呢組「米妮光影頭飾」及「米奇光影畫筆」原來可以配合巡遊花車同步變色,如花車以紅色為主,佢會自己變紅色!($238/光影套裝,連畫筆及頭飾) 

Geek友講場

迪士尼光影匯 彩光照黑夜

Ads by Google

認真唔明萬聖節做乜人人都嘩,傳統明明係小朋友喺夜晚以得意打扮四圍「嚇人」攞糖食,大人細路齊齊開心,點知嚟到香港就 fusion七月十四、搵鬼嚇自己!
今年香港萬聖節終於唔只得鬼屋,香港迪士尼樂園為你帶嚟全新「迪士尼光影匯」,取代以前嘅花車巡遊!光影匯前後創作超過兩年,有 7組全新主題花車,共超過 80名演藝人員、 74萬粒 LED燈、 25種光影效果,配合音樂及舞蹈,整個光影匯接近 20分鐘冇冷場,入黑後成個樂園閃爆燈,最重要係唔使排隊、不另收費,霸個靚位、一家大細齊齊睇!

迪士尼光影匯


怪獸公司用番故事入面嘅時空門做主題,門內的 LED燈有好多變化,呢度唔穿橋,畀啲驚喜大家。 

日期: 10月 1日起至 12月
地點:迪士尼美國小鎮大街
查詢:香港迪士尼樂園( 3550 3369)

閃爆花車巡遊

「迪士尼光影匯」 7組創意主題花車由奇妙仙子領航、繼有怪獸公司、反斗車王、小魚仙、貝兒公主、反斗奇兵、米奇及好朋友花車隊伍,每隊都有自己特色,如大相中嘅小魚仙隊,就以艾利奧公主及一班海底生物做主角,燈光以海水藍為主。而反斗車王隊除改為紅色作基調,更有令人聯想到賽車場的閃爍燈光, LED燈閃到爆,夜麻麻戴黑超都冇人敢笑你!據知迪士尼設計「光影匯」時已準備好聖誕版本,年尾會配合「雪亮聖誕」改變演出,唔知到時聖誕樹會唔會一樣閃爆呢?


識睇一定要睇閃電王麥坤,因為佢從未出現過喺香港迪士尼花車巡遊。睇真連車底都有滲光,型棍。 

貝兒公主玩浪漫 feel,一出就唱情歌,之後燭光隊伍更會現場跳舞,至於公主就响巨型燭台上,設計都好靚呀! 

《 FACE》啱啱搞完 Bubble Cup大專泡泡盃, Bubble Soccer都係光影道具之一,夠潮,入面仲裝晒 LED燈,但千祈唔好忍唔住撞埋去呀! 

米奇車隊就有晒高飛、唐老鴨等成員,不過最勁都係米奇,咁多架車之中以佢企得最高,身份係唔同! 

光影再續 黑色世界

玩完全新「光影匯」,原有「黑色世界」鬼屋一樣會有,先睇最新影相位,於城堡前面一個米奇形嘅燈飾,點影都靚。影完唔夠喉,一眾換上新衫嘅迪士尼動畫人物仍會隨時現身,你更可配合佢哋化個靚妝,齊齊扮化妝舞會主題。必睇嘅就有原野劇場全新節目「亞馬遜驚魂」,有專業演員陳國邦做主角大戰黑暗勢力,節目夠唔夠多?最驚你玩唔晒咋!





米奇,好似你咁出色嘅老鼠,咪以為化咗妝就認你唔出啦,冇用㗎! 

米奇同一眾迪士尼朋友已換上幻想世界面具舞會新裝,出現於夜幕低垂後嘅「夢想花園」,要影齊都唔易呀! 

陳國邦大戰女巫

原野劇情新節目「亞馬遜驚魂」,講述曾遊歷亞馬遜森林 Voodoo島嘅探險家 Jonas Brisbane嘅冒險經歷,呢個角色更搵嚟大台出名好戲嘅陳國邦演出,演技唔使多講亦幾有 gimmick。最終佢會响劇場度意外釋放出神秘女巫妖怪,仲同佢有一場對抗,加埋現場聲效同光影佈局,都算值得一睇。


陳國邦做呢個角色都幾有型,少少似《奪寶奇兵》鍾博士。 

劇情唔詳細講否則冇驚喜,高潮戲碼都可以穿少少,就係佢無啦啦解開咗呢個不死女巫嘅封印,搞到自己身陷險境。 

女巫就會化身成巨大形態,非常誇張,最終女巫定係探險家羸呢?唔話你知啦!

化萬聖妝


揀好圖案後就會有專人一對一幫你畫,所用顏料都係易洗嘅,少少水加少少力,其實已可抹乾淨。 

唔化妝算咩萬聖節,全新期間限定攤位「明日世界化粧間」一定要去,有近 20個閃爍新妝及噴畫紋身可以玩,閃爍新妝主要係畫塊面,而噴畫紋身就係噴手, model一陣仲要影相,用隻手畫隻大眼仔上去算囉。($90/過程約需 15分鐘)

必掃全新萬聖節禮品

入得迪士尼,買埋主題精品是常識,亦係必做嘅正經嘢。今年全新萬聖節禮品唔係十分多,不過淨係新造型嘅米奇同米妮 12"公仔已經要買一套,加埋近期人氣急升嘅熊仔 Duffy(其實佢係米奇隻公仔)都有新產品,影相時部份 Duffy禮品已經賣晒要等補貨,所以 fans們真係要快啲搶!



大熱手機殼有齊 iPhone及主流大芒 Android機版本,實揀得中!(各$248) 

至於呢個髮夾就更適合女孩子,南瓜版米奇已經夠爆,原來上面更滿佈點點夜光,入黑後夠搶眼,又要買!($88) 

迪士尼 fans實識 Duffy,佢原本只係日本迪士尼限定角色,後來因太受歡迎而反攻全世界,呢隻萬聖節版暫時仍有得買!($168) 

同場加映:光影匯餐飲

掃完貨唔爭在食埋飯,主題特飲唔少得,今年因為兩個主題同時舉行,因此「黑色世界」外更新增咗「光影匯」主題餐飲,同時亦有飽肚中餐,價錢仲唔算太貴添!


光影仙子(左/$68)及光影魔法(右/$52)同樣於「大街餐廳」有售,味道都係甜甜哋易入口,天時暑熱靠佢救命! 

「廣場飯店」就有呢個光影套餐,三餸一湯仲有埋特飲、甜品同埋炒飯,唔怕食唔飽!(每位$298) 

猛鬼凶宅 驚到你返屋企

怕辣自然係揀原味唔辣嘅迪士尼光影匯,但如果你好抵得辣,係都要自己嚇自己,推介你去樂富廣場全新鬼屋!今年主題相當兇猛,係以亞洲十大猛鬼地之一:以馬來西亞「凶宅」 Villa Nabila做設計藍本!入面每間房都隱藏著一個凶靈傳說,加埋仿如電影感嘅燈光聲效同埋秘密機關,強烈嘅壓迫恐懼感,令你真係以為自己去咗「凶宅」現場,見證住一幕幕血腥場面,驚到你大叫:「阿媽,好驚呀。」喊住要返屋企!

尖叫位 1 前廳

帶住膽生毛嘅心態入到嚟猛鬼凶宅,一行入去你已經 feel到陰風陣陣,抬頭一望,就即刻見到有具怨氣十足的女屍吊喺你面前!當你想縮,幽靈即刻喺你後面彈出嚟!

尖叫位 2 書房

眼前書櫃林立,完全阻住哂你嘅視線,隱約見到一盞搖曳嘅書枱燈。當你好好奇去睇真啲之際,兩隻書房幽靈就飆出嚟,大手分隔你同你嘅朋友,逼住要你單人匹馬獨闖凶宅!

尖叫位 3 琴室

淨番你一個入到呢間樂曲淒怨嘅琴室,你覺得首歌好難聽,越聽越煩躁,越躁就越驚!你要走喇,你要跑!點知,彈呢首歌彈到失心瘋嘅女主人唔肯畀你走,逼你聽佢繼續彈!繼續彈呀!

尖叫位 4 浴室

救命呀!你發咗癲咁喺間凶宅入面四圍跑,只想搵個地方匿埋!突然,「俾番隻左眼我∼俾番隻左眼我!」你聽到一把哀怨又痛苦嘅慘叫聲,下意識即刻掩住你嘅左眼!但係,已經嚟唔切喇!以為左眼見到鬼,自挖眼珠而死嘅幽靈扯開你雙手,準備要你補償返俾佢呀!點算好?!



呢隻幽靈坐定定唔郁,旁邊仲有隻「床單鬼」,究竟邊個會彈出嚟嚇你呢? 

尖叫位 5 嬰兒房

連場博鬥之後,你只想快啲逃離凶宅,奈何離開之前你一定要經過埋淨低嘅房。你冇辦法喇,話畀自己知唯有死衝啦!點知衝下衝下,竟然衝到入嚟嬰兒房!你今次死梗喇,女主人最心愛嘅 BB死咗,佢要搵你代替佢 BB呀!

尖叫位 6 廚房

點解呢間別墅咁出名,你有冇細心諗過呢?就係因為嚟親呢度嘅人都冇人生還!所有探靈者都會畀食人屠夫活捉生劏,連同其他人一齊成為佢餐桌上嘅美味甜點。無!一!倖!免!

有 app玩

樂富鬼屋仲有專用 app「猛鬼別墅@樂富廣場」,加入捉鬼兵團搜捕幽靈之餘,成功逃離別墅並於 fb即時 Upload探險相,仲可獲贈神秘禮物一份!

有遊戲玩

同場仲有「瘋狂嘉年華」,只需喺樂富廣場消費滿$200,憑 2張即日機印發票,即可換領「瘋狂嘉年華」遊戲劵 2張,仲有機會贏取豐富禮品。

樂富廣場猛鬼別墅

日期: 9月 19日至 10月 31日(逢星期五至日及公衆假期)
地點:樂富廣場 A區美食坊(港鐵樂富站 A出口)
時間: 5:00pm- 10:00pm
參加方法:於領匯旗下 10個指定商場消費滿$300,憑 2張同 1商場之即日機印發票,即可換領「鬼咁快套票」 1套,率先以「特快優先通道」進入猛鬼別墅。
套票包括:特快門票 2張、瘋狂嘉年華遊戲劵 2張及鬼馬眼鏡 1副(限量 8,000副,換完即止)

自殺凶宅 Villa Nabila


位於馬來西亞新山麗都海邊附近嘅凶宅 

位於馬來西亞新山麗都海邊附近嘅凶宅 Villa Nabila,由於咁多年嚟都掩蓋喺樹林入面,極之詭秘。坊間就流傳咗多個鬼故版本,唱得最行嘅就係廿幾年前,有個姓葉嘅拿督因欠債破產,攬住成家人集體自殺,怨氣沖天。任何人入內都會被寃魂害死,有入冇出。


撰文:熊俊彥、陳可兒
攝影:傅新發、彭自維
Model: Chee@Portamento People、 Blaire@Unique Model

tvb4life 發表在 痞客邦 留言(0) 人氣()