石硤尾南山邨商場 86號鋪 財記士多 

今日好玩嘢

懷一個舊零食 石硤尾南山邨商場 86號鋪 財記士多 

Ads by Google

最近荃灣愉景新城有個愉快動物餅 35週年展覽,回憶起小時候家住白田邨 11座,放學時最鍾意响邨口士多「蒲」,貪佢門口有部土炮彈珠機玩,老闆娘仲會請糖俾我哋成班小朋友食。可惜重建計劃影響下,幾個月前呢間士多已連同其他商舖結業,好快連條邨都會改頭換面,童年回憶搵唔返。不過幸好懷舊零食仍然仲搵到,行去附近南山邨就有間財記士多,戒指糖、白兔糖、果汁糖全部有齊,你忍到手唔買?

風雨不改門常開

今時今日,舊式士多甚至舊設計屋邨都買少見少,南山邨都成唔少電影及攝影友取景地點。財記士多因南山邨而存在,現任老闆王永鈿先生接手家母生意已有廿年,一直都係做街坊同附近返學嘅學生哥生意。
我哋後生仔凌晨四點半先準備瞓,但佢已經出咗門口返去開舖,洗地、執嘢,風雨不改,每朝六點前財記已經開咗門,一直做到入黑食晚飯先收工。問佢幾時打算唔做?
「邊有打算,做唔到咪唔做囉!」
他笑說邨外世界他老早不知究竟,一天只做一件事,足矣。


王生唔想高調做訪問,記者都係當同佢傾吓偈。 

一張摺櫈,一個最唔光鮮嘅位置,老闆每日就係坐响呢個位,見證歲月如梭。 

細個唔明點解呢種日本大粒糖要特別用呢種膠盒擺放,「嚟貨嗰陣已經係一盒盒咁嚟。送貨嘅仲會俾張紙你,上面寫要賣幾錢,?家冇啦。」一粒糖都有文章。

舊式雪櫃冇佢都唔算士多,上面透明櫃放罐裝飲品,下面放滿凍水冰粒同玻璃樽裝飲品。細個最鐘意伸手入去拎粒冰再放入同學件衫入面整蠱人,夏天玩爽過淋冰水呀。 

南山邨商場入面仍然做緊生意嘅舖頭買少見少,財記兩邊舖頭早已拉閘冇做。懷舊士多可能响香港仲有唔少,但外觀仍然有 6、 70年代感覺嘅應該唔多。 

12道舊史瘋味

講完石硤尾懷舊士多,其中一個重點,梗係堆懷舊零食啦!每個細路心目中都總有一樣經典零食, 80後嘅你仲記得買包唔係咁好食嘅「乖乖」,只係為咗用隨包送嗰個乖乖圈同人對戰嗎?又記得 5毫子一粒嘅印水紙吹波糖,永遠都係印完落隻手度都會濛晒嗎?好多懷舊零食未必搵得返,好在呢 12道懷舊風味仍然健在,全部食過先係自己友!

 

愉快動物餅
編輯話佢個年代係叫得意動物餅,廣告口號係「好食到唔捨得請!」佢同樂天熊仔餅雙雙淪為兒童心理測驗:俾塊餅佢,如果佢會將啲動物嘅手手腳腳慢慢分開咬爆先成粒啪落口,佢好危險。

 

果汁橡皮糖
成班同事十幾人,冇人聽/食過呢隻果汁橡皮糖,好失望呀!皆因佢係記者首選,個包裝甚至冇變過,入面有三隻味同三款造型,唔算多,但暗瓦底一樣可以玩心理測驗……(利申:我食青蛙形一定食「斷」佢兩隻腳先)

 

藥丸牛奶糖
唔係診所低能奇觀將藥丸當糖食,呢種牛奶糖其實都好流行,認唔出嘅或者會記得佢個 fd子「好立克糖」,包裝同外形都一樣,不過一白一啡唔同色,但口感差唔多,冇益之中應該算幾有益。

 

吹 BB糖
吹 BB糖其實幾難食,純粹貪佢擺入口可以吹到 BB聲,想激嬲 miss必備。細個買冇「食玩」送,今時今日就有啦,然後收貴你五蚊,可惡。

 

日本大粒糖
前面財記都有見過嘅日本大粒糖,呢隻糖到𠵱家都仍然只賣 1蚊,抵食;識食一定食提子味,不過食親條脷都好似會損咁。

 

媽咪麵
70後食福麵、 80後就一定係媽咪麵,包裝改晒,舊史係紅色包裝,「藍毛」亦大隻啲。𠵱家都唔難搵,算係另一隻跨世代零食,但唔理邊一代,最後一啖都一樣咁鹹。

 

眼鏡朱古力
𠵱家見到都未必會買嘅眼鏡糖,因為粒朱古力隻味永遠好似過期咁,但以前小朋友至愛佢可以拎起扮眼鏡。

 

汽水罐可樂糖
可樂糖人人食過,亦人人都拉爆過開膠蓋個膠圈,多年以來始終如一:呢張相最左手邊嗰罐都俾我拉爆咗,開唔到,冇得食。

 

的嗒糖
攝記 Candy見到大叫:「嘩橙味 Tic Tac糖呀痴線!」先醒起,自從冇幫櫬士多後,好似好耐冇見過 Tic Tac了。仲記得嗎?有隻一盒兩隻味,可兩邊開蓋,邊度仲買到呀?

 

太空兔仔糖
到底係叫太空糖定兔仔糖?唔知,但放入口後佢會變成粉粉地,係記者至愛之一,已經好難搵,去開懷舊士多要買多幾包。

 

果汁冰條
源自日本,原身只係膠條裝果汁飲品,但各國細路都發明雪到變冰條食法,上下拆開同朋友一人一條,慢慢啜嚿冰食啲汁,明明成陣臭膠味都仍然覺得好好食。否則剪開個頭當果汁飲亦得,得戚囉咩呀。

 

沙嗲魚串
唔只士多買到,部份舊區商場細鋪都仍然可見嘅呢類沙嗲魚串,因為一串夠平( 80後記者當年買五毫子串),所以都大受歡迎,人人都食過,啲竹籤仲好利,連脷都𠝹得損!

80後林先生


林生笑言細個唔了解吸煙害處,同學仔都會揸住支朱古力條扮大人。 

細個最記得煙仔朱古力啦!雖然好易食到張紙,但同學都會一人拎一支扮勁,你仲搵到我五十蚊同你買包!

經典廣告歌一睇識唱

以前賣零食一定要有歌,例如呢首唱到街知巷聞嘅「有一塊熱∼浪∼」就非常過癮,當年劉德華套《摩登如來神掌》入面阿天殘腳元華(唔係劉華)都有唱過一次。講到尾,首曲勁唔啱音之餘,再加埋呂方嘅 Bollywood式載歌載舞先係好睇之處,成陣 cult味隔住個芒都聞到!

 

「曾共渡過漫長的歲月…」啲字有聲嘅喂?如果你同記者一樣,有响當年追睇深夜時段播嘅《星矢》、《龍珠》動畫,相信呢個廣告你一定有共鳴,皆因佢永遠只會响嗰個時段播,係每節都播一次!擺明要洗細路腦!最尾轉身講「射射」呢個妹妹今年有冇 30歲?


撰文:熊俊彥
攝影:羅巧怡

全站熱搜

tvb4life 發表在 痞客邦 留言(0) 人氣()