遇見恐龍故事:這個 center piece乃客人訂製,「客人好鍾意恐龍同仙人掌,所以我哋今次冇用青苔,用仙人掌配合。呢個係探索嘅主題,我哋加咗探險家同恐龍嘅互動場景,人仔攀緊山見到有恐龍!」售$2,000 

創業通

小花園中的故事

Ads by Google

一個個不同大小形狀的玻璃瓶內,滿載着一段段美麗的故事。 80後夫妻檔 Calvin與 Karen,喜歡藝術及園藝,並於 11年引入苔蘚密封盆栽,利用光合作用原理,植物可以維持自己的生態系統,十分方便打理。他們更為客人度身訂造,於各盆栽中加入公仔及裝飾,種出每個獨一無二的故事!

 

Calvin與 Karen製作的密封盆栽內,放了不少小配件,仿如打造了一個微小的花園,原來每個小花園也代表着一個小故事。
「我哋嘅主題有婚禮、家庭及童話故事等,適合唔同年紀嘅客人。連《進擊的巨人》、《 one piece》等動漫主題都好受歡迎!」每個直徑約 10cm長的密封盆栽,售價由$400起。他們亦會接婚宴回禮禮物的生意,直徑約 2cm長的小型密封盆栽,最少訂 100個,售價$3,000起。
Calvin與 Karen於加拿大修讀設計科目,之後在香港認識。他們的家人很喜歡種植,故 2人自小已經常接觸植物。 08年回港後, Calvin表示平日會於公司放置小盆栽,「好多都好快種死,於是上網睇吓有咩植物易打埋又耐種啲,畀我喺外國網站發現『 terrarium』,即喺個密封玻璃瓶入面種植。」當時香港不常見,他們便於外國訂購所需植物及材料回來,嘗試自己製作。

分享作品

Karen坦言,起初只為興趣,並沒有創業的念頭,「訂咗返嚟試吓種,之後發現一堆草有啲寡, Calvin好鍾意 figure公仔,就睇吓手頭上有咩公仔啱 size,放入去擺吓,覺得個視覺效果都幾好喎!好想同人分享我哋嘅作品。」他們於 facebook開了專頁,並定期上載不同的盆栽設計作分享交流之用。
不少朋友及同事都覺得他們的作品很有趣,「 10年,開始有朋友搵我哋幫佢哋整,而我哋嘅手工亦開始有水準,於是應邀喺朋友嘅婚禮上整咗一個 center piece,直徑有成 30cm長,都幾大型㗎!」最初他們只接朋友的訂單,直至 11年, 2人成立 Puff Terrariums,以兼職性質接街客生意。


進擊的巨人故事: Calvin很喜歡看動畫,亦希望將動畫元素帶入設計當中,「我都試咗好多次先整到呢個巨人膠公仔,因為比其他公仔大型少少,啲膠有時唔夠硬,要放去雪櫃雪硬佢。《進擊的巨人》嘅場景都幾受歡迎!」售$780 

我愛熱氣球故事: Karen自言很喜歡熱氣球,亦希望有機會能乘坐,「我用咗燈膽做熱氣球,然後上色,再整埋啲人仔,希望自己終有一日有機會試!」售$1,680 

非洲冒險故事:主題講述去非洲草原冒險,「整咗一個着探險家衫嘅公仔,然後喺草原上同大象交流。」售$630 

星球大戰故事:根據童話及電影所做的場景特別受歡迎,而星球大戰是 Calvin喜歡的電影之一,「有啲公仔喺外國網站訂,有啲會自己整,呢個場景內所有激光劍都係我自己整㗎!」售$1,180 

要先溝通

由於以故事形式作賣點,故他們需先與客人溝通,「了解客人想要咩類型故事及各種裝飾上細節。」面對客人的奇特要求,他們視之為挑戰而感到很有趣, Calvin表示:「有客人問可唔可以整潛水員,我就諗青苔似草地,點先似水呢?我就試用藍色沙做河,最近仲用藍色矽膠整埋沙灘,效果都唔錯!好多時客人嘅要求都啓發到我哋!」

香港代表

12年,因得知外國團體 Esty每年 6月都會舉辦全球手作日,不同國家的代表在同一日內進行手作活動, Calvin與 Karen決定申請為香港的代表。「我哋成功申請,然後當日喺上環搞咗第一個密封盆栽製作班!」反應不俗,更有不少機構聯絡他們開設興趣班,「好似新奇士及 Nikon都有搵我哋合作。」


Billy客人有次喺愉景灣見到佢哋擺攤檔,覺得可以放公仔入去盆栽入面好得意!我仲加埋我自己隻恐龍公仔入去!我放咗係床頭,一定會好好照顧呢個恐龍植物! 

 

他們設有網站,另外主要在 facebook、 instagram、 Twitter、微博等網上媒介宣傳。「 instagram主要吸引學生客; Twitter就方便外國客人。試過有一位馬來西亞客人,上網睇過我哋嘅作品,專誠買機票 book酒店,飛過嚟香港搵我哋學咗 1堂。佢話好支持我哋,真係好感動!」


12年起,他們除了營運網上商店,亦參與了手作市集,接觸不同的客人。圖為去年 5月,他們於愉景灣手作市集擺檔。 

他們曾與新奇士公司合作,「我哋會整番啲小飲品公仔放喺盆栽入面,配合品牌同主題。」 

淡季有計


不少機構及活動都會找他們合作,圖為 1月於銅鑼灣的街頭展覽,「一開始都覺得幾有難度,唔知點先可以放喺柱上,唔通要成個玻璃樽綁上去!最後就用咗膠箱去解決。」 

現時平均每個月有 20張單, Calvin與 Karen表示聖誕節及情人節等節日的訂單會多 30%,「好好彩!每逢 3、 4、 9、 10月嘅淡季,就會有品牌活動或公司搵我哋教班或展覽。」除接訂單外,他們現還會教班,客人由 5至 6歲小朋友至 50歲的叔叔都有,「搞班會唔定時,唔單止女仔,都有男仔嚟上堂。」
最初開業時, Calvin與 Karen亦面對過不少困難。「好多嘢都要撞過板先識,好似香港天氣熱同潮濕,唔適合用泥種青苔,容易滋生蚊蟲,所以我哋試用菌類去培植,點知都係太潮濕,成盆生晒蟲,真係好恐怖!𠵱家會喺外國網站訂購。」
另外,由於製作密封盆栽的工序不複雜,故跟風的人亦很多,「俾人抄梗係嬲啦!但我哋都知阻止唔到,惟有改變自己嘅心態,做得好先會有人抄啫。公平競爭下,我哋一定會努力做好啲!」他倆希望將來可擁有實體鋪,努力做好自己的品牌。

種植青苔要留意!

密封盆栽容易打理,一般密封的環境下可保存 2至 3年,雖不用淋水打理,但亦需注意濕度與溫度。 Calvin表示:「如果見玻璃樽入面有水氣同水珠,可以打開個蓋等佢蒸發。千祈唔好直接曬太陽,青苔要放喺陰涼位置先生長得好。」
另外,由於香港偏向濕熱,故不適合用泥土種植青苔, Karen說:「我哋會用氣泡石及植物用炭放喺玻璃樽內種青苔,可以提供空氣亦有淨化作用,維持到密封盆栽嘅生態系統。」

密封盆栽即場砌

 


1. Karen表示一般簡單的製作,需時約半至 1小時。材料分別為石春、乾青苔、植物用炭、氣泡石、青苔及飾物公仔。 

2.密封盆栽主要分 5層製作,最底層先放一層薄薄的石春,然後在上放乾青苔,「乾青苔可用水噴濕,作為隔水層。」 

3.然後在中間放植物用炭,以淨化生態系統,接着,在平面上加上氣泡石,「氣泡石嘅多少可以就想做嘅地形而調整,如果想做山,就要放多啲石。」

4.青苔屬於無根植物,故綠色以下的部分可以剪去。 

5.做好底層部分,便可按瓶子大小而放入青苔塊。 

6.最後,加上不同的裝飾。 

完成$550 

開業成本

租金:$0(home office)
工具:$20,000
材料:$30,000
總投資:$50,000

每月收支

租金:$0
人工:$5,000(兩位老闆)
入貨及雜費:$9,500
網站營運:$500
營業額:$35,000
盈利:$20,000

 

Puff Terrariums
電話: 9743 8887
網站: http://www.puffterrariums.com 


撰文:霍芷晴 
攝影:傅新發
部分相片由被訪者提供

tvb4life 發表在 痞客邦 留言(0) 人氣()