漫遊毒物

袋住先 《薩爾達無雙》

Ads by Google

Wii U用家話:「說好的全新《 Zelda》去咗邊!係咪要等到 2047年?」
任天堂速速解畫:「差個尾、差個尾! 2015年就有得玩!
最近賣版權畀光榮,由《真.三國無雙》團隊 Omega Force搞咗隻《薩爾達無雙》,玩住先啦!」
Wii U用家:「呢個方案我樂意袋住先!但我仍然要全民普選……」

 

《 Zelda Musou》
機種: Wii U
人數: 1-2人
類型:動作
售價:$499
查詢:電氣良品( 2359 7998)

咪就係一隻無雙囉

本作玩法一面倒傾向《無雙》系,刀劍劈劈劈、儲夠鬥氣出超必,打敗據點或達成任務就可前進,打埋波士過版。記者自己係兩個系列都有玩,用《無雙》個操作法篤,唔使點用腦就過到版。
Omega Force主理嘅版圖都幾靚,敵人兵仔數夠多,但場場都係趕頭趕命劈友,冇乜故事性,音樂亦都冇 3D版《薩爾達》咁正,最 sad係冇馬騎,欠缺自由冒險 feel。更大問題係地圖解謎元素不足,好在炸彈、弓箭等副武器仍可以針對特定波士級敵人嘅弱點使用,呢個 point就有番少少 Zelda味。咁遊戲整體值唔值用 5嚿水袋住先?我覺得還可以!但要抱住「買《孖寶賽車》唔好諗住打動作 game」嘅心態去玩,當係班角色 crossover《無雙》咁去享受,觀點就會 fit晒。

 

林克 Link都係最基本綠衣戰士形象,不過因為遊戲唔夠角色,林克將會有好多款新服務業同新武器,增加打法變化。


 

Zelda向來係等人救嘅公主,但本作中卻好似《星矢》電影新版雅典娜咁勇,會自己上戰場!


 

來自系列作《黃昏公主》的幻獸形 Midna,以幻法攻擊,金頭髮當長鞭,仲可以騎狼。


 

食腦打法叫「 Weak point攻擊」,如圖中隻大怪物弱點喺嘴入面,主角林克就要趁佢張開嘴時掉炸彈入去。跟住怪獸會被轟到張開嘴露出弱點.此時出盡力打到怪物頭頂六角形能量計冇晒油就算勝出。

 

硬係要數都有少少版圖解謎,好似呢款 Hook shoot就可以畀林克射牆跳躍,升高 level後仲可以扯個月亮嚟打晒成村人。

 

人物同版圖真係一眼睇晒,好在角色能換武器,亦可以用技能樹方式去強化技能,但始終唔夠《真三國無雙》系列耐玩,好在 9月尾 Wii U出魔女射擊 game《 Bayonetta 2》,時間剛好。

細芒復古

唔記得講,《薩爾達無雙》並非體感遊戲,用番 joypad十字掣玩就 OK,另外 Wii U個細芒用法都幾新鮮,就係玩 game中 game「冒險模式」,細芒會變成紅白機 style畫面,操作迷你 dot dot林克去打怪獸儲道具,話唔定耐玩過主遊戲。

永遠懷念 Robin Williams 林克係小飛俠化身

上星期過世嘅美國喜劇演員 Robin Williams,唔講唔知,佢本身係一個電子遊戲迷,最愛作品就係《薩爾達傳說》,仲將個女改名做 Zelda。


劍士林克 Link設定靈感來自 Peter Pan, Robin同時是兩套作品的迷,曾在 91年接拍史匹堡的電影版。 

虎父無犬女, Zelda長大後覺得自己個名不知幾型。 

撰文及攝影:鍾世傑

全站熱搜

tvb4life 發表在 痞客邦 留言(0) 人氣()