Geek友講場

蝸居生活 一嘢玩盡 200呎

Ads by Google

香港地少人多、樓價升幅全球第一、年輕人上樓艱難、百物騰貴……仲駛我講咩!
「衣食住行」呢四大生活要素,香港人往往最缺乏「住」一項,租貴、樓貴,為慳錢買樓,有時明知過期食品都要擺落口,偏偏新樓盤亦愈出愈有創意, 177呎「奇則」設計出高級劏房,住得人養到狗都可能擺唔到電視,更遑論招呼朋友打邊爐,真係終南山下住古墓與世隔絕咁浪漫咩。係咪要住到咁頹先算香港人?今期《 FACE》話你知屋細一樣可以有要求,住 200呎一樣係人,起居飲食之餘都想有生活態度,冇話唔得!

讓專業的來

空間細可以點做?等專業室內設計師 CM Jao講先啦!「先因應每個 layout嘅獨特性,再善用當中嘅空間,盡量做到唔浪費任何地方。最基本例如門口同鐵閘中間已經可以擺嘢,門後面亦可偷位做鞋櫃。部份舊樓樓底高,客廳做個地台亦可增加儲物空間。當然亦要減少大型傢俬,必要時甚至要犧牲單位間隔。」細得嚟又要威得唔得呢?「威唔威我唔敢講,只可以俾少少建議,一係盡量保留一至兩幅牆身留白,二係全屋只保持兩到三個主要色調,三係唔好用太花嘅牆紙或深色牆身,間屋已經細,仲用深色感覺只會更迫。」講到尾個個單位、每個空間都不盡相同。睇埋後面呢幾招,自己消化吓啦!

 

CM Jao
OFT Interiors設計師
曾負責香港文化眼鏡概念店 Visual Culture Optical中環及尖沙咀新舊店室內設計,與及佛山英皇 UA電影城、怡豐城等大型項目。

住好啲啲蝸居生存術

除咗花錢搵專業設計師幫你裝修、偷位製造儲物空間,其實仲有少少生活貼士、活著多好。

 

搵靚位 玩投映機
6、 70年代就話電視撈飯,今時今日返到屋企肯定係對住電腦多過電視,睇劇玩 app一部 iPad又搞得掂,電視點解唔可以放棄?計我話不如買部有投映機或者有投映功能嘅 gadget,駁電視駁 DVD機射上牆睇。認真 mode,專家話投映機只適合有大面積牆嘅單位有限度使用,真係得 177呎未必用到,但搞笑少少諗,冇牆其實可以射上天花板、瞓住睇!



科技咁發達,手機都內置投映啦!如呢部 Galaxy Beam 2大陸都已出,可射出 50吋影象。(約$2,500) 

 

一機兩用 空氣清新機
想住得細都有生活態度,呢部機可以話係首選。香港空氣差,奈何响蝸居生活,可能冇空間俾你買多部「多餘」嘅空氣清新機,而呢部機正好解決,因為佢除咗係空氣清新機,亦係直立式風扇,可轉動亦會吹出涼風。內置 HD離子產生器,可製造高濃度 PCI,釋放出正、負離子,抑制空氣中細菌,但講到尾最緊要係樣靚,擺部响屋企點都冇錯。($4,680/a)

 

3合 1微波爐 阿媽都想要
200呎蝸居一樣要供,省吃變得相當重要,出街食貴大可自煮,市面有隻3合1純蒸氣燒烤微波爐,既能叮、亦能蒸,焗個蛋糕都仲得,功能足夠應付日常三餐,更內置 22個自動烹調食譜,買好食材㩒個掣就自動煮, 27公升特大容量夠你同時蒸菜煮飯。係就係大部啲,但一部機搞掂晒,慳足成個廚房乜都抵啦!($5,180/a)

 

沖涼都慳  So Crazy
唔好覺得屋企冇得沖涼好神奇,公廁、殘廁又多又方便, gathering又得沖涼又得,再唔係 join間 Gym,或者去公眾泳池一樣沖得。此外,全港共有 28間政府管理公共浴室,港島中西區最多、單區 5間,水費都慳埋。出街沖涼,邊個夠你狼!

 

風筒加直髮 做 Hair Spa
涼可以出街沖,咁長髮女孩唔通要帶齊風筒、直髮夾落 Gym玩足一晚?你太睇少當今科技, Hair Spa風筒聽過未?以 Sharp獨有 PCI技術,製造正、負離子再經風筒吹入髮絲,除提供修復、保濕、滋潤效果,最正係想直髮用風筒就得。 Model未梳頭前實試,真係一吹即貼服,亂髮變直晒亦得!($868/a)

 

榨汁飲 夠健康
屋企冇咁大個雪櫃,大可以將生果整晒做 detox water,即係好地地有生果唔食,係要加水浸幾粒鐘拎嚟飲話吸收返生果本身維他命……係,我都唔明,所以唔好奇怪點解會介紹榨汁機:一,部榨汁機 size與同類產品相比好細,二,呢部榨汁機係少見慢磨設計,加上識汁肉分離,一沖水已經洗完。又懶、又快、又健康,你都係想咁 U!($2988/a)

 

洗完厚衫 寄埋倉
拎衫出街磅洗唔使我教,但原來大型洗衣店仲提供寄存服務,換季時可將阻地方的冬天厚外套或者被舖先洗淨後存倉,唔包洗衫錢,寄倉 3個月收費大概係$5件衫、$30張被。

 


一張雙人 sofa都係 US90(約$700),怕硬加咕𠱸墊住又得! 

紙摺傢俬 層層疊
記者個人經驗,百幾呎單位唔好旨意仲有位放個巨型實木衣櫃,最佳方法係用抽屜式設計嘅箱玩層層疊,放衫又得放雜物又得,當中以紙箱為佳,因為夠輕身。紙造太頹?你都痴線,美國 chairigami公司就專做紙傢俬,有櫃有櫈甚至 iPhone case,全部摺得。設計就係要 think outside the box,全屋紙點都好過全屋膠啦。( b)

 

門口 擺鞋陣
又買新 NB?鞋櫃、鞋盒陣都好阻地方!如果屋企有鐵閘,可以學 CM Jao教咁,將鞋陣放晒落鐵閘同木門之間嘅空隙。雖然有風水師話門口放鞋會失婚又破財,但屋企冇位就侷咁擺架啦!

 

終極方案 一 box玩曬
以為外國地方大就一定冇慳位設計係錯錯錯,其實「細單位」係大城市通病,所以外國反而有更多痴線嘅慳位方法同設計,呢個來自德國名為「 Casulo」嘅箱超有名,因為一個 box入面打開竟然有床架、床墊、櫈、衣櫃、工作檯、書架、組合櫃……我懷疑多啦 A夢都冇咁勁。( c)


一個盒變全屋傢俬,變身過程官網有得睇,有片有真相,諗得出嗰個人超癲! 

 

查詢:
a. Sharp( 2423 5151)
b. chairigami( http://www.chairigami.com 
c. Casulo( http://www.mein-casulo.de 


撰文:熊俊彥
攝影:葉偉豪
Model: Ophelia So@IME Model Group

    全站熱搜

    tvb4life 發表在 痞客邦 留言(0) 人氣()