新車激試

辣•雅  Jaguar F-Type S Coupe

Ads by Google

一聽到 Jaguar出品,好多人第一時間會諗到外表優雅,充滿英倫風味嘅房車,當然 Jaguar亦有推出性能可觀嘅跑車,但礙於形象或設計, Jaguar嘅跑車其實都係斯斯文文,就算去到 R級數,揸起嚟總係少咗份熱血感覺。去年推出嘅 F-Type係罕有地激進嘅 Jaguar,而更罕有係以開篷版打頭陣!開篷版嘅表現已夠強, Coupe硬頂咪不得了?眼前就係 F-Type S Coupe!揭背車尾優美線條,更能承襲上代 E-Type全球最靚汽車美譽,但骨子裡辣到飛起!

 

筆者陰謀論咁睇,覺得其實 Jaguar夠膽死先出開篷版 F-Type,其實早有部署,用意係令人有進步感覺。試諗吓,開篷 F-Type贏盡全球掌聲, Coupe版呢個時候推出,不論車架剛性,以至車身線條都更吸引,一定更有話題。

 


換上斜尾造型令 Coupe版更有超跑氣勢。 

Jaguar F-Type S Coupe Spec.
引擎: 2,995c.c.V6 supercharged
馬力: 380ps/6,500rpm
扭力: 46.9kgm/3,500-5,000rpm
傳動: 8前速自動、附+/-模式
懸掛:前、後雙搖臂
制動:前、後透氣碟
車身: 4,470 X 1,923 X 1,309(mm)
車重: 1,594kg
0-100km/h: 4.9秒
極速: 275km/h
車價:$1,438,000起
查詢: Jaguar HK( 2520 0989)

大斜背更性感

開篷 F-Type嘅車身造形其實已經同以往嘅 Jaguar好唔同,車身短小加上線條緊湊,令人覺得佢好有爆發力,未開郁部車都知佢係辣嘢!有咁好嘅本錢,嚟到硬頂版又點可以嘥咗佢? Coupe版車尾同開篷版有頗大分別,放棄三廂式設計,硬頂大刀闊斧由 A柱伸延至車尾,得出大斜尾造形,成個車尾即時生晒!個人覺得比開篷版更靚!而車尾嘅自動升降定風翼仍保留,可以喺 100km/h時自動升起,為車尾帶嚟額外 120kg下壓力。
唔好以為換咗做硬頂車身就會重咗,全個車架都由鋁合金打造,車重仍然可維持喺 1,594kg水平,而且因為少咗電動軟篷機關,比 F-Type S開篷版嘅 1,614kg仲要輕咗 20kg!前後軸負重得出 50:50完美比例,可想而知操控樂趣會進一步提升。


車頭設計同開篷版冇分別, S型號鬼面罩會多咗個徽章。 

自動升降尾翼可以令高速行車時更穩定。 

駕駛艙整體佈局源自開篷版,所以熟口熟面。

尾廂空間跳升


開篷與硬頂版最大分別除咗外觀,其次就係尾箱內部。由於硬頂版斜背尾門都幾大隻,開閂會幾狼狽吓,所以加咗電動開關功能,女士唔使兀高腳都可以閂門。此外,車尾唔使放置軟篷兼貫穿至座位背,令尾箱容量由 196L倍增至 407L,兩件行李都擺得落。
不過轉為硬頂之後最誇張嘅,都係車廂入面座椅背後有兩支直立嘅金屬柱,作用直頭好似賽車防滾架咁強化車架,就算喺 supercar身上都未見過!單係呢一點,就預知車架一定比開篷版硬淨。而且硬頂版隔咗唔少車外聲音,駕駛者可以玩得更放。座椅及中控台方面,同開篷版完全一樣,值得一讚係座位調校細緻,氣墊腰部承托咩身形都啱使。


尾箱容量大增至 407公升,媲美房車。 

座位可以多方位電動微調,咩身形駕駛者都可輕易搵到最佳坐姿。 

Coupe版車頂都可以選擇普通硬頂或玻璃頂,空間感唔錯。

狂態 Dynamic Mode

點解話 F-Type異於 Jaguar尋常車款,全因試開篷版時已發覺整車 setting都極之進取,令駕駛者有開快車衝動!而變成硬頂版之後,快軚、敏感油門同車架反應快呢啲特點冇變,但約 50km/h入隻街坊彎都可以感覺到軚感更實、車尾走得更快,出彎加速又更快扯返直部車,動作更加清脆俐落!此外, Dynamic Mode更容許駕駛者獨立設定波箱速度、引擎輸出、轉向比例及懸掛硬度,筆者試過全數 set至 Dynamic,排氣聲亦都設定為響喉模式,成部車即時變到落場賽車咁,每次盡油上一個波,尾喉總會啪啪聲爆響,嚇鬼!
今次測試嘅 F-Type S Coupe屬中級版本,用 380匹 3.0公升 V6 supercharged引擎加 8速波箱,對於揸開跑車嘅人,應該係啱啱夠玩,車架同懸掛嘅優點都可以發揮得晒,但一切都喺掌握之內,如果想要有同怪獸搏鬥嘅感覺,就要揀 550匹嘅 F-Type R Coupe型號嘞。


 

 


380匹 V6 supercharged引擎由低轉爆到高轉,推噸半車身都可以玩盡部車。 

8速波箱表現快速,難得係 Normal Mode之下亦暢順。 

除停車熄匙同升降尾翼開關掣,連排氣喉聲都可以調校!

座位背部嘅直立式金屬支柱,為車頂同車架之間提供額外支撐。 

只需將推拉掣拉向下面格仔圖案,全車即進入 Dynamic Mode。 

可以利用 touch mon.個別設定 Dynamic Mode內嘅多個系統。

Check 循跡系統醒!


頂級 F-Type R Coupe用到 5.0公升 V8 supercharged引擎,馬力谷到上 550匹,比開篷版 V8 S嘅 495匹更癲!雖然外表一樣,但就落晒硬彈弓、機械式 L.S.D、碳化陶瓷迫力碟等最強裝備, 0-100km/h只需 4秒! 


試 F-Type開篷版時已覺得佢個電子循跡系統冇其他跑車管得咁死,喺硬頂版身上就更能深刻體會,因為彎路表現更加生猛,所以出彎早少少、踩大少少油,就會有輕微甩尾!但當你意識到要反軚救車時,未郁手循跡系統已經幫你穩定番部車,可以令駕駛者覺得自己好高技術之餘,其實冇任何技術都相當安全。

入門波子做對手  Porsche 911 Carrera

Jaguar代理都講明直接對手係 Porsche 911 Carrera,最入門版只有 350匹馬力,但 0-100km/h可以快到 4.6秒完成,比 Jaguar F-Type S Coupe仲要快 0.3秒。而且假假哋都有 4個座位,車價由$1,798,000起。睇性能兩車接近,但講到名氣始終 Porsche更勝一籌。 F-Type S Coupe賣點就係要比人小眾,咁先可以突圍。


撰文:袁國基
攝影:彭自維
場地提供:白石燒烤( 2744 8188)

    全站熱搜

    tvb4life 發表在 痞客邦 留言(0) 人氣()