趙又廷高圓圓年底擺酒
鍾鎮濤8.24娶范姜

Ads by Google


■阿B同范姜風雨同路17年,下月24日終於係峇里舉行婚禮。資料圖片

鍾鎮濤(阿B)同范姜素貞(范姜)17年嘅愛情長跑好快就結束,本報兩個月前率先爆料話佢哋會喺下個月結婚,噚日就有雜誌報道指婚期已經落實喺下個月24日,假印尼峇里大搞為期五日四夜嘅婚禮,到時仲會邀請過百位親友見證。日前阿B仲親身到灣仔家事法庭,目的係要補領番離婚證書,做好一切手續,就開開心心飛去峇里正式娶范姜過門做鍾太。噚日馮仁昭致電阿B,電話一直冇人回應,而范姜就身在巴黎,欣賞香港時間今朝凌晨喺當地舉行嘅Valentino高級訂做服時裝騷。


■高圓圓剛與趙又廷結婚,有指兩人為避開周董婚期,決定提早舉行婚宴。資料圖片

避搶周董風頭

另外,上月頭喺北京領證結婚嘅趙又廷同高圓圓,原定下年1月會喺台灣補擺喜酒,但係計劃突然有變,原因有指趙又廷因為知道咗周杰倫(周董)同樣喺明年1月結婚,為免互搶風頭,所以決定將婚宴提早到今年12月,仲有消息話高圓圓已經喺台灣四出搵酒店,為提早嘅婚宴做準備,對於係咪避開周董提早舉行婚宴?趙又廷經理人Vicky回應話:「藝人雙方都是低調的人,私事由他們決定,公司不代回應。」
撰文:馮仁昭

    全站熱搜

    tvb4life 發表在 痞客邦 留言(0) 人氣()