寵物家

煲呔唐狗

Ads by Google

「沒女」沒問題,只要搵個 stylist幫幫手,執番個樣,換過套衫,就似重生一樣。
人類喜歡以貌取人,同樣會以貌取狗,大隻、黑色、非名種、唔夠靚仔,小朋友一見就喊。點好?狗主 Iris就諗到為狗狗打條 DIY煲呔仔,途人態度即刻大轉變。真係現實!

狗靠衣裝

開始這門煲呔生意, Iris只是無心插柳,「我領養咗三隻唐狗,佢哋大大隻,出親街都俾人歧視,話佢哋惡會咬人,其實佢哋連吠都無吠一聲。之後我就整啲得意飾物俾佢哋戴,啲途人一見佢哋就話好得意好可愛,仲摸佢哋。」不少飼養大狗如雪橇、狼狗的朋友都向 Iris訂購飾物,於是 Iris連同拍檔 Pat密密做,更到 PMQ夜市擺檔,愈來愈多人認識。更意想不到是連動物團體也找她們幫手,「義工想為唐狗戴煲呔,因為戴了煲呔,個個都大讚狗狗可愛,吸引度和領養機會都大大增加。不是名種,平日很難找到人領養的。」唔只狗狗,就連貓貓、浣熊對煲呔都有興趣。


阿 Pat為狗狗戴上煲呔,狗狗即刻 cute咗。 

售價$200-$220除了煲呔,還有三角圍巾、毛毛球頸鏈,同樣超輕身。 

早前漁農自然護理署印製「有關危險狗隻規例的知識」宣傳單張,就用了溫馴的雪橇狗來做封面,立即惹起公憤。喺呢個現實世界,都係打番條煲呔啦。

物料輕貓都啱

由於市面上的寵物頸飾,一般只有細尺碼,大煲呔格外受歡迎,連外國人都訂購。「初時是做設計的朋友送來布碎,但我哋想供貨穩定,所以會喺外國、日本訂購布料,質料較好,而帶釦就喺香港買。開業至今都試過好多物料,例如頸帶用過全皮,但發覺太重,而家轉用粗絨毛,再自己裁剪,輕得來又有韌度唔易扯斷。原本的設計好普通,後來就參考一下人用的煲呔款式,例如蝴蝶結的打法和襯色,愈做就愈誇張,因為啲主人話要大個啲影相先好睇。」 Iris除了會以衣車縫製煲呔外,也多用熱溶膠水,令煲呔更紮實。唔只貓狗鍾意煲呔,連人都對煲呔有興趣,「試過有客人買咗十條,佢話唔加噹噹,結婚時俾兄弟團戴。」


浣熊戴上真係好似卡通人物,小朋友又戴。 


好多貓貓一套上頸繩都會硬晒軚,不過貓貓對煲呔幾受落,可能因為夠輕身,恍如無物。

自己做煲呔

想自己做一條煲呔俾寵物其實不難, Iris和 Pat亦樂意分享技巧。做法雖然唔複雜,但仔細位要做得靚,時間就唔慳得,例如用熱溶膠來黏貼,最好要等半小時待乾透,不然好快散開。另外貓貓或比狗敏感,普遍不喜歡噹噹,建議主人不要附加。顏色配搭隨意,但托底的絲帶最好挺身一點,煲呔形狀才突出。


工具材料:絲帶、薄絨布、厚絨布條(作帶釦)、線、熱溶槍、製皮工具鎚、鉸剪 

step 1裁好絲帶和薄絨布,薄絨布用格仔絲帶包好,然後用衣車縫好。 


step 2將藍、紅絲帶放在格仔絲帶上,摺出蝴蝶結形狀,然後用線紮好。 


step 3在厚絨布條上釘孔,穿上帶釦。

step 4將厚絨帶釦用熱溶膠貼在紮線位下,再以絨布紮好,最後以熱溶膠貼上徽章。 


煲呔查詢: http://www.facebook.com/wowcollar

唐狗又有咩好怕?

上星期有流浪唐狗誤闖港鐵站路軌,最後被一列直通火車輾斃。如果該狗狗是一頭貴婦犬、哥基等名種狗,下場會否沒有這麼悲慘?
近年來香港不同動物團體如非牟利獸醫服務協會( NPV)、 9狗街坊、唐狗會等已大力為唐狗宣傳正面形象,舉辦不少講座、領養日及探訪活動,教育市民,唐狗性格溫馴,只要加上適當訓練,同樣可以乖乖聽話,甚至可通過考試當動物醫生。其中唐狗會還組織一隊唐狗大使,狗狗需經過考核如任摸唔嬲、見到陌生人或狗不會吠撲、懂得聽從主人指示等,唐狗大使更會定期到學校或老人院探訪,氹人開心。希望大家更加接受唐狗。


撰文:吳韻菁
攝影:譚俊軒

全站熱搜

tvb4life 發表在 痞客邦 留言(0) 人氣()