專題 Log In

Show Off登場  M-Benz GLA 250 4MATIC

Ads by Google

小型 SUV席捲全球,日本、德國,甚至美國車廠都有加入戰團,唯獨 M-Benz比較冷淡,只喺 2009年搞過一款冇右軚版嘅 GLK。為咗急起直追失去嘅市場,廠方終於喺今年推出比 GLK更細部嘅 GLA!而代理亦都唔怠慢即時引入,而且連同廠方嘅專業駕駛導師一齊登場,帶來一系列高難度設計場景,務求一次過 show off GLA!等全香港知道 GLA唔係得個樣,仲可以應付惡劣地形,係一部真真正正 SUV。

 

M-Benz GLA 250 4MATIC Spec.•引擎: 1,991c.c.直四 turbo•馬力: 211hp/5,500rpm
•扭力: 35.7kgm/1,200-4,000rpm•傳動: 7前速自動、附+/-模式
•懸掛:前支柱式、後多連桿•制動:前、後透氣碟•車身: 4,417× 1,804× 1,494( mm)
•車重: 1,505kg• 0-100km/h: 7.1秒•耗油: 6.5L/ 100km•車價:$509,000起
•查詢:仁孚行( 2895 7339)

越野仕樣

香港人鍾意 SUV,但大 size又貴又食油,所以小型 SUV一直好有市場, Audi Q3及 BMW X1可以話係表表者。由於 GLK一直冇右軚,所以 M-Benz甚至連中型 SUV都冇,想玩 M-Benz SUV只有碩大 ML或 GL。 GLA嘅出現其實好重要,可以話係 M-Benz打入小型 SUV市場嘅槍頭,只許成功,不許失敗。
有人話 GLA同 A-Class好似樣,根本就係簡單升高部 A-Class了事。事實上 GLA嘅底盤來自 A-Class,亦同 CLA一樣,車身設計係由 A-Class改良過嚟,保留 A-Class嘅頭、尾燈設計,而泵把、包圍等,就改用較有肌肉感款式,令車身尺碼比 A-Class分別長 125mm、闊 24mm、高 61mm。此外, GLA嘅車身離地距達到 134mm,比 A-Class高 41mm,直接令到 GLA前入角及後出角分別有 15.8°及 21.5°,自然有更強越野能力。


為咗加強 GLA嘅越野味, GLA 200及 GLA 250車尾泵把底部都裝咗銀色裝飾,相信亦可以當成防撞底板使用,保護排氣喉尾鼓,免被崎嶇路面撞爛。 

GLA 250 4MATIC可選配 AMG Package,升級使用鑽孔迫力碟、大鮑魚、 20吋軨,同埋碳纖裙腳,令外表一下子跑車化,仲惡過 A250。 

同級強敵

其實 M-Benz嘅對手 Audi Q3同 BMW X1一早已經玩小型 SUV,足足比 GLA早兩年,而且設備、定位一啲都唔弱,吸引到好多未玩過 SUV嘅人入手。

 

全面四驅 Audi Q3
Audi最出名就係 quattro四驅,就算最細部嘅 Q3,所有版本都係四驅!如果要同 GLA 250 4MATIC比較,一定係 211匹、 2.0 TFSI版本,用上 7速波箱, 0-100km/h只需 6.9秒,車價由$489,800起。

倒模車廂

GLA以 A-Class做藍本,外表改完之後都有影子,車廂就更加係餅印一樣!如果合埋眼入車廂,坐好之後張開雙眼,根本分唔到係 GLA定 A-Class。乘坐感方面, GLA因為車身較高,視野會比較廣闊一啲,空間同 A-Class極之接近,後座腳位稍窄,如加上雙天窗,會令空間感稍為改善。為加強載物能力,後座背可以有 15度調校,令尾廂由 421L增至 481,如果摺埋後座,更加有 1,235L。


車廂以 A-Class為藍本,中控台嘅 7吋 mon仍然唔可以收埋。而中控台嘅裝飾用料就有大量選擇,木料、金屬、碳纖都有,營造出唔同氣氛。 

7速波箱係基本設定,表現緊密又順,如果係 GLA 45 AMG就會將波棍設於中控台之下,其餘版本清一色軚波。 

2.0公升 turbo引擎有 211匹馬力, 1,200rpm已有 35.7kgm扭力,令低速爬坡有更好表現。廠方表示 GLA 250 4MATIC 0-100km/h只需 7.1秒,比前驅 A250慢 0.5秒,相信係因為車身重咗 60kg,多咗四驅系統都補唔番。

表板設計簡潔,中間顯示屏可顯示多項行車數據,但筆者嫌速度表太多字,如字數減半會更加易讀。 

後座空間高度 971mm,只比 A-Class高 19mm,但可以 60: 40摺疊嘅座椅背加入 15度角度調校,令坐姿及尾廂空間都多一個選擇。 

AMG Package前座由猄皮同牛皮混合製成,再以紅線縫合,樣靚之餘仲有好好承托力。此外唔只坐姿較 A-Class高,實際空間高度都達到 1,015mm,比 A-Class高 38mm。

四驅有料

今次 GLA大軍來港,一次過引入前驅 GLA 200及 GLA 250,四驅系統只會出現喺 GLA 250 4MATIC及 GLA 45 AMG 4MATIC。今次廠方設定嘅場地,根本只有四驅版先玩得掂,所以試車清一色 GLA 250 4MATIC,採用同 A250一樣嘅 1,991c.c.直四 turbo引擎,輸出 211匹馬力及 35.7kgm扭力。唔同嘅係 A-Class得頂級 A45 AMG先有嘅 4MATIC四驅系統,喺 GLA 250中級型號已經有,而且設定同 A45 AMG以 on-road激劈為目標唔同,越野能力都高啲,雖然唔可以好似 G-Class咁威可以 lock,但電子四驅一樣夠做。

 

操控為樂 BMW X1
GLA推出前, BMW X1就係最低重心嘅 SUV,車身高度只有 4,454mm,加上四驅系統以尾驅為主,行車動態明顯更生動。採用 184匹、 2.0公升 turbo引擎,車價比 GLA 250 4MATIC平一截,$425,000起。

 

 


4MATIC四驅系統可以自動分佈四輪輸出,而且配合 DSR下坡速度控制系統,令到行走 off-road有更好表現。 

GLA 250 4MATIC配有 DSR下坡速度控制系統,開啟後行車電腦會自動控制波箱及引擎輸出,以 engine brake效果拖慢部車落斜,唔會吓吓鎖死輪胎。走上搖搖板到中間位時停車,開啟 DSR系統,就會以極慢車速下行,搖搖板落下部車都未行到地面,可想而知 DSR系統可以拖到部車幾慢。 

面對左右唔平衡嘅路面, GLA嘅四驅系統同高離地距就發揮作用,就算出現單轆兀起,都可以若無其事前行。 

單邊車身上斜台都唔係問題,主要係試到 GLA懸空一個轆時嘅行車表現,同埋低重心帶嚟平穩行車嘅好處。 

老外高手教飛

今次活動除咗新 GLA係主菜外,車廠仲專程由德國請一班駕駛高手教路,喺場內 set咗多個唔同區域試盡 M-Benz新車各項設備,每一個測試都用盡部車,平日絕少機會試得到。

 

硬膠甩尾
平時試車冇可能試到甩尾,就算喺賽車場試車,都好難用低速安全甩尾。其中一個測試環節就係為唔同車裝上硬膠尾轆套,然後試車上嘅 ESP車身穩定系統。筆者發覺 ESP Off可以輕易原地甩尾,大油啲都甩到失控!如 ESP On,電腦會自動 cut油門,想甩都難!此外,筆者發覺 E及 S-Class車身大,車尾容易甩亦容易救,最難搞係前驅 A-Class,甩起上嚟極難救,亦做唔到橫滑出彎動作。

 

S-Class車身又長又重,一出彎畀油就可以橫行滑出,對手真係冇得閒過,全程不斷要用反手軚調節車頭指向。

 

套上硬膠尾轆就好似踩咗上雪地一樣,直路大油又不斷打滑,主要用嚟訓練車手嘅應變能力同反應,係現時好流行嘅安全駕駛訓練項目。

 

緊急剎車
人唔到最危急都唔會試最強迫力,為咗令駕駛者知道 M-Benz嘅迫力系統有幾勁,特設緊急剎車訓練。以巨型 ML盡油衝直路,雪糕筒前大約 60km/h時 hard brake至出 ABS,筆者發覺原來剎車距離出乎意料地短。再嚟就係一面 hard brake,一面扭軚避雪糕筒,呢個訓練係等學員明白 ABS唔係只幫手縮短剎車距離,更幫助剎車時靈活轉向。

 

綜合繞圈
經過甩尾同剎車訓練,最後就係綜合式走圈訓練,包含直路加速、連續急彎及急剎。筆者試過用 E-Class、 C-Class及 A-Class試圈,發覺呢類小賽道揸 A-Class最好,入彎靈活而且易於掌握。


撰文:袁國基
攝影:葉偉豪

tvb4life 發表在 痞客邦 留言(0) 人氣()