登機證

旅行 旅遊 哈利波特魔法世界 日本 大阪 落戶

Ads by Google

日本人一向對主題公園趨之若鶩,就像被施魔法一樣着迷。
7月 15日,「哈利波特魔法世界」於大阪環球片場正式開幕,超過 3,000人於熱到溶的天氣下等入場。究竟是被施魔法定俾人落降頭?
耗資約 34億的新園區,將哈利波特電影中的場景一一重現,兩個機動遊戲、八間特色商店、兩間餐廳,總佔地約八萬平方米,同美國奧蘭多環球片場嗰個差唔多大,近近哋已經可以朝聖,足以令一眾亞洲麻瓜為之瘋狂。
親身闖入魔法世界,本來不是忠實麻瓜的我也大呼過癮,乖乖地於盛夏下排隊玩 4K高清製作的機動遊戲,乖乖地掏錢買耳屎味 Jelly Beans,唯一覺得格格不入的,就是這裡的哈利波特講日文!

4K高清親身體驗 哈利波特電影場景


「鷹馬的飛行」一卡可載 12人,全程大約 2分鐘,坐上鷹馬飛越禁忌森林,途中會經過南瓜田等景點。 

大阪的哈利波特魔法世界耗時四年興建,同環球影城內一般園區唔同,淨係入口已經花盡心思,沒有明顯的指示牌,要從石陣走進去,經過約 50米的小路,才隱約見到霍格華茲城堡,到達活米村的拱門,正式進入魔法世界。
整個園區大概分為兩大部分,近大門口的活米村,以及後面的霍格華茲城堡。入得樂園,梗係先去玩機動遊戲,魔法世界內有兩款,最受歡迎是於城堡內的「哈利波特禁忌之旅」。同款遊戲喺奧蘭多的環球影城都有得玩,日本呢個係加強版,善用整個城堡嘅空間,人龍於城堡內排長龍時,可以重溫電影系列的主要情節。唔好以為只係掛啲畫、播吓片咁簡單,利用投射技術令哈利仔、妙麗同榮恩現身,見到一班主角玩走堂,即使已經排咗兩個鐘, fans們嘅疲倦好似一掃而空,呢招真高明。終於到戲肉,四個人一架過山車卡,特點是吊腳式打橫行面向熒幕,配合 4K高清影像技術,就好似身處影像中與哈利仔一起經歷整個小說系列的重要場口,上場玩魁地奇球賽、打禁忌森林內的蜘蛛等等,比奧蘭多嗰個更逼真。親身試玩過之後覺得最正係望唔到左右前後的其他客人,感覺就好似真係同哈利波特一齊冒險,轉彎位又快又急速,全程五分鐘好好玩。玩完出嚟去埋相連的「飛七沒收品百貨店」,自然特別容易跌錢。
另一款遊戲,係城堡隔籬的過山車「鷹馬的飛行」,以魔法生物鷹馬為藍本製成過山車,一望就知唔算高,純粹係俾麻瓜們扮吓魔法學生騎魔法生物,都要排成個鐘至有得玩㗎!

 

 


「鷹馬的飛行」喺獵場管理人海格的引導之下展開訓練飛行,排隊時見到海格小屋。 

講明係一家大細的合家歡過山車,沒有旋轉等離心力強勁的位置,以速度取勝,驚嚇度一般。 

「禁忌之旅」係 3D過山車遊戲,為慎防有物品跌入路軌,一進入城堡,遊客就要先將隨身物件放入儲物櫃,淨係拎住手機去排隊,小朋友一身輕周圍跑呀。

排隊排到去肖像室,牆上的畫會郁會傾偈,氣氛陰森恐怖,都幾驚! 

霍格華茲城堡下的正門,就是「哈利波特禁忌之旅」的入口,烈日當空可以喺室內排隊,零舍唔同。 

樓底勁高嘅校長室,有投影出來的鄧不利多校長,向遊客訓話及講歷史。

城堡門口的兩條石柱,晚上會亮燈,投射出「禁忌之旅」的英文名,特別有 feel。 

霍格華茲城堡下的正門,就是「哈利波特禁忌之旅」的入口,烈日當空可以喺室內排隊,零舍唔同。 

「禁忌之旅」用上 4K高清技術,畫面更流暢更逼真,而畫面多數來自電影中出現過的場景,粉絲們特別容易代入。 

玩完即刻去「飛七沒收品百貨品」買紀念品,呢隻分類帽其他鋪頭無㗎! 

七大商店紀念品買到窮


入夜後的活米村更接近電影世界,夜孖孖先似魔法世界。 

喺小說同電影入面,主角們最喜歡去活米村打躉,喺大阪呢個魔法世界內,就重現了整條活米村,打造成為商店街,多間商店的布置及紀念品,都跟電影情節有關。起初我唔明,點解要分咁多間,原來每間鋪賣嘅嘢都唔同,簡單嚟講,就係麻煩見隊就排,間間都要入去兜個轉,先知有乜賣!以下精選每間商店的必買精品,各位麻瓜自己預定盤纏掃貨喇!

 

奧利凡德魔杖店
可以親自體驗魔杖守護人揀魔杖的過程,每次有大約 20個遊客一齊入房。揀中你講咒語,房間就會天搖地動,表示魔杖揀中你,仲可以買走呢支特別版。揀唔中嘅,一樣可以買普通版。


有幸被守護人揀中,可以即場揀魔杖,每次施嘅魔法都唔同,呢位妹妹就係一瞬發光。 

店內有各位主角使用的魔杖,哈利波特嗰支最受歡迎。($260) 

 


整間店有各種各樣的整蠱用品,刻意排得雜亂無章,要搵心頭好就要慢慢搵。 

桑科的惡作劇商店
電影中出現過的惡作劇玩具,都可以喺呢度搵到,如伸縮耳、假牙等等,內部裝修同電影一模一樣,仲不時會噴氣同發出怪聲,排緊隊都冷不防嚇一跳。

 


郵局外的貓頭鷹廣場,每一小時有真貓頭鷹出嚟報時,大受歡迎。 

貓頭鷹郵局
活米村中有送信的貓頭鷹,呢度就有明信片同郵票出售,即場寫完寄出,仲有活米村郵戳,手信首選。

 


校服主要配件之一的長襪(約$90),買咗可以平時出街著,好多女麻瓜四隻色買晒。 

風雅牌子巫師服飾店
日本獨有的商店,女麻瓜必到之處,有各種巫師服裝及飾物,著上身都唔似玩 cosplay,日本果然是潮流大國。

 

德維及班吉魔法道具店
出售各種魔法用具,如飛天掃帚、咬人書等等,賣大件玩具較多,小朋友可以試玩一輪先買。


查實我知道呢把飛天掃帚($266)唔會飛,又唔可以掃地,但掃帚頭識發光,如果解決到如何拎返香港的問題,我一定買。 

 


柏蒂全口味豆($130),包裝跟足電影,我食晒成包都好似無耳屎味,有啲失望。 

蜂蜜公爵
活米村中最受歡迎的商店,色彩繽紛的裝潢加七彩的糖果,令人購買慾大增。霍格華茲學生們最鍾意嘅柏蒂全口味豆同朱古力蛙,隨時斷貨,有買趁手。

 


望遠鏡同星象儀都係用金屬造,拎上手咁墜手,都知唔平,超過$2,000,真係要好忠心嘅麻瓜先買得落手。 

自作聰明的魔法裝備店
另一間日本有美國無的商店,除咗有校服校呔,賣嘅魔法用品較貴,指南針、望遠鏡之類,不過一分錢一分貨。

奶油啤南瓜汁食盡戲中美食


園區內有得玩顏面彩繪,可以將魔法學校的校徽畫上面($190),不過大熱天時,個妝好容易化開。 

喺魔法世界玩到餓,就要嚟到「三根掃帚餐廳」,係小說入面魔法學校師生最愛的餐廳,以英國傳統料理為主,烤雞、烤豬肋骨,炸魚薯條等等,選擇不多但水準不俗,人多嘅話叫碟 The Great Feast,有晒咁多樣嘢食。相連有「豬頭酒吧」,當然要試吓哈利波特最喜歡嘅奶油啤酒。雖然叫做啤酒,其實係無酒精,就好似忌廉汽水,入口甜甜哋,小朋友都飲得。園區裡面仲有兩架「奶油啤酒卡車」,唔使一定要入酒吧排隊買。另一飲品選擇係同樣於電影及小說中出現過的南瓜汁,街頭檔口有售,仲有榮恩最鍾意食的芝士牛肉三文治,味道一般,不過又係 fans必食之選。
買完紀念品,食完大餐,做龍友必去九又四分三月台搵完站長影相,仲有乜好做?不妨去霍格華茲城堡外的廣場睇表演,有時係青蛙合唱團表演校歌《 Double Double》,有時上演魔法三強錦標賽跳絲帶舞,先唔評論好唔好睇,氣氛真係一流,猶如將在場的麻瓜團結一起!

 

 


學生手捧着青蛙演唱的青蛙合唱團,全程 acapella同 beatbox,聽出耳油。 

三根掃帚內的炸雞餐($144),算不上好味,一般主題樂園餐廳質素,算是食得飽。 

「三根掃帚餐廳」跟奧蘭多的裝潢大同小異,由於座位多,只要避開正午食晏時間,等半個鐘就有得食。

同餐廳相連的「豬頭酒吧」,賣奶油啤酒,可以連埋個杯買($80)。外賣膠杯裝則平一半,街頭卡車都有,排隊快好多。 




另一必影位係門口的霍格華茲特快車,火車會噴蒸氣,站長亦非常友善,一定要搵佢合照。 

園區內有多架小賣車,有冰凍的南瓜汁($60)加榮恩最愛的芝士牛肉三文治($65),可以一邊排隊一邊食。

日本環球影城

地址:大阪府大阪市此花區櫻島 2丁目 1番 33號
電話:(+81) 5-7020-0660
網址: http://www.usj.co.jp/hk/harrypotter 
營業時間: 9am-10pm(由於營業時間每天不同,建議先上網查詢才出發)
交通:由 JR大阪車站乘坐夢咲線至環球城車站,需時約 15分鐘
入場券:環球影城一日通行券成人$520、 4至 11歲小童$360
注意:要確保可以入場,建議先在港買套票。一日通行券連哈利波特魔法世界確認券加 JR Kansai 1Day Area Pass:成人$880、 4至 11歲小童$640。查詢:日航天地旅遊;網址: http://www.jalselect.com.hk ;電話: 3429 1278

旅遊資料


城堡及活米村以黑湖隔開,係日本園區獨有的設計,黃昏時城堡的倒影照在湖上,甚有詩意。 

簽證:持特區護照及 BNO均毋須簽證
機票:日本航空每天有四班與國泰聯營直航機來回大阪關西機場,機票連三日兩夜天滿橋京阪酒店套票及日本環球影城通行券連哈利波特魔法世界確認券,約$4,730起/位,查詢:日航天地旅遊;網址: http://www.jalselect.com.hk ;電話: 3429 1288
貨幣: 100日圓約兌 HK$7.6(文中價錢以此匯率計算)
鳴謝:、日本環球影城

攻園錦囊

哈利波特魔法世界座落環球影城東南方,位於 Wonderland和大白鯊之間的森林,入口沒有明確指示,看到亂石陣再沿小路走進去即達哈利波特園區。
園區每日限六千人進場,額滿即止,海外遊客可以先於當地旅行社買套票確保入到場。如到場才買票,就要於園區外拎入場整理券,被編至不同時段入場,先到先得,名額爆滿就下次請早。
園區分為兩個大區,建議早上入到去,先去玩兩個機動遊戲,輪候時間會較快,下午再去活米村掃貨,記得等到入夜欣賞埋城堡及活米村的夜景先離開。



行入魔法世界的小路上,有曾經於《消失的密室》裡出現的飛天車,日本獨有,奧蘭多無㗎。 

整理券其實即係派籌,最好一入到樂園先去拎飛,再去玩其他機動遊戲,玩完應該差唔多時間入場。

撰文:關錦雯
攝影:陳偉傑

    全站熱搜

    tvb4life 發表在 痞客邦 留言(0) 人氣()