Dream Car

吸金新細牛  Lamborghini Huracan LP610-4

Ads by Google

超級跑車唔同一般汽車,唔可能每 4年就話轉一次款,人哋大拿拿幾百萬買部超跑返嚟,平時都擺多過揸, 5年都行唔到幾千 km就話轉款?
點講都講唔去!
或者因為咁,林寶細牛 Gallardo自 2004年推出至今 10年,經歷多個版本,以 14,022部成為林寶史上最高產量車款。
要入替 Gallardo絕對唔係易事。
車廠多年來不斷開發,終於今日推出新「吸金細牛」 Huracan LP610-4!
雖然唔知係咪另一個 10年嘅開始,但可以肯定, Huracan比 Gallardo
更快、更勁、更高科技。

刀鋒外表

每個人對超級跑車嘅外表都總有一啲偏好,有人鍾情圓渾線條,筆者就鍾意鋒利設計,起晒角咁就最 like!林寶多年嚟嘅出品都係三尖八角,似科幻片嘅車多過真車,但呢個先係煞食之處!最新嘅 Huracan秉承前輩,車身完全搵唔到弧形線條,而且有多處巨形入風口,其中車頭泵把同大牛 Aventador相似。車側下方近尾轆嘅入風口最誇張,由前轆沙板底部已開始成形,到尾轆前向外一拋即成為焦點。雖然 Huracan冇上揭式車門同尾翼,但矚目程度一樣高,而且多咗好多細緻位,如車身多處柵隔以六角形構成,同車廂內嘅陳設襯到絕。
一直以嚟林寶都有以鬥牛名稱為新車命名嘅習俗, Huracan就係以 1879年喺西班牙 Alicante戰鬥時頑強不屈、戰無不勝嘅鬥牛命名。


頭燈內置 Y形指揮燈及細燈,同尾燈有呼應,而且同車身鋒利線條都好襯。 

裙腳位嘅擾流設計極之誇張,比上代 Gallardo激得多,直頭似大佬 Aventador。 

車側可見尾轆貼近車尾,引擎安放喺尾軸之前,重量分佈自然平均。

門邊倒後鏡形狀又係非常誇張凸出,筆者駛過大潭水塘時,最驚整花佢。 

原裝已經用 380mm直徑碳陶瓷迫力碟配 6-pot鮑魚,制動力充足而且線性。 

車尾罕有地冇加上惡形惡相尾翼,而且試車未有用上玻璃尾冚,吸晴度稍遜。

Lamborghini Huracan LP610-4 Spec.

引擎: 5,204c.c. V10
馬力: 610hp/8,250rpm
扭力: 57.1kgm/6,500rpm
傳動: 7前速自動、附+/-模式
懸掛:前、後雙搖臂
制動:前、後碳陶瓷透氣碟
0-100km/h: 3.2秒
車身: 4,459 X 1,924 X 1,165( mm)
車重: 1,422kg
車價:$3,998,000起
查詢: Lamborghini HK( 2900 6666)

戰機車廂

以前有人話 Gallardo車廂充滿 Audi味,好多地方都搵到 Audi甚至 VW嘅共用品。不過到咗 Huracan就洗牌重新設計,最型當然係傾斜嘅中控台上紅色 Engine Start掣,十足戰機發射導彈前需要揭蓋一樣!此外連後波掣都用類似 design,用手指向上一勾就 ok。
Huracan駕駛艙全面放棄使用指針儀表,中控台上嘅油壓、油溫及電池表已改為彩色 mon,更誇係主表板以一幅 12.3吋 TFT液晶顯示板構成,所有行車資訊如速度、轉數、波檔,甚至導航,都喺呢度展示,前所未有咁方便同 hi-tech。 Huracan座位都經精心設計,真皮混合猄皮製成,包承力上佳,而且坐姿極之低矮,高速行車都可以支撐身體。


車廂以戰鬥機為藍本,中控台所有按鈕都傾斜就手,留意首飾櫃位置都用咗六角形裝飾,型! 

Engine Start掣設計得相當搞鬼,十足戰機發射導彈嘅安全掣。 

座位以猄皮配真皮,再縫上顏色線後外觀極之醒神!更難得係乘坐表現好好,包得身體好穩。 

12.3吋屏幕可顯示全車所有資訊,值得一讚係試車時未出現過反光或遲滯,可見呢種技術已相當成熟,會成為日後主流。 

狂爆加速

Huracan現時車重分佈係 42:58,同落場賽車極之接近,加上四驅系統可以隨時改變個別車輪出力,令 Huracan馬步極之穩陣,可以肯定同級後驅對手喺惡劣路面上嘅表現一定有所不及。打頭陣 Huracan係 LP610-4型號,即代表 5.2公升 V10引擎有 610匹馬力,比 Gallardo LP570-4多出 40匹! 0-100km/h只需 3.2秒!能夠有呢個成績,引擎只佔一半功勞,因為另一半功勞係屬於新款嘅 7速 LDF雙極力子波箱。
實際表現反映,引擎爆發力比上代好少少,但都係意料中事,反而新波箱比上代 E-gear快速、進取得多,尤其當行車模式設定到「 SPORT」,波箱轉波速度比「 STRADA」模式快大概 30%,而且一收油就拖定波以高轉 ready你出彎畀油加速,引擎同懸掛都相對地變得更敏感,好似隨時要彈射出去一樣。 Huracan有一點要讚,就係喺舒適性上取得一定進步,「 STRADA」模式嘅喉聲細,而且懸掛柔啲,可以同 McLaren 650S鬥舒適性。


首次將指揮燈掣及高燈掣設於軚盤上,駕駛時可以手不離軚。 

有 3種駕駛模式「 STRADA」、「 SPORT」及「 CORSA」切換,但切換掣放喺軚盤 6點位唔算就手。 

首次用上雙極力子 7速波箱,表現同外表都有驚喜,相信 Gallardo車主最羡慕。

中控台上小屏幕負責顯示油壓、油溫及電量,不過 size比較細,筆者咁好眼都唔係吓吓睇得真。 

車廠重視香港市場
Lamborghini總裁兼首席執行官 Stephan Winkelmann先生



車廠對於今次 Huracan登陸香港非常重視,車廠話事人 Stephan Winkelmann都親自到港主持新車首展。「今日非常榮幸能夠喺香港為全新 Lamborghini Huracan LP610-4揭幕。 Lamborghini憑藉純粹而前衞嘅科技,喺超級跑車行列樹立咗新嘅基準。作為其中一個我哋最重視嘅市場,香港係東南亞地區中,到現時為止 Huracan LP610-4訂單數量最多嘅地
方。我哋對 Huracan喺香港市場嘅表現好有信心。」

Gallardo車主都有興趣

被 Huracan入替嘅 Gallardo玩足 10年,當中推出過多個版本,既然車廠想呢班車主換車,就要聽聽 Gallardo車主嘅用車心得,筆者雖然冇錢買,但都了解到 Gallardo嘅優點同缺點。
Jun擁有 08年 Gallardo Superleggera,當年新車價達$3,500,000,買入原因就係因為佢夠靚!「其實一直都鍾意 Gallardo個款, Superleggera係當時嘅特別版,所以更加值得收藏。雖然馬力只有 530匹,但因為四驅關係,令佢起步比拉利 360或 430更快,濕地安全性更高。另外,值得一讚係 Gallardo嘅車身設計,喺高速下車頭有好好嘅下壓力,我分別試過 Gallardo同 911喺外國揸到超過 250km/h, Gallardo車頭仍然可以緊貼路面,轉彎切線反應一流, 911嘅車頭就會好飄。」
聽得出 Jun玩 Gallardo玩到好盡,除咗優點之外,當然亦都有缺點。「喺慢車嘅時候轉彎會唔夠軚,同一個停車場,可能拉利可以剛剛轉到彎,但 Gallardo就要多一手軚先得。此外,好多 Gallardo車主最唔鍾意就係車內有太多 Audi嘢,中控台同 A3太似嘞,軚盤又同 RS型號共用,但 Gallardo車價 3百幾萬呀!所以我知新款車廂冇乜 Audi嘢係好事,起碼心理上覺得罕有啲。」由於 Gallardo生產周期長,所以易手價好參差,前期型 04、 05年易手價可以低過$1,000,000,而 Jun部 08 Superleggera就因為特別版,可叫價到$1,600,000-$1,700,000。



Gallardo車主 Jun表示 Gallardo嘅四驅系統係最大優勢,而且高速時嘅車身下壓力夠晒強。 

530匹引擎係當時最強版本,連引擎艙內都用碳纖裝飾。

車門內飾板用上大幅碳纖,為車內進一步輕量化。 

上代 Gallardo都係以「 CORSA」為最強行車模式。 

Superleggera車廂經輕量化,連軚盤都包猄皮,方便隨時落場玩。 

賽車猄皮桶座係基本設定,車主可加裝四點安全帶。 

超級對手各有特色

其實唔需要多介紹都知, Huracan面對嘅對手唔會多,只有 Ferrari 458及 McLaren 650S,但 3款車原來都各有特色,買家入手前都要做吓功課先。

王牌作品 Ferrari 458

呢個級別中,以 Ferrari 458最受歡迎,最大原因當然係品牌效應,而且 458採用 4.5公升自然吸氣 V8引擎,馬力都有 570匹,加速時引擎發出震人心弦狂叫聲。採用 7速雙極子波箱,純中置引擎尾驅佈局,彎路表現極之靈活。車價:$3,928,000起

日用超跑 McLaren 650S

McLaren 650S用作入替只推出 2年嘅 MP4-12C,最出位當然係獨家用全碳纖底盤,而且 3.8公升 V8雙 turbo引擎亦都夠晒勁,有 650匹馬力, 3秒就完成 0-100km/h。更難得係 650S舒適性極高,日常上班用都得。車價:$4,378,000


撰文:袁國基
攝影:葉偉豪

tvb4life 發表在 痞客邦 留言(0) 人氣()