今時今日小朋友不是沉迷打機,就是搏命上興趣班, Mabel一家反潮流,趁端午節教囡囡落手落腳包糉尋根,仲約了外婆一同參與,三代人齊齊包糉講屈原。 

親壹親

細路包糉 細味舊文化

Ads by Google

六月二日就是端午節,但好多家長都話,今時今日細路仔沉迷打機、潮玩,多數不知端午為何物,只知有假放。
Mabel一家反潮流,每逢傳統節日就同囡囡炮製應節食物尋根,「呢一代愈來愈唔重視傳統節日,我唔想個女唔識傳統文化,所以我哋端午節會約埋外婆一齊包糉,除咗令囡囡認識節日意義,亦可以一家聚埋一齊,兼有共同話題。」
三代人,因為包糉而圍坐一枱有講有笑,不經不覺就玩了大半天。

 

任職註冊社工的 Mabel,在長者安居協會工作,特別重視與老人家維繫跨代感情。臨近端午節的星期六早上,她和丈夫預備了包糉的材料:糉葉、水草、糯米、綠豆、鹹蛋黃、豬肉放滿一桌,讓囡囡華華和外婆一起參與。「佢哋一個七歲,一個七十歲!」

三代包糉助溝通


華華手仔太細,包不到傳統糉,於是索性自己炮製一隻小型糉,就可以一手一腳自己包辦! 

未開始前,爸爸 Pierre、外婆不約而同話:「一年先包一次,有啲唔記得點包,等我快手試包一隻先!」兩位高手各自拿起糉葉,加入各種材料,三兩下功夫已用水草綁好,七歲的華華在旁睇得入神。
Mabel笑說:「呢位女婿同外母簡直惺惺相惜,每逢大時大節都會互送自家製食物。」原來爸爸在煤氣公司工作多年,公司每年皆有「送糉」慈善活動,員工亦會落手包,自然練得一手包糉好手藝,他包的糉呈三角形,賣相美觀,可媲美街外買的,婆婆好欣賞,「我成日都想包三角形,但包得唔靚,包到似枕頭。我當年結婚之後自學的,因為鍾意食糉,但出面買糉好貴。」
Mabel問華華:「你想學『爸爸糉』定『婆婆糉』?」華華答:「兩樣都學!」
每年包糉,華華都會幫爸爸落材料,「華華你幫我落兩湯匙米、一湯匙綠豆,再放鹹蛋黃同埋豬肉。」華華按指示逐樣照做,豬肉太大件,夾得好吃力, Mabel笑說:「弊啦你唔識揸筷子!」幾經辛苦夾到之後,再按爸爸指示,鋪上綠豆和米,因為華華手掌太細、又不夠力,所以包紮的工序由爸爸來做。

自創「細路糉」


傳統鹹肉糉會放上綠豆、豬肉及鹹蛋黃做配料。 

Mabel怕華華太悶,提議道:「不如試吓自創隻小型糉啦!我哋一齊研究好唔好?」華華立即叫好,於是二人合力,將每款材料的分量減少,媽媽幫忙將豬肉、鹹蛋黃剪成小片,華華攤開小手掌嘗試包紮,媽媽在旁一路鼓勵她:「你試吓自己綁條水草,拉實啲,努力!」完成後華華開心得高舉雙手大叫:「 Yeah!」媽媽說:「好靚呀,係迷你版『婆婆糉』。」華華話:「我要試包大糉,今次成隻都要自己整。」
Mabel問華華知不知道端午節是為紀念誰,見華華似懂非懂, Mabel耐心地說:「個故事已經二千幾年㗎喇,主角係個愛國詩人,亦係朝廷官員嚟……」華華插嘴:「官員?係咪即係梁振英呀?」 Mabel答:「唔係梁振英,佢姓屈,叫屈原。佢因為楚國俾秦國打敗而好傷心,最後跳落河死咗,啲百姓為咗令佢屍體唔會俾魚食,就包啲糉掉落河,等啲魚掛住食糉,唔食屈原。屈原投江嗰日係五月初五,就係而家嘅端午節。」
點知華華反駁:「但而家都唔係五月五號!」 Mabel說:「係講舊曆呀,而家啲小朋友太聰明啦,講咩都可以舉一反三。」這番對話,逗得爸爸和外婆都哈哈大笑。

講古話當年

一邊包糉, Mabel一邊講起小時候過的端午節,覺得好有節日氣氛,「每年阿媽都會包紅豆糉,然後再將紅豆、綠豆、眉豆、黑豆、花生煲成『五色粥』用來送糉食,成家一齊睇電視直播龍舟比賽,真係好開心!但而家好似無咗呢種氣氛,好多家庭都無包糉、無睇龍舟。」爸爸亦感嘆:「端午節嘅重要性,好似俾母親節、父親節蓋過咗。」
但 Mabel一家依然有慶祝端午節的習慣,「我哋已經訂咗大枱、約晒成班親戚食飯。中國人圍埋一枱食飯嘅文化真係好值得傳承,即使平日同親戚見得唔多,但藉傳統節日,就可以聚番埋一齊。」
除此之外, Mabel一家新年還會整角仔、中秋會整月餅,全由熱愛烹飪的爸爸當「老師」。 Mabel話:「一來可以令小朋友唔會唔識傳統文化,二來整食物嘅過程亦係享受緊家庭樂,令一家人有共同話題。如果小朋友覺得悶,可以俾佢哋改良傳統食物。好似糖不甩,傳統會灑上花生、糖、椰絲,但俾小朋友創新,可以將一粒粒糖不甩串成一串、灑上七彩糖霜俾佢哋食,咁佢哋既可認識傳統食物,又有新意念,冰皮月餅都係呢種概念。」


Mabel在圖書館借了跟端午節有關的圖書,華華包完糉後,一邊聽故事一邊手舞足蹈。 

三隻糉分別出於三代人之手,左邊一隻三角形糉由爸爸包,右邊一隻枕頭形由婆婆包,至於中間一隻小型糉就是華華的作品。

包糉教學

幾十蚊買隻糉,不如落手自家製,順便當家庭樂。 Mabel一家教路,做法如下:
1. 將白糯米浸水 2小時,隔水,以小量油、鹽調味。
2. 把開邊綠豆(即已剝皮的綠豆)浸水 2小時,隔水。
3. 將五花腩切成件,以小量糖、鹽、五香粉調味。
4. 沖洗糉葉,浸於熱水 2小時,並浸水草 30分鐘。
5. 取出 2片糉葉,交叉疊起摺成三角頂部,加入糯米、開邊綠豆、鹹蛋黃及五花腩,蓋上開邊綠豆及糯米。兩邊放上另 2片糉葉,把糉葉貼着糉邊,用 2條水草包紮成綠豆鹹肉糉。
6. 煲滾一煲水,放入糉,待水再滾,改用中火烚 2小時,其間須加滾水保持水分蓋過糉面,熟透後取出待凍。

 

想同小朋友整傳統食物,但又不懂如何入手?坊間有不少非牟利機構主辦的工作坊,適合一家大細去玩。林家四口就趁週末去學整家鄉茶粿。

整茶粿似玩堆沙


星期日中午,林家四口分工合作整茶粿,爸爸同哥哥諾言一齊搓粉團,媽媽同細佬諾行就負責剪竹葉,非常溫馨。 

諾言、諾行兩兄弟都未食過茶粿,到底茶粿是什麼?客家人老師 Cindy說:「茶粿係客家人傳統食物,以前啲人成日要落田耕種,帶茶粿去充飢會比較方便。茶粿主要用糯米粉、粘米粉整,我哋晚晚食嘅飯就係粘米。咁平日食過啲咩係用糯米整?」爸爸 Keven、媽媽 Sammi和哥哥諾言紛紛答:「糉、糯米糍、糯米雞……」諾行忽然講:「糯米牛!」 Keven問:「咩嚟㗎弟弟?」諾言笑說:「有糯米雞,無糯米牛喎!」 Cindy老師笑住打圓場,「可能佢第時做咗廚師,發明啲大隻過糯米雞嘅,就係糯米牛。」全場大笑。
「茶粿餡料有鹹有甜,鹹可以加眉豆、蘿蔔、蝦米,甜可以加花生醬,或者混合花生、芝麻、椰絲都得,甚至可以隨意加自己鍾意嘅材料,今次我哋就整豆沙、蓮蓉餡。」老師邊說邊示範搓粉。諾行望住 Cindy老師搓粉時,眼神充滿好奇,「唔知好唔好味㗎呢?」爸爸笑笑口答:「睇吓係邊個整啦。」
諾言自薦幫手秤糯米粉、粘米粉,並如玩堆沙般,將兩種粉混和堆成一座小山,中間挖一小洞,讓媽媽幫手將熱水逐少倒入小洞內,熱水和粉混和之後,可慢慢搓成濕潤的粉團。
諾言搓到滿手是粉,弟弟諾行在旁猛皺眉頭,一臉疑惑,又不肯落手搓,似覺得污糟。爸爸笑說:「諾行,你掂吓嚿粉啦,唔使咁驚喎,嚿粉唔會食咗你。」於是媽媽建議:「一係弟弟你負責剪竹葉啦,你最鍾意剪嘢。」諾行立即精神百倍,更說:「我自己剪,你唔使幫我啦。」此時,諾言搓的粉團已逐漸成形,可以加入餡料,再搓成茶粿,並用竹葉墊底即完成。

形狀百變茶粿

Cindy鼓勵小朋友加入自己創意,「形狀可以多啲變化,整心形、星形,或者整你鍾意嘅嘢都得,亦可以用啲豆沙、蓮蓉餡加在表面,令佢有顏色、花紋。」弟弟見哥哥玩得忘形,都開始不怕弄髒雙手,落手落腳整。兩兄弟發揮小宇宙,於是枱面上愈來愈多古靈精怪的圖案,如十字、鬼爪、米奇老鼠等等,花樣百出。
茶粿蒸約十五分鐘就完成。兩兄弟都好興奮,急不及待要看製成品。未熟的茶粿外貌像紙黏土,但蒸熟之後變成半透明,隱約透出餡料顏色,憑顏色深淺可分辨出兩種餡料,兩兄弟一口氣吃了幾個,大呼好飽。


兩兄弟未落手整前, Cindy老師先示範一下如何搓粉團,他們伏在枱上專心聽講。 

放入蒸爐十五分鐘後,茶粿大功告成!小朋友做的款式可謂形象百變,有鬼爪、有十字,最出位是用蓮蓉、豆沙餡拼成的笑臉圖案。 

好玩
學堂

想帶細路去學整傳統食物,可以考慮以下由非牟利機構舉辦的工作坊:

1.低碳生活館「自己動手做好糉」
內容:六月一日在中環天星碼頭農墟教整健康素糉,並有試食活動及討論現成糉的健康問題。活動於五月三十日截止報名。
收費:$50(每位計)
網址: http://www.lowcarbonliving.hk 
keyword:「低碳社區」→「中環農墟」→「在地農學堂」

2.香港故事館「家鄉茶粿製作工作坊」
內容:自組 10-15人團整鹹或甜茶粿,上堂約 3小時。
收費:$100(整團人平分)
網址: houseofstories.sjs.org.hk
keyword:「民間學堂」→「傳統飲食系列」

3.綠田園「津津樂稻 2014」
內容:親嘗收割稻米的過程,並以有機米製作成糯米糍,或以有機芝麻製作芝麻糊。上堂時間為七月二十日、八月三及十日。
收費:$180(每位)
網址: http://www.producegreen.org.hk 

話你知

想端午節(六月二日)帶小朋友去觀賞龍舟比賽,香港旅遊發展局網頁提供當日各區龍舟比賽的詳情,查閱比賽地點及時間。網址: http://www.discoverhongkong.com  keyword:「觀光」→
「節日盛事」→「焦點盛事」→「香港龍舟嘉年華」→「其他本地龍舟賽事」

由即日起至六月的週末,文化博物館設「農村入廚樂」活動,小朋友可利用模擬食材及用具,炮製模擬盆菜,於活動開始前三十分鐘報名,先到先得。
網址: http://www.heritagemuseum.gov.hk   keyword:「博物館節目」→「親子」


撰文:吳穎湘
攝影:徐柏然、陳健邦

    全站熱搜

    tvb4life 發表在 痞客邦 留言(0) 人氣()