木村拓哉相隔十三年,於《律政英雄》再次飾演久利生公平,希望重拾日劇天王的稱號。 

電視精

木村拓哉 英雄回歸

Ads by Google

有乜可以持續十幾年都唔變?睇吓香港而家搞成咁,就知無乜可以。
所以,當聽到木村拓哉相隔十三年,再做《律政英雄》,有一刻覺得「唔係啩?」,再聽到女主角由松隆子換上細佢十幾年的北川景子,不禁抱頭大叫一聲:「 Oh my GOD!」
結果,第一集高收 25.6%,叫好又叫座,日本傳媒大篇幅報導話「木村神話再現」, 41歲的木村拓哉一掃近年收視低迷的成績,吐一口烏氣。
再演正義檢察官的木村,輕易地再次成為英雄,似乎一班年輕小生要取代木村江湖地位,還未係時候!

首集收視冠軍 6年來新高

木村拓哉叫得做日劇天王,好多作品都街知巷聞,《悠長假期》、《美麗人生》、《夢想飛行》等等,原來拍咗廿年電視劇,木村從來未試過拍續集,上次《律政英雄》都只係電影版一集過,今次事隔十三年,木村打破慣例,接拍《律政英雄 2》,可以話係盡地一煲。當年《律政英雄》每一集收視都超過 30%,造成社會現象,將木村事業推向高峰,可惜近年佢嘅人氣明顯下滑, 2010年的《月之戀人》, 2011年的《南極大陸》, 2012年的《 Priceless無價人生》, 2013年的《安堂機械人》,成績一套比一套差,甚至慘到要腰斬。積弱四年要搵出路,食老本,拍番以前有口碑的劇集,風險係如果咁都唔收得,就瘀到爆!今次擺明 sell情意結,不按章法做事的檢察官久利生公平重回城西支部,為咗追求公平審訊而四出調查。第一集上個星期播出,收視有 25.6%,係近 6年來首集收視最高的電視劇,雖然同第一輯無得比,不過總算係一個好開始。木村要挽回面子,之後先係考驗!


木村好似食咗防腐劑咁,十幾年後雖多咗幾條皺紋,襯北川景子,完全唔覺大過對方十四年。 

當年木村著呢件啡色外套,成為潮流,不過今季係夏天,暫時無得着,改為 T恤牛仔褲。 

北川景子飾演事務官輔助木村,之前二人曾經在《月之戀人》合作過,默契唔錯。 

電影版結尾木村同松隆子一吻,令 fans拍爛手掌。究竟電視台有無牙力,可以搵到佢返嚟客串呢? 

城西支部換新血

作為木村迷,要我客觀講好唔好睇實在有難度,不過睇完第一集,絕對值得推介。首先,今集同上集的節奏分別不大,令 fans好快就重拾十三年前的感覺,好似在公園一字排開的片頭、乜都有嘅酒吧、久利生公平最喜歡嘅郵購、打扮隨意的 T恤牛仔褲,完全唔會令人覺得已經過咗十三年。木村明顯少了一份稚氣,當年的演技還帶有一點年少氣盛,今輯就散發出成熟的氣場,更切合佢而家四字頭嘅年齡。城西總部嘅同事大多升職,無咗阿部寬同大塚寧寧,換入同樣係實力派的松重豐及吉田羊,又有另一種火花。開播前最令我擔心的是女主角由松隆子換成北川景子,本來有點難以接受熒幕情侶被拆散,睇完第一集之後,飾演事務官的景子表現尚可,亦都有交代曾經同木村拍拖的松隆子因為升職而分手,身為 fans個心都舒服啲,更加有消息指電視台希望可以搵到松隆子客串,唔知可唔可以同木村再續前緣呢?


喺《律政英雄》入面,最有代表性可以話係呢段樹蔭步徑,今季依然有出現,好懷念呀! 


撰文:關錦雯

    全站熱搜

    tvb4life 發表在 痞客邦 留言(0) 人氣()