潮𡃁便當

歎點心小鋪

小店式經營、專 for三五知己歎茶的點心店最近開不停,自家製不在話下,由結合串燒做法的點玲瓏、再到位處潮區蘇豪的鼎點 1968,深水埗行完黃金聚腳好地黃金茶寮,以日式豚肉咖哩做生煎包,吸引女星江若琳都撐的正宗上海生煎皇,以及用上紫薯、和牛入饌的勝利道龍德樓,的骰又過癮,潮區或社區,總有你心水。

Ads by Google

串串燒牛肉

一聽西灣河太安樓,就自不然聯想到:美食!位於太安樓之後的點玲瓏,是新開不久的點心專門店,一如店名「玲瓏」,點心的骰精美,全是自家製。店主 Lawrence經營川式串燒店多年,所以點心加入串燒及四川風味的元素,例如燒賣、牛肉先蒸後燒,要的就是串燒那份香口,亦有以四川花椒水煮牛肉腸、靈感自酸菜魚的魚腸,入口微微香辣幾得意,唔到你唔試一試。


直擊食客:鄭小姐 sales第 3、 4次嚟食啦,脆皮野菌腸個口感好好,成日都心掛掛,最正係下午茶會平啲。 

黑松露金菇什菌長春卷$32意大利黑松露香味夠香,並以甘筍及雜菌提升口感。 

蜂蜜花菇川燒燒賣$16燒賣之上放入蜂蜜,感覺似 bbq,更令入口不會太乾澀,味道唔錯。芥末乾蒸燒牛肉$18伴燒肉常吃的中式芥末配上牛肉之後搭配特別,牛肉水分收乾帶一份惹味。

黑芝麻黃金粒流沙包$20入口黑芝麻香一湧而至,流沙包蛋黃香濃一點更佳。 

冬陰功湯鮮竹卷$26鮮竹卷配泰式冬陰功,光是配搭已經夠新穎唔老套,香辣惹味。 

脆脆野菌腸$26裏層米網香脆,加上雞髀菇、冬菇、靈芝菇等炒香過的雜菌,口感一流。

 

點玲瓏
西灣河太安樓 G23號地鋪
2177 8677
營業時間: 8:30am-10:30pm
facebook: Exquisite Dim Sum
*特別優惠:星期一至五下午 2時至 6時 8折。

點心拼住上

「點心最初是手提式,之後才是推車仔。」師傅黑哥, 1968年開始做點心,到今時今日因為外甥 Alex的請求出山。在蘇豪區竟有一間點心店,走平民價,任誰都覺奇怪,偏偏 Alex就覺得這裡欠一間點心店。店子不大,所以堂食以外,主力外賣,範圍廣至金鐘、上環,上至堅道。點心有蟹粉小籠包、鵝肝鮮蝦角、賽螃蟹春卷等,款式新潮,最特別要數自創的點心拼盤,有 3種選擇$98( 5款點心)、$138( 6款點心)及$168( 8款點心),每款點心 2隻起,唔似坊間茶樓一嚟就上 4隻,侷住要人多先歎到茶,花心人士亦可一鋪試勻晒!


鼎點焗小籠包$22汁肉四射,配以卜卜脆的蟹籽,不光賣相睇得,味道亦佳。 

賽螃蟹春卷$25炒香蛋白要混入春卷中再炸,非常考功夫,入口外脆內軟滑。 

鵝肝鮮蝦角$26摻入鵝肝,鮮蝦角內有乾坤,雙重鮮味拍住上。

芒果糯米糍$20感覺懷舊,用上香甜呂宋芒,表層綿軟非常。 

直擊食客:陳先生﹠ OnOn甜品店老闆上次一個人食拼盤,今次帶朋友 encore食晚餐,叉燒包菜餃一流。 

 

鼎點 1968
中環蘇豪伊利近街 14D號 A鋪
9698 1968
營業時間: 11am-9pm
facebook: dingdim 1968

靜雞雞炸蝦卷

喺深水埗就想起「黃金」,喺深水埗想食點心,同樣有間黃金茶寮,新開 1個多月,點心自家製,由曾在酒店做點心達 20年的師傅主理,有傳統蝦餃、馬拉糕、牛柏葉,也有較新穎的香草芝士蝦春卷、龍蝦湯鮮竹卷、富士蘋果脆球等。格局算不上最新潮,但地方企理,亦有別一般點心店茶樓,完全唔嘈唔應聲,同對面朋友傾偈再唔使「吓吓」聲。


香草芝士蝦春卷$24一定要趁熱食,皆因香草香味更突出,而且芝士味道香濃,爽彈蝦膠乃畫龍點晴所在。 

脆皮蘋果球$18用上富士蘋果配玉桂粉,脆皮層摻入芋頭,香脆煙韌的同時芋香撲鼻。 

龍蝦湯鮮竹卷$20脆皮腐竹一改蒸的慣例,變成蘸湯上,濕濕地更易入口。

鮮蝦菜苗餃$18表皮晶瑩,入口菜苗爽口及蝦肉鮮味齊至,囫圇吞棗就蝕底。 

直擊食客: Rachel& Kenny飲食聽朋友介紹第一次嚟,芝士蝦春卷最好食,因為自己好鍾意芝士,估唔到點心店都有得食。 

日系潮「點」

與串燒、川菜結合、用上西式材料是新開點心店統一方向,而已經紮根市場一段時間的點心鋪,最近不約而同玩玩新意 crossover日式材料構思新品,食點心都變得更潮。

咖哩小籠包


日式咖哩豚肉小籠包$35/4隻先是上枱飄來咖哩香,入口表皮及餡料咖哩味來個首尾呼應,完滿! 

以生煎包、小籠包以及獨創芝士小籠包在旺角打響名堂的正宗上海生煎皇,最近店主 Oscar又有新作:咖哩豚肉生煎包,連女星江若琳都在 ig狂推。包子靈感自 3個月前去大阪旅行吃到的豚肉包。表皮及餡料都摻入咖哩,餡料的豚肉乃豬前腿肉,並以日本咖哩造膽,加入蘋果、甘筍、洋蔥等材料再調配。包子平日傍晚 6點後有售,週末下午 2點後有售,日售 300隻,以 6月 10日推出第 1天 2小時內售完的速度來看,大家記住睇鐘食飯!

 

正宗上海生煎皇
旺角豉油街 72號地下
2323 2374
營業時間: 12nn-12mn
facebook: King of Sheng Jian

沖繩紫薯包

以燉湯如杏汁花膠燉白肺、螺頭湯出名的龍德樓,最近與沖繩紫薯和牛來個 crossover,提供和牛腸粉、生煎包及紫薯煎餅、饅頭等,將中式點心結合日式元素,令成件事「潮」得很,食完仲可叫道以北海道 3.6牛乳造的燉蛋白作結,非常首尾呼應。


沖繩紫薯包$18紫薯不會太甜啱啱好,包身若然更軟更佳。 

沖繩紫薯煎軟餅$18入口煙煙韌韌,微帶香脆,口腔完全被俘虜。 

 

龍德樓
何文田勝利道 10號地下
2762 7838
營業時間: 11:30am-12nn
*特別優惠:下午 2時半至 5時全單 75折。


撰文:梁智欣
攝影:楊晴、陳嘉元、謝耀恆、崔百祥

    全站熱搜

    tvb4life 發表在 痞客邦 留言(0) 人氣()