非港劇讀

《高校處世王》愛•炒在一起

話咁快又到七月,又有新劇排住隊播。 tvN收費台嘅月火劇(逢周一、二播)就醒喇!早兩星期開始播《高校處世王》,食咗頭啖湯,仲將幾套劇嘅精髓炒埋一碟。好似歌手徐仁國一人分飾兩角演兩兄弟,就同權相佑喺《野王》一樣。女主角李荷娜嘅冇化妝老土衣着打扮,又似足陳喬恩當年嘅《命中注定我愛你》「便利貼女孩」造型。但咪理佢哋有幾多成係借橋,最緊要套劇輕鬆冇壓力,觀眾睇得 happy,收視仲唔錯㖭!

Ads by Google

睇開韓劇嘅,可能會問電視台點解咁夠膽用拍劇唔多嘅徐仁國做男主角,帶住向來做開配角嘅李荷娜同 model出身嘅李秀赫拍《高》劇?查實成功在嘗試嘅,好似徐仁國本身就係一個奇蹟!
睇番佢 2009年參加 Mnet音樂節目《 Super Star K》第一季比賽,就以 72萬分之 1嘅比率,打低過萬對手,奪得冠軍。 2012年又因接拍劇集《請回答 1997》,令佢成功入屋,人氣急升。呢啲都係同一電視台 tvN嘅功勞。至於李荷娜出道 8年,演出嘅劇集只係得 6部,仲要做親都係主角個妹、好友、同事嘅閒角。但係唔緊要㗎!肯捱嘅話,機會始終會輪到你,今次就直升坐正女主角。嚟緊劇情仲會安排兩男追佢,呢啲咪運囉!


台劇《命中注定我愛你》成為 05年收視之冠,陳喬恩呢個「便利貼女孩」造型,好深入民心。 

啱啱嚟咗香港拍劇嘅權相佑拍過《野王》同《 A貨貴公子》,都係飾演孖生兄弟,估唔到又俾人借橋嘞。 

型男變身徐仁國參加歌唱比賽嗰陣未修身,身高 180,但係體重超過 200磅,外形就係爭咗少少。

為咗要上鏡,徐仁國都幾俾心機減肥,有幾年時間淨係食烚雞胸肉修身,又俾佢成功變咗型男喎!睇下變身後,幾似《吸血新世紀》嘅型男主角。 

男配角李秀赫(左)未拍劇前,以 184身高,登上倫敦同巴黎時裝周舞台,成為亞洲知名模特兒。不過最為人熟識嘅,係佢同 G Dragon好 friend。 

李荷娜以前知名度一般,出席電視台年底嘅頒獎禮,總係以「事業線」搶鏡。進取最終有運行呀!

學生頂包做部長

《高校處世王》話明係輕鬆喜劇,當然唔使太用腦去睇。劇情講高中生李敏碩(徐仁國飾)平時只係鍾意打冰上曲棍球,唔鍾意讀書。有一日收到外貌餅印一樣嘅胞兄李亨碩(徐仁國分飾)電話,要求佢頂包,去大企業做部長。喺工作嘅過程,佢就遇到外表老土又冇自信嘅臨時工鄭秀英(李荷娜飾),又經常同老闆個仔劉振宇(李秀赫飾)意見不合。因為李敏碩要隱瞞佢學生嘅身份,當然就搞出好多笑料啦。


李敏碩初遇鄭秀英,見佢醉酒瞓街,即刻打俾劉振宇,叫佢照顧鄭秀英。 

鄭秀英暗戀劉振宇,收到對方電話要睇文件,即刻搽唇膏打扮,點知畫到出晒界,仲俾人誤會打完茄輪。佢呢個樣,同《命中》陳喬恩嘅造型,完全係「異曲同工」啦。 

李敏碩做雞仔媒人,搞到女方尷尬出醜,為𠱁番佢,李敏碩捱咗一拳。呢啲到最後,梗係打出感情啦。 

李敏碩(中)知道鄭秀英冇自信,成日夾喺佢同太子爺劉振宇中間,想幫佢哋製造機會,點知弄巧反拙。 

撰文:張韋弘

    全站熱搜

    tvb4life 發表在 痞客邦 留言(0) 人氣()