Joey每星期都會帶 Ball Ball出街散步 2至 3次,自 Ball Ball成為家中一份子後, Joey學懂照顧寵物,心裏亦多了一個寄託。 

Petbook

男人老狗

Ads by Google

新城電台節目《晨「希」. Good Day》、《頭條趣聞》的主持陳禮賢( Joey),本愛自由自在,不想負起養寵物的責任。但在一次機緣下,他收養了長毛芝娃娃 Ball Ball,不單令自己努力學習照顧狗狗,還改變了生活模式,放工後少了去蒲,多了回家,因為陪伴 Ball Ball,成為了他回家的理由。

 


Ball Ball長毛芝娃娃8歲男 

採訪當日, Joey在露天 cafe進餐,長毛芝娃娃 Ball Ball看着主人大口大口地吃漢堡包,牠望到實一實,很想咬一口的樣子,十分搞笑。「 Ball Ball好為食㗎,乜都想食落肚。」
Joey本不想養寵物,但飼養 Ball Ball,他以意外懷孕來形容。「自己返工根本抽唔到時間照顧寵物,養得寵物就要當家人咁照顧,有病又要帶佢哋去睇醫生,真係好大責任,所以之前從來冇養寵物嘅念頭。」
直到 3年前夏天,他與女友復合, 2人之間竟多了一隻狗狗,「喺分手期間,女友領養咗 Ball Ball,復合之後,只好一齊養,但我發覺佢唔係咁用心照顧 Ball Ball,有心情先同 Ball Ball玩吓,當 Ball Ball係玩具一樣。」約 9個月後, Joey與女友再度分手,雖然她想繼續照顧 Ball Ball,但 Joey認為她不懂照顧寵物,於是把 Ball Ball留下,獨力照顧。

護食惡習


Joey拿出小食,即氹得 Ball Ball站立。 

要學習照顧寵物不是一件容易的事,而且 Ball Ball與一般狗仔不同,不但不喜歡玩玩具,又不太懂與其他狗狗交流,還有護食的壞習慣, Joey要用心去改變牠。「 Ball Ball唔鍾意埋堆,我帶佢去狗公園,見到一堆狗,佢最多只會追住一隻玩。除咗去狗公園,我每星期仲會抽 2、 3日帶佢落街散步,等佢見多啲人同其他狗狗,加強社交能力。」
有護食習慣的狗狗,一見到食物就搶, Ball Ball也不例外,「可能 Ball Ball以前嘅主人對佢唔太好,佢要搶嘢食,令佢有護食嘅習慣。上網睇過啲片,話要改變狗狗護食,就要喺佢搶食時拎走啲食物,一吠就拎走,等佢平靜先放番低,重覆做幾次,完全平靜先畀佢食,我同 Ball Ball訓練咗約 3個月,開始有成效,佢冇再搶食物。」

領養寵物


Theresa表示中心每日都要逐間房清潔和放狗,但只有 3名員工幫忙,所以希望得到更多捐助。 

Joey鼓勵有意養寵物的人士領養,於 06年 7月成立的「拯救遺棄寵物中心」( RCAP),現時收容了 400隻狗、十多隻貓等人領養,負責人 Theresa表示:「我哋係非牟利機構,唔主張人道毀滅,希望多啲熱心人嚟領養貓貓狗狗。」由於政府沒有資助,中心要照顧被遺棄的流浪貓狗,開支很大,除領養外,亦歡迎有心人捐款捐助。

改變生活


看着主人吃漢堡包, Ball Ball的樣子十分無奈。 

自養了 Ball Ball後, Joey很努力學習照顧狗狗,亦改變了他對生活的看法,「以前一個人住,覺得屋企只係有瓦遮頭嘅地方,養咗 Ball Ball之後,『屋企』變咗做『家』,有責任要早啲返屋企照顧佢,餵佢食嘢,少咗出去玩同應酬,𠵱家 Ball Ball成為我回家嘅理由。」
現時 Joey很關注動物權益,鼓勵別人領養寵物,但又認為要負得起責任才好領養,「好多人只當寵物係玩具,鍾意就同佢玩吓,冇心情就唔理佢,但狗仔好需要主人同佢玩、落街散步、餵佢食嘢。喺養寵物之前,真係要諗清楚,要負得起照顧到佢一生一世嘅責任,先至好下決定。」

拯救遺棄寵物中心( RCAP)

地址:新界流浮山上白泥 31號
電話: 2383 5553
facebook: RCAP拯救遺棄寵物中心


撰文:陳文傑
攝影:彭自維

    全站熱搜

    tvb4life 發表在 痞客邦 留言(0) 人氣()