靚抽王

我衰故我在

荒謬現象學
每期荒謬現象學為你解構娛圈嘅不尋常現象!

Ads by Google

社會有怨氣,呢個時候,除咗需要蝙蝠俠、長毛之類嘅英雄為民請命,最緊要係有出氣袋俾大家出氣。
哲學家笛卡兒話「我思,故我在」,但係有啲人就係「我衰,故我在」,因為佢哋唯一嘅貢獻,就係透過處處派膠嘅行為,令到大家有抽水/宣洩怨氣嘅機會……
今期荒謬現象學就揀選咗 2014頭半年嘅十大必抽人物!排名有分先後:

第 10位:我叻故我在

荷蘭叻
一向認為自己好叻嘅叻哥,近日喺世界盃節目頻頻出現,前幾日佢熱捧嘅荷蘭險勝墨西哥,又俾佢牙斬斬嘅機會,令到網民對佢認叻嘅行為羨慕又妒忌。
識抽嘅一定抽佢:
我都好想好似阿叻一樣咁「好運」囉。

第 9位:我咬故我在

蘇亞雷斯
蘇先生已經係第 3次咬人,今次仲要喺世界盃。除咗買咗烏拉圭嘅朋友想買起佢,就連利記嘅球迷都頂佢唔順,認為佢應該戴狗口罩先上場。
識抽嘅一定抽佢:
應該幫牙膏賣廣告。

第 8位:我膠故我在

膠猴
大台足金膠劇《西遊記》已經播完,漫長嘅膠劇播幾耐就俾人插幾耐,膠猴早已成為膠劇嘅代名詞。
識抽嘅一定抽佢:
件馬騮衫條拉鏈太貴。

第 7位:我賤故我在

彭順
小三事件令到彭大導登上娛樂頭條,其一腳踏兩船仲要通街錫錫嘅賤行惹嚟非議,令佢成為世紀賤男。
識抽嘅一定抽佢:
明明彭發可以話嗰個係自己嚟,幫佢大佬頂,不過佢冇咁做,果然係幫理不幫親!有種!

第 6位:我胖故我在

李偲嫣
偲嫣 BB聲稱要為抗議而絕食至死,結果由於佢胖,仲頂得順,所以先未死仲喺度,最終喺親友勸止下完成鬧劇。結論係:絕食失敗,減肥成功。
識抽嘅一定抽佢:
纖體公司應該掌握商機搵佢做代言,不過整容另計。

第 5位:我厚故我在

厚多士小姐
自由行令到社會怨氣激增,厚多士小姐喺地鐵度食嘢被勸止時大叫「厚多士」,「你又唔係梁振英!」,令到網上改圖潮語滿天飛。
識抽嘅一定抽佢:
如果你遇到嘅係振英哥,你一早俾「黑影」捉走再喺車上面打啦!

第 4位:我準故我在

LuLu
董嘉儀 LuLu喺世界盃成為燈神,雖然魔咒已破,但一舉一動都成為必抽之選。
識抽嘅一定抽佢:
可唔可以得閒着下寫住「 689」字樣嘅波衫呀?

第 3位:我黑故我在

我故我在

第 2位:我惡故我在

TVBuddy
網民認為(唔係我哋話,係佢哋話咋!) TVBuddy除咗好事之外,似乎乜都夠膽做,包括:抄劇、製作膠劇、一有乜事就借《東張西望》嚟為自己護航、對待員工刻薄等等……
識抽嘅一定抽佢:
咦,黃金時段嘅收視率又跌咗喎,又多咗進步空間喎!快啲喺強國買多兩套膠劇啦!中國四大名著仲有《水滸傳》、《紅樓夢》、《三國演義》,播齊四套,唔知會點呢?

第 1位:我紅故我在

特首
佢有幾「紅」,相信大家都知,近日就連佢囡囡都抽佢水,睇嚟只要有香港人嘅地方,自然會將佢抽乾。
識抽嘅一定抽佢:
如果你喺街上見到特首,不妨同佢寒暄幾句:「咦!特首?你喺度嘅?幾時又請假呀?」


撰文:娛文樂

    全站熱搜

    tvb4life 發表在 痞客邦 留言(0) 人氣()