車頭燈用咗 3層式布局,上層係細燈同指揮燈,中層係大燈,而下層就係霧燈。有人話呢個 design令車頭好鬼祟,但事實係令 Cherokee外表更引人注目。 

新車激試

入門都勁爬得  Jeep Cherokee

Ads by Google

個個開口埋口都以「 Jeep」作為越野車統稱,可想而知 Jeep呢個美國品牌喺越野車界別上有幾崇高地位。其實 Jeep除咗有硬橋硬馬嘅 Wrangler之外,仲有以休閒為主嘅 SUV—— Cherokee。全新 Cherokee剛剛到港,同去年推出嘅 Grand Cherokee唔同,車身細一截,而且有關越野攀爬嘅系統都少啲。不過今日代理就喺荒郊擺下擂台,畀傳媒喺野外實試 Cherokee,再加上搵嚟四驅車專家馬大立先生指導,原來 Cherokee都好爬得!

Jeep Cherokee Limited Spec.

引擎: 2,360c.c.直四(2.4 4WD); 3,239c.c. V6(3.2 4WD)
馬力: 184hp/6,400rpm(2.4 4WD); 271hp/6,500rpm(3.2 4WD)
扭力: 23.4kgm/3,900rpm(2.4 4WD); 32.1kgm/4,300rpm(3.2 4WD)
傳動: 9前速自動、附+/-模式
懸掛:前麥花臣支柱、後多連桿
制動:前透氣碟、後實心碟
車身: 4,624 X 1,859 X 1,681(mm)
車價:$499,000(2.4 4WD);$629,000(3.2 4WD)
查詢:太古汽車( 2960 9233)


大片碎石路可以令車速失控,但 Cherokee嘅四驅系統令四輪輸出自動調節,完全唔跣胎。 

深坑令尾輪兀起,一般 SUV可能就此被困,但 Cherokee如履平地。 

試車路中段有小河流,但呢個並唔係重點,河內巨石先係主菜,馬 sir要傳媒轆過巨石過河。

全新一代全新表現

Jeep就好多人都識,但對佢哋嘅車款就唔係好熟都唔出奇,事關 Jeep闊別香港市場多年,就算 Cherokee車系已經有 40年歷史,都畀到大家新鮮感。眼前嘅 Cherokee屬第 5代,喺今年初先推出,代理就即時引入,車身大概同 Audi Q5一類中型 SUV咁大,不過外表設計就有好大差異,尤其係車頭設計更加破天荒,唔理你喜唔喜歡, Cherokee行出街一定有收視。
此外, Cherokee嘅車廂都同我哋常見歐洲車好唔同,真皮座位設計好靚,似跑車桶 seat,而且實際表現亦舒適。除乘坐感好之外,筆者亦欣賞 Cherokee擁有一大片玻璃天窗,為車內增加空間感之餘,面對 off-road嚴苛測試,車架都冇因為大天窗而影響剛性。


中控台中置 8.4吋大型 touch mon,可以調校音響及行車資訊等系統,而且方便清楚顯示泊車鏡頭所拍攝影像。 

巨形天窗由前座伸延至後座頂,採用兩幅玻璃構成,前半截可以趟開,後半截係梗窗。筆者發覺佢隔熱表現唔錯,試車當日曬 3小時,車內都唔覺好熱。 

尾箱空間唔算好大,但旁邊可以靈活變成多功能儲物位置,只需裝上額外層板即成。

後座舒適性都好高,座位用多幅真皮組成,而且有冷氣出風口,天窗亦都伸延至後座頭部,令乘客都可以享受更好空間感。 

前座根本就係跑車桶 seat,用料同形狀都做得唔錯,如果有埋冷氣系統就更好,畢竟香港天氣熱,上車時真皮座位絕對係著短褲人士剋星。 

馬 Sir特別為 Cherokee設計咗一條約 600m嘅 off-road供傳媒試車,有別一般 SUV試車紙上談兵,其中更會過河、轆大石及落碎石斜坡,唔好話車行,人行都有一定難度。

頂級懸掛  Grand Cherokee

睇個名都知 Grand Cherokee比 Cherokee高級,唔單只車身更大、馬力更強,連懸掛系統都係可升降氣壓款式,令佢可以更爬得;而且四驅系統可自動分佈 100:0或 0:100,極端路面都冇有怕。
售價:$638,000

馬 Sir試出真功夫

筆者試車前其實已上過堂,馬 Sir更帶一眾傳媒步行試車路段了解路況。整段路結合鬆土斜坡、河流溪澗、叢林窄路、深坑大石等等,雖然未至於極之崎嶇,但可以肯定一般 SUV冇可能玩得掂!馬 Sir:「 Cherokee嘅電子四驅系統設計得非常之好,面對咁嘅路根本連越野胎都唔使換,街胎已玩晒全程。」過大石或深坑, Cherokee少不免玩到單輪、甚至雙輪離地,但只要 Active Drive I系統設定到 SAND/MUD模式,四驅系統就可以自動分配扭力,令兩個轆都可以輕鬆前行!此外, Cherokee波箱用上最先進 9速款式,可以令動力流失更少, 3.2版本得出 10L/100km耗油表現,而 2.4版本就 8.8L/100km。



車尾設計比較簡單平實,但足見車廠心思,車廠章下方設有鏡頭,位置比一般車高,作用係可以盡量避免沾上污泥,而且鏡頭視野更廣闊,方便 off-road時視察後方景物。 

Cherokee有兩個型號,入門 2.4公升引擎馬力及扭力雖然只有 184匹及 23.4kgm,但亦冇影響 off road表現。

3.2公升高級版擁有 271匹馬力及 32.1kgm扭力,喺 on road及 off road上都有更膨湃表現。 

表板設計勁靚仔,筆者最 like中間個 mon.做到漸變效果,而且顯示資訊極之豐富。` 

暫時最先進、最多波段就係 Cherokee呢套 9速波箱,令耗油量表現更出色。 

馬 sir話今次測試路段原本要以 SAND/MUD模式進行,但後來發覺用 AUTO模式都玩得晒。 

四驅車專家 馬大立

馬 sir有多年玩四驅車經驗,幾勁嘅四驅都玩過,連佢都讚 Cherokee嘅越野表現接近專業級數。


撰文:袁國基 攝影:葉偉豪 美術:林宜德

全站熱搜

tvb4life 發表在 痞客邦 留言(0) 人氣()