基本工作做完, Viola會幫狗狗按摩一下,咁稱職嘅保母邊度搵? 

寵物家

全能寵物保母

Ads by Google

因為家中兩位至愛,我已經三年無去旅行,講緊嘅係我兩隻貓。平日返工,已經獨留寵物在家中,去旅行要佢哋住寵物酒店,怕佢哋未必住得慣,又怕佢哋同其他貓狗打交,主人點會安心?呢個時侯,你需要一個親自上門嘅 pet sitter寵物保母!
Pet sitter在外國好流行,除基本餵食執便便外, pet sitter仲會帶狗狗落街散步,陪貓貓玩羽毛棒,就連金魚、蜥蜴都懂得照顧,開工帶埋急救藥箱,萬無一失。

照顧你全家

曾在加拿大任職 pet sitter的 Viola,回港後發覺香港人對 pet sitter需求比外國人更急切,於是開設了寵物保母公司,何解?「外國開到成行成市,香港數埋只得幾間。但香港人比外國人更常出外公幹旅行,而且香港人的工時較長,有客人會要求我們在他上班時間,一日三次上門照顧寵物。」上門雖好,不過俾陌生人入屋總係覺得唔安全,「外國人好 casual就咁放低條鎖匙,但香港客人普遍都有些擔心,我哋提供服務前會上客人屋企互相了解,鎖匙亦可以由保安保管,以建立互信關係。有時客人離開大半個月,我會幫手收信件,以免信箱塞爆,讓賊人知道家中長期冇人而有機可乘。清潔完貓便便,亦會順手倒埋垃圾,客人返嚟唔會聞到異味。好多時完成工作後,大家都做咗好朋友。」


執完貓便便後,順手幫忙清理家居垃圾。 

雖然 pet sitter幾乎所有照顧寵物的事都肯做,但乾糧罐頭就建議主人自備,以免買錯,影響寵物健康。 

蛇都要請保母

狗狗熱情,照顧還算容易,但貓貓遇到陌生人通常只肯匿入梳化底,點搞?「我會在客人正式交託寵物給我前,先到他們家和寵物相處,見面一兩次後,貓貓通常就唔會再驚。我又會扮唔理佢哋,等貓貓自動行過來嗅我,等佢哋放下戒心俾我摸同抱。」除了貓狗,原來也有人找保母照顧雀仔、白兔、蜥蜴,「最難忘一次係照顧蛇,要餵佢食急凍老鼠。」 Viola的保母隊伍已有十二人,但依然忙得不可開交。「有特殊情況的寵物,如年老、長期病患,需要打皮下水等,始終需要較為有經驗的 pet sitter才處理得到,我便會親自出馬。幸好沒有緊急事發生過,不過我哋平日工作時都會帶備急救藥箱,亦與獸醫院合作,遇事時可馬上通知醫生。」


Viola在外國讀過寵物急救和 pet sitter課程,包紮傷口、動物營養也難不倒她。 



邊同寵物玩邊影相,再即時傳送俾主人,以解主人的相思之苦。 

學過領犬技巧, Viola帶客人狗狗落街無難度。 

寵物保母查詢

Furrenz Pet Sitter
收費:半小時起計,貓$175;狗$180
網址: http://www.furrenzpetsitters.com 
電話: 8199 9813
(香港暫未有 pet sitter課程,如想修讀,可登上: http://www.petsit.com 查詢網上海外課程)


撰文:吳韻菁
攝影:胡春輝
狗狗 Bobby、貓貓 Taco

全站熱搜

tvb4life 發表在 痞客邦 留言(0) 人氣()