西區

娃!娃!娃!嚇到嚟!

Ads by Google

雖然距離萬聖節仲有成個半月先到,但等到 10月頭將有鬼片搶閘出籠挑戰鬼迷膽量!
被譽為 2014最恐怖鬼片的《詭娃安娜貝爾》( Annabelle),由《恐懼鬥室》的澳洲籍馬來西亞華人導演溫子仁( James Wan)擔任監製,驚嚇度應該有保證;今次仲用咗上集《詭屋驚凶實錄》內的邪靈公仔安娜貝爾孭飛玩鬼上身,大玩娃鬼回魂。聽講安娜貝爾原來真有其娃,而且恐怖到連捉鬼專家都唔敢正面望佢。

《詭娃安娜貝爾》

上映日期: 10月 1日


呢隻邪惡鬼娃安娜貝爾,於上年的名片《詭屋驚凶實錄》已經出場。雙眼猙獰,目露凶光嘅安娜貝爾今年做埋主角,於《詭娃安娜貝爾》中再害人。 

話明係恐怖片,當然唔少得女鬼突然撲出鏡頭嚇人場面。呢個攬住安娜貝爾鬼娃嘅女鬼,外形唔算恐怖,但兇惡。 

《詭娃安娜貝爾》其實係《詭屋驚凶實錄》前傳,講一個普通嘅復古公仔,本來只係老公送畀老婆( Annabelle Wallis飾)嘅禮物,點知有班魔鬼信徒入侵,將邪靈附於公仔身上,之後開始為禍人間。片中, Annabelle Wallis飾演嘅大肚婆慘被邪靈騷擾,無端端喺廚房被鬼掹腳致倒地,仲被拖拉虐打,非常凶殘。

1.今次《詭娃安娜貝爾》班底有幾猛料先?


鬼片王溫子仁,導演過《恐懼鬥室》、《兒凶》及《詭屋驚凶實錄》,全部勁驚,今次喺《詭娃安娜貝爾》變咗做監製,升咗呢! 

拍恐怖片幕後班底好重要,《詭娃安娜貝爾》就由《恐懼鬥室》系列導演溫子仁炮製,但今次拍《詭娃》已升呢做監製。而且原本喺《詭屋》做攝影師的 John Leonetti亦一樣升職變做導演,兩兄弟再次夾手夾腳嚇鬼,唔少影評都睇好《詭娃》成本年度最爆鬼片。

2.點解要搵公仔做主角?


58歲嘅 John Leonetti,一直做開恐怖片攝影師,代表作有《兒凶》同《詭屋驚凶實錄》,但今次《詭娃安娜貝爾》升格做導演,兼且揸埋機拍攝,請着佢真係有着數。 

導演 John Leonetti解釋,事關上年嘅《詭屋驚凶實錄》已用間鬼屋做主線,如果今次再講間屋點樣恐怖,會好重複。於是諗到用另一個角度,用《詭屋》中經常出現嘅鬼娃安娜貝爾做主線,而且好多人睇過《詭屋》都覺得安爾個樣好邪惡,見到佢都驚,所以覺得呢個鬼娃會嚇到唔少觀眾。

3.拍攝期間有沒有靈異事件發生?

今次於《詭娃》中擔任女主角,是今年 29歲的英國女演員 Annabelle Wallis(同娃鬼主角 Annabelle真係同名),戲中飾演大肚婆的她,不斷被鬼娃安娜貝爾纏擾。一向自稱大膽的 Annabelle拍攝前一直覺得只是拍戲,加上拍攝現場又多人,一啲都唔驚,點知有次望住個鬼娃時,竟見到個鬼娃對住佢眨眼,嚇到佢毛管,最後導演嗌 cut, Annabelle即走去人群中壯膽定驚。


飾演大肚婆米亞嘅 Annabelle Wallis,係英國演員,雖然演技唔算出眾,但身高 5呎 7吋嘅 Annabelle,擁有 34D導彈身材,絕對索得起。 

真有鬼娃

唔好以為安娜貝爾係電影虛構出來的公仔,其實是真有其娃,真實的安娜貝爾公仔因太邪惡,一直被鎖在康勒迪格州的靈異博物館內。好多人以為安娜貝爾被上鎖便一了百了,傳聞一次有參觀人士去到博物館時,竟唔怕死指住它說:「唔係嘛,我唔信佢(安娜貝爾)有咁大威力囉。」點知該參觀人士騎電單車離開後 3小時,竟撞樹身亡。唔知係巧合,定安娜貝爾邪靈發功?


真實版安娜貝爾公仔,雖然外貌同普通公仔冇乜分別,但因太邪惡,所以被鎖在靈異博物館一個鐵箱內。 

就算擁有多年捉鬼經驗嘅捉鬼專家華倫太太,都話每次接觸安娜貝爾鬼娃,都覺得毛管戙,所以唔敢望佢。 

真實版安娜貝爾公仔出名邪,連台灣中天電視台都開個特輯講安娜貝爾邪惡史,惡名遠播。

撰文:何家文

tvb4life 發表在 痞客邦 留言(0) 人氣()