 40萬,自己銀行得返幾萬蚊,咪硬住頭皮拎住份計劃書,周圍問親戚借錢,又去問銀行借,終於籌夠錢。」
首款推出市面的李小龍 figure定價高達$2,400,收到約 5,000個訂單,不但還清所有債項,更令 EnterBay開始為人所熟悉。


李小龍是 Bill的偶像,他的 figure事業亦以李小龍為開端。 

李小龍 1比 4 figure$2,888 

T-800(戰損版)1比 4 figure$2,888

尚格雲頓 1比 6 figure$1,380 

高比拜恩 1比 6 figure$1,588 

杜蘭特 1比 6 figure$1,588 

Mr.Bean 1比 4 figure$2,888 

難達要求

雖然收到訂單,但出貨是另一難題,「原來搵廠整 figure係一件好難嘅事,上到東莞、深圳周圍搵,一係嫌量太少唔接,一係製作水平做唔到我哋嘅要求。最後搵到間專生產日本玩具嘅工廠,但生產途中發覺做唔到想要嘅效果,好似上皮膚色始終係膠膠地,唔多似,我同細佬 York落場幫手,同埋教啲工人點做,最後算係勉強過關。」
EnterBay之後推出了李連杰、小丑、鐵甲威龍等 figure,即使每隻售價最少近 2千,但雕工精細,極受玩家歡迎,在香港 figure市場佔了一席位。 09年, Bill在旺角開設了首間專賣店,本是值得紀念的年份,但同年卻發生令 EnterBay陷入危機的事件。
「同電影《風雲 II》合作,製作戲裏面嘅人物 figure,當我哋收晒客人嘅訂金,但間廠話出唔到貨,搞到我唔能夠如期交貨畀客,唔少客人退訂,口碑又差埋。退錢畀客人之餘,我哋仲要拎多舊錢搵另外一間廠整過啲 figure,搞到周轉不靈,周圍問朋友借錢,有諗過不如唔好做,但最終都捱過咗。」

尋新出路

捱過了難關, Bill積極地找尋新出路,「 figure製作嘅對象,一直集中喺電影及動漫方面,其實仲有唔少發展潛力,咁啱我哋想發展國內市場, NBA籃球員喺國內同香港都好受歡迎,但冇本地公司出過高品質嘅 action figure,於是就試吓搵 NBA及米高佐敦傾合作。」
與 NBA公司及米高佐敦洽談可是一場持久戰,用了差不多 3年的時間, Bill在 11年才將 NBA現役球星及米高佐敦的 figure版權拿到手,在 12及 13年先後推出高比拜恩、勒邦占士及米高佐敦的 1比 6 figure,大受好評。


EnterBay甚具規模, Bill(中)成立了市場推廣部門,門市部則由他的妹妹 Natalie(右二)擔任主管。 

位於旺角廣華街 EnterBay的專門店,佔地約 600平方呎,店內放了一個個的展示櫃,放了像真度極高的洛文、米高佐敦、李小龍及鐵甲威龍等 figure。 

不少明星都是 EnterBay的 fans,如圖中的當奴(左)及方力申(右)等。

改變模式


除了外國電影外, EnterBay亦會與港產片合作出 figure,圖為《救火英雄》 1比 6 figure,每隻售價$1,488。 

在工廠環節上嘗過失敗的教訓, Bill不想再受制於人,決定擁有自己的工廠,並推出新的銷售模式,「傳統 figure行業都係整好咗 figure嘅初期模型,之後將資訊流出市面等人落單,收到幾多訂單先交畀廠去整幾多,由落單到拎貨,客人往往要等 1年,收到產品嘅質素仲可能有落差,等咁耐其實都幾冇癮,於是我哋決定生產咗 figure出嚟先,再將產品實物嘅資訊放出去,客人可即時買到鍾意嘅 figure。我哋仲入股一間玩具工廠,避免出唔到貨,同時可以培訓更高製作水平嘅工人。」
13年, EnterBay開始進軍內地市場,先後在北京及上海開設了專門店,對於未來的藍圖, Bill的目標是創新,「內地係一個有待開發嘅市場,嚟緊我哋打算再喺廣州開新嘅專門店,希望令內地人接觸玩 figure嘅文化;另外我哋都諗緊拎唔同範疇嘅版權,以製作新 figure,好似足球員系列,可以畀到消費者更多驚喜。」

開業成本*(旺角店)

租金( 2按 1上):$105,000
裝修:$350,000
器材:$60,000
總投資:$515,000

每月收支*

租金:$90,000
人工:$39,000( 3名員工)
入貨及雜費:$700,000
營業額:$1,800,000
盈利:$971,000
*只計旺角門市

夠經典

現時 EnterBay有開發部門來研發生產 figure, Bill說:「開發部會跟據兩大原則嚟生產 figure,要睇當時市場流行乜嘢,好似電影《蝙蝠俠-黑夜之神》嘅小丑及蝙蝠俠;另外,就係人物或角色夠經典,好似《未來戰士 II》及《教父》嘅角色等。」
但生產 figure也要面對一定風險,出現砸貨情況,「今年 7月動漫節推出嘅林書豪 figure,推出時咁啱佢由火箭轉會去湖人,但個 figure仲係着火箭隊衫,俾人 out咗嘅感覺,所以訂購嘅客人冇咁多。」
申請肖像版權所費不菲,米高佐敦是神級球員,故版權費過千萬元。申請肖像版權,一般分為某年內可推出多項產品,或只推出單一產品。「以 NBA球員為例,我哋推出 figure前,要畀 NBA嗰邊審批,佢哋 ok咗先可以生產。」


撰文:曾志恒
攝影:彭自維
部分圖片由被訪者提供

全站熱搜

tvb4life 發表在 痞客邦 留言(0) 人氣()