《花樣爺爺》由綜藝節目玩到拍劇,仲搵嚟型男金希澈加入,《花樣爺爺搜查隊》收視唔錯,最高超過 4%! 

電視精

花樣爺爺出劇

Ads by Google

以前讚人靚仔,最多都係玉樹臨風、英俊瀟灑,近幾年由日本引入詞語「花樣」,即係好似花咁靚,韓國電視節目係咁用:《花樣爺爺》、《花樣姐姐》等等,個個變晒花仙子。
上年韓國綜藝節目《花樣爺爺》大受歡迎, TVB立即整個《三個小生去旅行》。由你抄,反正韓國嗰邊已經進化,第二季《花樣爺爺》播完之後,緊接電視劇《花樣爺爺搜查隊》,加入埋 Super Junior嘅成員金希澈,延續爺爺們的歡笑,同真人騷一樣笑料百出!

菜鳥刑警忽然變老

旅遊真人騷《花樣爺爺》,講述四位韓國老牌演員李順載、申久、朴根瀅及白一燮一齊去旅行,去咗歐洲同台灣,收視高開好評如潮,仲贏埋上年「百想藝術大賞」嘅「綜藝節目作品賞」,食住個勢開第二季,原班人馬再去歐洲。不過人紅自然工作多,佢哋四個度期度到盡,先去得兩個國家,於是腦筋急轉彎,索性開套劇!搵咗年紀最大、 78歲嘅李順載,加埋兩張新面孔, 72歲嘅邊希峰同 62歲嘅張光,拍套搞笑偵探劇《花樣爺爺搜查隊》,講四位刑警調查兇殺案而被捲入陰謀,受化學品影響更加令其中三位急速衰老,唯有搵方法返老還童!講落好似《名偵探柯南》,調查當中又發生唔少笑話,娛樂性豐富。尤其是一班爺爺,要佢哋演繹後生心境,簡直係對演技嘅挑戰!


《花樣爺爺》第一季去過台灣,仲有少女時代成員 Sunny跟佢哋周圍玩。 

現實生活中當然無咁老嘅警察,李順載(右一)、邊希峰(左二)及張光(左一)穿起制服擺晒甫士,已經好有喜感。 

劇中每個爺爺都有自己嘅造型,張光伯伯負責搞氣氛,特別多搞笑場面,除剩底衫褲都得。

退伍後擔正試水溫

齋睇爺爺怕悶,所以加入 Super Junior風頭躉金希澈,吸引女 fans。金希澈扮唯一一位冇變老的警察,喺劇中主要作用係俾一班爺爺欺負,因為韓國一向好重視長幼有序,對年紀大嘅前輩要恭敬,佢同三位爺爺一齊查案嘅時候,明明係同年紀嘅同事,但就成日俾人誤會佢無禮貌,而爺爺們亦恃住自己年老嘅外表,成日欺負金希澈,好似有一集班爺爺俾口水咖啡佢飲,非常過癮。其實希澈上年年中退伍,但係 Super Junior遲遲未出碟,惟有參與綜藝節目 keep住人氣,首次復出拍劇當然不容有失。好彩一向都好鬼馬嘅希澈,和一班爺爺擦出火花,甚得前輩們歡心,大讚佢有潛質、無明星架子、有禮貌等等。所以話識得泊碼頭真係好重要,氹得班前輩咁開心,以後大把機會呀!


人紅真係大晒,「超級男二」崔振赫有份客串一角,做其中一位爺爺李順載嘅年輕版,收視即刻微升。 

金希澈鏡頭外同一班爺爺感情要好,經常上載花絮照到社交網絡,順便谷收視。 

金希澈喺 Super Junior入面係風頭躉,今次相隔 3年再演連續劇,一眾女 fans等到頸都長。

撰文:關錦雯

    全站熱搜

    tvb4life 發表在 痞客邦 留言(0) 人氣()