So Comment

九龍都有出色雲吞麵 

千家客 地址•佐敦上海街 164號地鋪 電話• 2736 6912(乙) (蘇施黃)

Ads by Google

九龍冇好雲吞麵…… why?
香港啲雲吞麵老字號話雲吞麵係關西食物,而當時關西人來港,食住在港島,像北角好多福建人、西環好多潮州人,所以雲吞麵喺香港興起,亦比較正宗。

「牛」師傅

65歲嘅「牛」師傅每日由早上 6點做到晚上 12點,佢從不覺辛苦,反而好 enjoy佢嘅工作,再同「牛」師傅傾吓偈,大吃一驚!雲吞麵嘅雲吞當然係佢做,連麵都係佢做的,仲話加咗蛋㗎。粥又係佢煲,油炸鬼係佢炸,腸粉又係佢做粉漿,自己蒸、牛腩佢炆、豬手佢炆……嘩!「牛」師傅係咪欠個跌打師傅?!

食物

雲吞麵$28
下午茶餐$35加一碟油菜
雲吞好食,可以多少許麻油
麵亦好煙韌
我覺得湯底可以改進少少,冇大地魚味,唔夠香濃,但唔明點解用咁大隻碗?!


 

水餃$38
大細適中,唔錯。

 

清熱芥菜鹹軟排骨粥$38
個名好吸引,粥底亦好靚,好綿,好期望食鹹軟排骨,可惜有些豬臊味。

 

南乳豬手及原汁牛筋腩$70
我自己衰,叫兩溝。但豬手係南乳味,牛筋腩乃係用花椒八角炆,根本唔同味,係我的錯。
但豬手啲皮既爽又腍,最好係多皮多骨少肉。牛筋腩亦好味,不過牛腩太瘦了。

 

炸両$28
油炸鬼係自己炸,「牛」師傅自己用傳統石磨磨米,用布拉腸粉,腸粉好有米味,好食,油炸鬼又脆,但係豉油比較鹹,要甜一些更好。

 

總括來講,可以話喺九龍一大發現,「牛」師傅好嘢!有人欣賞,辛苦極都係值得!

千家客

地址•佐敦上海街 164號地鋪
電話• 2736 6912

蘇施黃

資深電台人,天生異「口」,除了講嘢叻,食嘢同樣嘴刁,近年開咪、上電視做主持都不離教人食得精,吸引大批粉絲跟佢搵食。


攝影:蘇施黃

    全站熱搜

    tvb4life 發表在 痞客邦 留言(0) 人氣()