惠比特犬天性活潑好動,是天生的運動好手,牠們全速奔跑時速可達 60公里。 

Petbook

精力旺盛

Ads by Google

惠比特犬( whippet)是 19世紀才出現的品種,牠們是由梗犬和小靈堤犬配種而成,當時被英國人用來參加咬奪競賽及捕獵野兔。雖然面對獵物時牠們絕不口軟,但對人類卻非常友善,直到現在不少人把牠們當作寵物犬飼養。
Vivian現時共飼養兩隻惠比特犬,她指此狗非常好動,要常常帶牠們出街消耗精力,間接迫使自己做運動,人都健康啲!

 


天氣熱,玩到咁上下, Windy和 Blowy走到陰涼處休息。 

Vivian現飼養了兩隻惠比特犬,每逢假日她就會帶牠們到戶外散步,彭福公園是其中一個常到的放狗地,「惠比特犬精力好旺盛,我每星期都要帶佢哋出去跑步,養佢哋可以迫到自己做埋運動,身體都健康啲。」
7年前, Vivian在朋友家中看到外形特別的惠比特犬,「佢哋個樣好似鹿,一啲都唔似狗,性格又平易近人,好鬼得意!我都想養番隻,可惜當時同屋企人住,嗰度唔畀養狗。」
直至約 4年前, Vivian搬往大埔的村屋,才有機會達成多年來的養狗心願,「我託之前有養惠比特犬嗰位朋友幫我搵狗,喺佢介紹下,我用咗約$7,000買咗 Windy返嚟。」

養埋男仔


惠比特犬腰細胸大,腿部修長兼肌肉發達, 19世紀時被當作獵犬使用。 

Vivian原本只打算養一隻,兩星期後,她在元朗的寵物店內,看到一隻 3個月大的惠比特犬無人問津,於是便決定帶牠回來,「惠比特犬尖鼻,腰細胸大,個樣可能唔夠玩具貴婦犬及哥基等品種得意,所以冇人要,見佢咁慘,而佢又係男仔,於是就買埋佢返屋企,湊夠一男一女,之後我幫佢改名做 Blowy。」
惠比特犬活力較其他犬種充沛, Vivian建議飼養牠們就要勤放狗,「最好屋企有花園,冇嘅話就要每日帶佢哋出去散步,畀佢哋跑吓。如果缺乏運動,佢哋情緒會變得憂鬱。另外,佢哋較為怕凍,冬天出街前,記得要幫佢哋着衫。」

差點走失

半年前, Vivian曾差點失去愛狗,「當時我放咗佢哋出花園玩,點知佢哋玩玩吓,推開咗花園大閘衝出馬路,當我發現時, Windy已經衝咗去對面馬路;而 Blowy就向相反方向跑,好彩有好心人幫我追 Blowy,我先有時間去捉 Windy返嚟,事後我即刻換咗花園大閘。」
Blowy患有先天性不育,因此 Vivian不打算幫牠們添丁繁殖,她坦言養兩隻惠比特犬已經夠晒數,「除咗佢哋,我屋企仲養咗兩隻芝娃娃及一隻貓,我一個人住冇時間打理咁多狗,暫時唔會考慮再養。」


訪問當天氣溫攝氏 34度, Vivian要不停餵牠們飲水降溫。 

Vivian指 Windy身手較 Blowy敏捷,所以當她帶 Windy散步時,會綁兩條狗繩,以確保安全。 

撰文:何倬然
攝影:葉曉明

    全站熱搜

    tvb4life 發表在 痞客邦 留言(0) 人氣()