歐洋風

女神歸位

從前呢,有個女神叫美瑾霍絲,佢樣又靚身材又正,可惜口臭唱衰導演米高比爾,搞到連戲都冇得拍。
事隔 5年,兩人戲劇性「和好如初」,導演仲推薦女神喺新作《忍者龜:變種新任務》擔正做女主角。
故事教訓我哋咩?咪寧得罪新移民,莫得罪高層囉。
大台維穩劇捍衞新移民都係咁話!

Ads by Google

美瑾霍絲( Megan Fox)呢個名字,大家應該唔會陌生。猶記得 2007年第一套《變形金剛》,美瑾被導演米高比爾( Michael Bay)揀中做女主角,風頭一時無兩,除咗人氣爆升,個個傳媒都俾面派對,封佢做乜乜女神,物物「最性感女星」。
可惜美瑾天生嘴賤,不時明窒暗寸導演, 2009年《變形金剛 2》宣傳期間,美瑾更將米高比喻為希特拉。當事人梗係堅嬲啦,不過史提芬史匹堡( Steven Spielberg)仲嬲噃。
係人都知,史匹堡擁有猶太人血統,當年拍攝《舒特拉的名單》,都係想觀眾正視猶太人被希特拉迫害嘅惡行。如今美瑾口出狂言,梗係觸動史匹堡嘅神經。而作為《變形金剛》執行監製嘅佢,更即時致電米高,要對方炒美瑾魷魚。


2010年,美瑾跟奀星 Brian Austin Green結婚之後,分別喺 2012年及 2014年誕下兩子。早前 7月初,佢為囝囝拎玩具,盡顯慈母一面。 

愈撈愈霉

之後嘅事,大家都略有所聞。《變形金剛 3》易角換上 model Rosie-Huttington Whiteley做女主角。而口舌招尤嘅美瑾則人氣不再,唔單止逢片必爛,角色仲愈整愈奀,連三打七都不如。
女神初時都企得好硬, 2012年仲走咗去結婚生仔㖭。不過生完兩個仔,事業都未有起色,呢個 moment惟有認低威!江湖傳聞指出,女神主動向米高 say sorry,順勢𢱑埋撈。咁啱大導將會監製《忍者龜》,咪做個順水人情囉!啱嘅,同是圈中人,何必打毒針?娛圈,冇永遠敵人嘅!


28歲嘅美瑾雖然生咗兩個仔,但身段保持得好好。上周四( 7月 24日)出席美國動漫節,佢一身 sexy黑色打扮,索爆全場。女神果然係女神。 

(左起)沙拉保夫、美瑾霍絲、米高比爾係《變形金剛》嘅鐵三角。不過此情此景已經不再,沙拉保夫行為癲喪被捕;美瑾冇戲拍;最好命就係米高,其作品《變形金剛 4》早前上映,口碑繼續劣評,但票房依然大收, lucky到冇朋友。 

第 5次改編

《忍者龜》相信陪住不少人成長,漫畫於 1984年推出,先後被改編成動畫、電影。
今次《忍者龜:變種新任務》(美國、香港 8月 7日同步上映),係《忍者龜》第 5套電影。古仔係講實驗室發生火災,當中嘅寵物龜同老鼠全部不知所終。原來寵物龜受到輻射感染而產生異變,個個長到牛高馬大,仲精通忍者絕技。佢哋其後同女記者(美瑾霍絲飾)合作,成功搗破犯罪集團,並得知實驗室大火背後嘅真相。


美瑾霍絲飾演女記者,誤打誤撞闖入犯罪現場,因而惹嚟殺身之禍。 


90年代《忍者龜》三部曲嘅寵物龜角色由布偶所造; 2009年則用上電腦特技;今次劇組以真人加上 motion capture,效果應該比以往逼真。

無論近睇抑或遠睇,班忍者龜嘅造型都好唔靚仔。我只可以話,佢哋夠晒忠於原著。 

美瑾戲中嘅攝影師拍檔,由笑匠 Will Arnett飾演。講名氣,襯唔起美瑾。不過冇計啦,女神自己都失勢,揀拍檔邊會有 say! 

忍者龜最大嘅敵人就係 Shredder,見佢一身武士 look,就知佢揪得啦。

撰文:娛樂組

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()