美斯現時有四個入球,剩低兩場賽事,仍然有力挑戰占士洛迪古斯的六球,衝擊神射手寶座。 

決戰巴西

雲高爾 vs美斯

Ads by Google

今屆世界盃,最佳教練,雲高爾贏硬!
繼抽走尹佩斯換入亨特拉爾氣走墨西哥之後,對哥斯達黎加的八強戰,荷蘭在臨完場一分鐘調入後備門將告魯爾專門守十二碼都夠膽,唔到你唔服。
四強戰,再對南美球隊,阿根廷有迪馬利亞步尼馬後塵因傷休戰,得番美斯獨力支撐,但荷蘭依然係被睇低的一隊。如果你信雲高爾勁過睇波睇到幾乎仆低的沙比拿(阿根廷教練),你應該識揀捧邊隊。

希古恩幫拖

阿根廷四大神鋒,除美斯外,本來要數迪馬利亞表現較好,可惜八強戰對比利時,上半場已經因大腿受傷被迫離場,四強戰對荷蘭肯定缺陣。
阿古路因傷缺態,即使趕及復出,也難以寄予厚望。好在希古恩俾馬勒當拿公開剷完一鑊後,終於回勇,入到一年以來第一個國家隊入波外,最重要回復過關斬將的信心。事關希古恩同阿古路其實一樣,季尾階段受過傷,幾乎連入選國家隊都成問題。趕得切康復,三場分組賽的表現又大受批評,搞到人人狂踩沙比拿將阿根廷變成美斯一人球隊。
如果希古恩只係曇花一現,咁就大鑊,阿根廷得番柏拉斯奧同拿維斯兩位後備前鋒,落過場,表現更平常。講攻力,荷蘭三劍俠似乎更可靠。


兩年前,雲高爾第二度執掌荷蘭,接下歐洲國家盃分組賽出局的爛攤子,經過今次決賽周,奠定神級教練地位,一洗 2000年連累荷蘭入唔到世界盃決賽周的恥辱。 

7號仔迪馬利亞拉傷肌肉,預期緣盡決賽周,轉個頭又話阿根廷入到決賽,會堅持上陣。無論迪馬利亞出唔出到, 9號仔希古恩的重要性也大增。 

尼祖迪莊缺陣

荷蘭一直以來最大問題係唔夠團結,今年,史無前例咁和諧。
正選門將施利臣上場被換走,發了一陣脾氣,好快已經衝上去同告魯爾慶祝,事後仲鄭重道歉。爭奪神射手的洛賓,搏到十二碼,竟然主動問亨特拉爾有冇信心主射。嘩,兩年前的歐洲國家盃,邊有可能發生?
尹佩斯與洛賓本屆一直保持上佳狀態,史奈達亦逐漸回復應有水平,加上小朋友迪比證實有能力,荷蘭的進攻力其實不會比阿根廷差。最大隱憂反而落在尼祖迪莊的缺陣身上。冇咗尼祖迪莊作為防線第一道屏障,荷蘭被迫將戴利白蘭特推前一格,踢法上一定較為保守,但荷蘭後防實力有限,近兩場雲高爾已經要用到前鋒古積特墮後去踢後防。對哥斯連黎加,荷蘭主攻,問題尚且不大;對阿根廷,有馬斯查蘭奴有加高等頂級防中,荷蘭無咗尼祖迪莊,就爭好遠。


尼祖迪莊( 6號)去屆決賽用穿心腿踢沙比阿朗素,可見踢法。據聞將會跟隨雲高爾過檔曼聯。 

古積特本身踢前鋒,後改踢中場,今屆變成後防,其實暴露了荷蘭的人腳確實有限。 

洛賓搶鏡,但 10號靈魂史奈達向來是大賽球員,入到四強,值得期待。

雲高爾的神奇換人

講到底,焦點都落在雲高爾的神機妙算。
唔計淘汰賽階段兩個神奇調動助球隊出線,如果你諗番分組賽,你會發覺雲高爾次次在逆境下換人都有料到。
分組賽第二場,對澳洲,半場打和之際,雲高爾抽走後衞馬田斯恩迪,打多一個快翼,換入迪比,結果迪比在下半場遠射得手,助球隊取勝。
分組賽第三場,對智利,爭取首名出線, 0:0無紀錄直到 75分鐘,雲高爾換走名氣最響但無甚表現的史奈達,換入只效力諾域治的無名小卒利萊費亞,兩分鐘後,利萊費亞打破悶局,結果荷蘭贏 2:0,避開對巴西。
你還有什麼好說?
至於阿根廷教練沙比拿呢?暫時來說,大家只記得他在上場對比利時,見到希古恩射門中楣,重心向後移,幾乎成個人仆低似被昇龍拳打了一鎚的一幕……


告魯爾效力紐卡素,本身雖然接近兩米高,但撲救十二碼的往績平平無奇。換佢入場,其實似打心理戰,一出場就同哥斯達黎加班球員講話知清楚你會點射,唔淆底? 

只有二十歲的迪比,效力燕豪芬,現時已有兩個決賽周入球,極大機會過檔英超豪門。 

狀態無比飄忽的亨特拉爾逢踢大賽必隱形,今屆當上尹佩斯後備,效果卻奇佳。 

兩場淘汰賽,利萊費亞都因傷無份落場。老實講,我相信對阿根廷,就算無傷,應該都無份,輸咗,爭第三,就會有。 

撰文:方俊傑
圖片提供: AP

    全站熱搜

    tvb4life 發表在 痞客邦 留言(0) 人氣()