回到香港的上帝表示,於澳洲工作假期十分難忘,同一片天空下,至少體味到不同的生活模式,沒有後悔當初的決定。「其實辛苦都係一種體驗,自己冇時間諗放棄,因為一唔做嘢,冇屋住之餘亦生活唔到,所以一定要堅持!」 

青雲路

工作假期血淚史

Ads by Google

不少人
都希望趁年輕到外國闖一闖,而工作假期( working holiday)是一個不錯的選擇!很多人都以為工作假期易搵工又可享受假期,隨便已可賺到首期回港!然而,今年 28歲的高登作家萬用上帝(藍橘子)及 23歲的阿君,分別到澳洲及韓國工作假期,所經歷的卻不如預期美滿,難搵工、遭欺凌、被漠視,他們是如何走過的?

CASE 1首期賺不到賺到的是歷練

不少人到外國工作假期後,都會寫下遊記,甚至出書分享各樣美好經歷。寫過 6本小說的高登仔萬用上帝(以下簡稱上帝)卻以欺凌做賣點,推出了《高登仔澳洲工作假期欺凌事件簿》,「好多 blogger都會誇張地將旅程美化,好少講辛酸嘢,我想分享自己嘅真實經驗,真係幾辛苦㗎!」
上帝坦言最初只是女朋友想去澳洲工作假期,經過一輪遊說與考慮後,他為了令人生無悔,便辭去工作,越洋增廣見聞。
13年 5月到達墨爾本後,上帝表示不如預期中容易找到工作,「每個地方都會有人喺 facebook或者論壇 post工作空缺出嚟,但好難爭。靠朋友介紹,搵工會易好多。最初我哋去咗 share house度住,惟有虛偽啲同室友傾多啲偈,混熟咗,睇吓佢哋有冇工介紹,我第一份工就去咗農場摘豆。」
上帝坦言很難找到合法工作,當地大都以黑工及季節性的工作為主,每 2至 3個月便得轉換一次。農場工作多以量計算,每天工作約 8至 10小時,日薪港幣約$750至$800不等。「旅程期間,我做過十幾份工,除咗摘豆,仲有摘橙及士多啤梨、修剪葡萄枝、賣菜、地盤散工及餐廳侍應等。」

慘遭歧視

工作期間,上帝接觸過不同國籍農場主人及員工,「如果農場主人係越南人,佢只會對越南員工特別好,其他地方嘅背包客喺佢眼中,可謂連狗都不如。有次摘士多啤梨時落微雨,老闆拎住雨褸跑過嚟,正當我好感動之際,原來淨係得越南員工有份!其他人由頭濕到落腳,佢一眼都冇望過……」
上帝認為最辛苦的工作,非摘士多啤梨莫屬!「見香港人成日畀錢去摘士多啤梨,好似好開心。當你要摘一季( 3個月),就完全唔係嗰回事!士多啤梨種得低,成日要跪喺到,條腰好似就斷咁,仲要啲葉有刺!」上帝亦試過到地盤工作,但卻力有不逮,「成架車仔啲沙山咁高,點推得郁?太粗勞啦,做咗兩三日冇做。真係要大隻佬先搬到!」

被阿布揼

除不公平待遇外,上帝也曾被欺凌,「澳洲原住民(簡稱阿布 Aborigines)真係好惡,有一次我同室友喺市區買嘢,冇留意到有個阿布行緊埋嚟,佢冇問我哋攞煙,又唔係攞錢,咩都唔講就揼咗我朋友一拳!」由於聽聞過阿布的動員力強,若還手可能會被圍毆收場,所以他們只好裝作沒事,站起來繼續行街,「之後每次行街都要留意附近有冇阿布嘅蹤影。」
另一方面,工作時接觸過馬來西亞、台灣、越南及韓國等地的旅者,了解到不同的文化特色,「台灣人比較熱血,做嘢好有主見同直接;馬來西亞人體魄強壯,工作好有效率,可以單手拎鉸剪剪葡萄枝!我要兩隻手先夠力。」

買車遊澳


有種文化的編輯 Ivan(右)表示:「𠵱家好多年輕人都想去工作假期,但市面上嘅書好多都係講一啲正面資訊,好多時忽略咗背後不為人知嘅辛酸。上網留意開上帝嘅文字幾真實,所以想出一本書,畀大家了解實際情況。」 

雖然到澳洲工作假期與預想中優哉悠哉的生活大相逕庭,但上帝也有享受過生活,「整體都開心嘅,我用咗約兩萬港幣買咗架車環澳遊,為咗慳錢,途中我哋成日喺車上面瞓。有一次,有個婆婆好夜出街,唔小心撞到我哋架車,佢見我哋瞓車咁慘,就邀請我哋喺佢屋企留宿,雖然最後冇留到宿,但佢真係好好人!本身諗住賣番架車出去,但去到旅程尾段已經壞咗行唔到,惟有租車繼續行程。」
他坦言,這一年間已有收穫,扣除吃喝玩樂的開支,約賺 2萬港幣回港,從他雀躍的神色,感覺到所有辛苦都是值得!

 

 


書展期間,上帝舉行了新書《殺 II:眼球爭奪戰》的簽書會,每本$78,不少讀者都帶了舊作讓他簽名。 


工作假期中所接觸的大多為農場工作,上帝說:「冇乜點曬傷,我哋會着長袖衫褲、戴太陽眼鏡、帽同手套,防曬傷之餘,亦避免被植物嘅刺鈎傷。」

旅程中,上帝跟不同動物合照,包括樹熊、袋鼠和草泥馬(羊駝)等。 

上帝表示士多啤梨成日有有蟲,「如果唔小心揸咗落去,都幾核突。」 

澳洲的景色亦讓上帝大開眼界,成為工作的動力,上帝(左)說:「去過大堡礁潛水,真係好靚!」

黑工知多少?

到澳洲工作假期,旅者於到埗後都必須申請一個「稅號」,澳洲的僱主在發薪金的同時也會替員工扣稅,而被扣掉的稅項在隔年報稅時,退回給員工;黑工與白工的分別,就在於僱主有沒有替員工報稅。
上帝於《高登仔澳洲工作假期欺凌事件簿》中亦有提到,當黑工人工較低外,還要面對不少風險,如工頭突然失蹤,黑工們無法證明自己的工作紀錄,便沒法追討血汗錢!所以他建議大家做好預防措施,工作前先將工頭起底,可將其名字及照片放上背包客論壇,更要問清楚工頭出糧日期及時間。除了要記錄工廠或農場的地址,亦要跟工頭打好關係,起碼要知道他的住址,作日後追回薪金之用。

CASE 2韓國夢不似預期


阿君表示有時會懷念韓國工作假期的點滴,所以會到韓國餐廳回味韓式美食。 

韓風襲港,無論明星、化妝品、時裝到飲食都深受港人推崇!今年 23歲的阿君自言也因中了韓風毒,才到韓國工作假期,「中學已經好鍾意東方神起,由嗰時開始學韓文,好想試吓喺韓國生活!」
13年 4月出發到首爾,但阿君到埗後不久便患上角膜炎,「有間化妝品免稅店請咗我,韓國人好着重外觀,尤其我係做化妝 sales,佢哋見我隻眼紅晒,戴唔到隱形眼鏡,最後都係唔請我。」她很失望,加上一個女孩身在異鄉,難免有點想家,「頭兩個月都搵唔到工,真係好唔開心同成日喊,唔知自己過嚟做乜。見 send履歷表冇回音,唯有直接行入鋪頭問請唔請人。」
幸好阿君於 6月在一間 hostel找到工作,每星期工作 6天,每日工作 10小時,但時薪只得 4,000圜(約港幣$28),「我主要喺晚班做接待同保安,其實係一腳踢,好彩 hostel規模唔算大,約 40間房,都 handle到。」

韓仔求開房

一個女孩當夜班保安,總有些驚險事,「試過俾男仔搭訕,話想同我開房,除咗好驚同拒絕佢外,我亦都好驚訝,原來韓國人都會咁開放!同埋,韓國夜晚好多醉酒佬,試過有晚有個喺門口講粗口又唔肯走,得我一個真係唔知點處理,我只好打畀老闆求救,打發佢走。」
阿君以為韓國人容易相處,希望可以結識一兩位韓國朋友,「我住『考試院』,多數租畀韓國學生住,類似劏房形式,我自己一間房,租金約$2,500港幣一個月,宿舍 90%都係韓國人。我好多時都主動打招呼,但佢哋見我唔係韓國人,所以唔理我。其實都幾受打擊,冇溝通對象,真係口都臭……」
阿君坦言,以前很喜歡韓國,現在卻有另一番見解,「幻想破滅咗,原來韓國都有好多冇禮貌嘅人,亦都會有小圈子,同埋佢哋睇輩份睇得好重,了解呢個國家多咗。呢個旅程,我成日病,只係打咗兩個月工,賺得約港幣$7,000,我留足成年,要再貼 4、 5萬港幣生活費。其實都算係一個唔錯嘅體驗,起碼自己學識自立!」


阿君(右一)初時認識不到朋友,但後期從 facebook的工作假期群組中認識了一些交流生,一起體驗韓國文化。 

香港的朋友到韓國旅遊時,阿君(左一)亦能擔任導遊,「把握機會練好啲韓文!」 

《來自星星的你》曾到南怡島以小王子作主題的小法國村取景,阿君亦到此一遊。

想去工作假期?

現時可參與工作假期的國家有 9個,包括英國、法國、澳洲、愛爾蘭、新西蘭、日本、韓國、加拿大及德國。只要年齡介乎 18至 30歲,通常居住於香港特別行政區,並持有有效香港特別行政區護照或英國國民(海外)護照等,就可以申請為期 1年的工作假期。
以韓國為例,阿君表示:「要準備文件,領事館會要求申請者出示經濟入息証明,去韓國至少要有兩萬港幣。同埋要準備 year plan,其他所有事項都要列得好清楚。」她主要於 facebook及論壇參考不同的資料,「我喺香港寄定履歷表去韓國嘅免稅店、泡菜學校及珠寶店等,可以搵定工先。」
上帝於旅程前,亦會參考台灣論壇背包客棧的資訊,「除身體檢查文件及履歷表外,主要都係帶日用品,但其實準備唔晒,去到 share house都幾失預算,連飯煲都要自備!」
背包客棧: http://www.backpackers.com.tw 
勞工處工作假期網站: whs.esdlife.com


撰文:霍芷晴 
攝影:彭自維、葉偉豪 
部分圖片由被訪者提供
場地提供:辛安東元祖奶奶雞

    全站熱搜

    tvb4life 發表在 痞客邦 留言(0) 人氣()