電視精

李準基搶收視 靠神槍手

李英愛宣布唔拍《大長今 2》,失望程度僅次於南韓喺世界盃出局。
古裝劇喺韓國一向有收視保證,電視台嗱嗱聲推一套出嚟應急止渴,搵李準基演最拿手嘅動作古裝劇,夥拍老拍檔南相美,喺《朝鮮神槍手》入面棄劍揸槍,希望可以食住古裝劇強勢搶觀眾。
阿豬媽睇開歌頌天下太平的長今,打打殺殺唔知受唔受呢?

Ads by Google

製作媲美荷李活電影

韓劇年頭係威係勢:《來自星星的你》帶來過百億經濟效益;《奇皇后》高收 33.9%,仲勁過《星星》。可惜兩套重磅劇播完,之後就無以為繼,即使有口碑,大結局收視始終徘徊喺 13、 14%左右,搞到電視台頭都痛埋,於是寄予厚望喺新劇《朝鮮神槍手》上。《朝鮮神槍手》背景是 19世紀朝鮮年代,當時外國思想湧入,用火藥嘅槍械亦開始被使用。李準基飾演朝鮮第一劍客兒子,係武功高強嘅二世祖,後來父親被殺,為報仇而踏上神槍手之路。套劇電視台籌備超過兩年,絕對稱得上係大製作。攝製隊仲走訪韓國各地搵靚景,起碼唔會同之前嘅劇撞景。拍攝器材方面都好講究,用上拍電影嘅攝影機,第一集以一場打戲開場,非常精彩,高水準直逼電影,網民大讚,收視亦好好,第一集就有 9.1%,係最近開播成績最好嘅劇集之一,睇吓會唔會有頭威無尾陣喇!


《朝鮮神槍手》 sell大製作,好多打鬥場面都揼本拍攝,規模同電影有得揮。 

李準基嘅鳳眼散發一種魅力,邪邪地,做二世祖最襯。 

開場南相美要女扮男裝,俊美中帶點清秀,不過有觀眾投訴,頂帽太大遮住佢個靚樣! 

李準基演出古裝劇經驗豐富,今次係耍劍高手,功架十足。 

繼《狗與狼的時間》再碰頭

最近韓劇鍾意搵合作過嘅熒幕情侶再拍檔,好似李東旭李多海、張赫張娜拉、權相佑崔智友等等,《朝鮮神槍手》搵嚟李準基搭南相美。佢哋 2007年合作演出《狗與狼的時間》,當年平均收視 15.1%,今次相隔 7年再次合作,觀眾非常期待。李準基可算是當今韓國演藝圈最好打嘅男星,全靠當年《狗與狼的時間》將佢嘅戲路擴闊,由花美男轉型做打星,所以今次再拍打戲特別落力。李準基劇中飾演劍客,喺片場劍不離手咁練習,希望可以更加純熟。除咗打戲認真,談情戲份一樣足料,講明唔會淨係打打殺殺,男女主角嘅感情線都好重要,講求李準基同南相美之間嘅默契。兩位雖然 7年無合作,不過記者會上就大讚對方成熟咗好多。第一集已經有一齊睇煙花嘅浪漫場面,之後情敵韓周元出場,大玩三角戀,追看性立即大增!


7年前李準基 25歲,南相美 23歲,非常幼嫩, 7年後成熟咗,反而無咁生硬。 


李準基及南相美繼《狗與狼的時間》,相隔 7年再次合作新劇《朝鮮神槍手》,開播之前幫時裝雜誌影靚相,古裝時裝一樣咁襯。

撰文:關錦雯

    全站熱搜

    tvb4life 發表在 痞客邦 留言(0) 人氣()