九十五分鐘助攻得手, C朗一樣一臉憤怒,完場後嬲到掟水樽。歐聯決賽已經紮住上陣,據聞膝頭傷患嚴重,真係仲要頂落去?咁葡萄牙真係靠晒佢喎。 

決戰巴西

C朗 0.01希望

Ads by Google

天生宿敵,美斯憑一己之力,完場前絕殺伊朗,助阿根廷出線; C朗同樣臨完場成功助攻,可惜葡萄牙只能扳平美國,出線危危乎。
最後一輪分組賽,葡萄牙大戰加納,只要美國同德國乖乖打和, C朗入十粒都要出局。講到自己身受重傷即使犧牲前途都要為國出戰咁嚴重嘅 C朗,九成九做今屆世界盃最悲情的主角。

踢多一場

葡萄牙對美國,比比停賽,干查奧因傷離隊,後防大亂,但開賽五分鐘,被遺忘的拿尼趁美國防守出錯,意外破網。上半場,葡萄牙領先 1:0。
賽前, C朗又話要終止操練,又俾人影到敷住幾斤重嘅冰,仲話個隊醫恐嚇 C朗堅持出賽分分鐘要收山,偉大的 C朗仍然堅持己見,紮住上陣。全場表現無乜,俾美國反超前 2:1,以為葡萄牙等住出局之際,又斬番球靚波俾華利拿頂入,追和 2:2,吊一吊命。但你睇睇入波後,葡萄牙的球員、教練、球迷,個個死氣沉沉,你就知咁樣吊命法其實只係買個假希望。
最嬲一定係皇馬。如果葡萄牙輸波,無得爭出線, C朗下場大條道理唔使出場,家陣拎住一分,下場如果大炒加納,數字上仍然有機會爭取次名出線,睇怕 C朗一定再頂硬上,咁搞法,下季仲使踢皇馬?


對德國的分組賽,比比用頭撞湯馬士梅拿,拎紅牌,好在只被罰停賽一場,週四深夜對加納可以復出。好在? 

喺曼聯冇份出場嘅拿尼( 17號),除咗開局時入一球,餘下時間無乜表現,狀態返唔到幾年前的水平了。 

兄弟走線

葡萄牙對加納的同一時間,美國對德國,只要兩隊打和,就齊齊出線,就算分出勝負,落敗一方仲可以計得失球差,形勢確實大好。尤其德國,家陣有成正四球得失球差,玩起嘢上嚟輸俾美國,要次名出線仍然十拿九穩,咁就可以避開上線,改打對手好似整體較弱的下線。以德國對加納嗰種睇定嚟食的打法,大膽到如此地步都唔出奇。
不要忘記,美國的教練叫奇連士文,德國人,球員時代司職前鋒,曾經替德國摘下 90年世界盃冠軍,又以教練身份帶領德國殺入 06世界盃季軍,德國現任教練路維當年係奇連士文助教,德國現任隊長拿姆由奇連士文一手提拔。
咁, C朗的葡萄牙又點出線呢?


奇連士文同德國關係密切,德國又唔係非勝不可,美國出線在望啦。我反而唏噓當年的金色轟炸機今日的髮線。 

德國教練路維,三番四次被影到挖鼻,真性情! 

搏美斯神射手

贏波就是贏波,面對弱隊伊朗,阿根廷一籌莫展,好在美斯喺補時階段入波救命,僅勝 1:0,否則,輸死好多人。
出到美斯、希古恩、阿古路三大射手,再加埋歐聯決賽最佳球員迪馬利亞,但阿根廷前兩場踢來毫無組織,射門都欠奉,究竟係刻意留力抑或教練沙比拿搞唔掂?買阿根廷捧冠軍就無謂,反而可以考慮一下已經入咗兩球嘅美斯做神射手喎,阿古路同希古恩狀態低沉,睇沙比拿的賽後言論,一時話有美斯就乜都掂,又話歡迎美斯隨時批評自己,簡直係當美斯上帝一樣,美斯就老實不客氣,開晒聲話要求阿根廷打得更加進取,結果陣式立即由 5-3-2改成 4-3-3,你會以為美斯至係阿根廷的教練。有理由相信,美斯喺之後的比賽大條道理更加獨食,乜嘢波都可以自己射晒。
妒忌死 C朗了。


作為阿根廷教練,三年前一開始已經任命美斯做隊長,放棄徵召麻煩友迪維斯,擺明車馬靠美斯打救多過靠自己功力。 

喺曼城傷多過踢,以為抖夠,來到國家隊,阿古路連射門機會都無乜。 

俾美斯點名要踢前啲嘅迪馬利亞,踢翼,本來負責出波,但似乎所有光芒都在歐聯決賽用清了。 

球王就係球王,一掂波俾三個對手包圍,全場受制,到補時階段就係可以偷到一個位拉入世界波,我依然睇好阿根廷捧盃。 

撰文:方俊傑
圖片提供: AP

    全站熱搜

    tvb4life 發表在 痞客邦 留言(0) 人氣()