闊別香港 fans一年, CNBLUE重臨香港,演唱會唱足兩個半鐘,冇換衫冇返入後台,毫無冷場,台上台下一樣咁 high。 

外太空

CNBLUE 藍色之約

Ads by Google

近兩年當踏入五月, facebook上藍燈海的照片愈來愈多,除咗每年撲飛撲餐懵的五月天「五月之約」,韓國樂隊 CNBLUE都係連續兩年 5月嚟香港舉行演唱會。
以為靚仔夾 band都係企喺度玩吓樂器?台上架起三條橋任佢哋跑近觀眾,低音結他手 high到唔小心跌落台,夠投入未?
多隊韓流組合輪流攻港下, CNBLUE於博覽館一連兩場 show依然座無虛席,絕對 keep到人氣,無乜邊隊做得到。 CNBLUE仲講明約定明年再見, fans們乖乖守候赴約吧!

無間斷唱足全場

數數手指, CNBLUE已經係第四次來港舉行演唱會。今次開 show,四位成員容和、敏赫、宗泫、正信竟然在搖滾區後方出場,令企位的 fans率先叫到拆天。 CNBLUE唔似其他韓流組合,唔跳舞、專注玩 band,所以演唱會無換衫位、無片睇,由頭唱到尾廿首歌無停過,只係中間有 MC位, fans梗係覺得值回票價。今次巡迴演唱會以新碟《 Can't Stop》為主題,唱新歌為主,氣氛一樣咁好。擔任主音的容和話今次巡迴對 CNBLUE嘅音樂係一個大挑戰,其中一個大轉變係佢除咗彈結他之外,仲玩埋 keyboard,彈足半場,全場女觀眾見到王子彈琴,立刻暈得一陣陣。一唱到《 I'm Loner》、《 I'm Sorry》呢啲首本名曲,容和更加係 high到扭腰,宗泫同正信向左跑向右跑,互動性絕對唔比其他組合低,最後正信同 fans握手嘅時候,唔小心跌咗落台,雖然嚇親大家,好彩無大礙!


幾個大男孩玩得開心得滯,低音結他手正信叉錯腳跌咗落台,嚇到台上另外三個成員呆咗。 


新碟入面,宗泫參與創作一曲《 Sleepless Night》,反應相當唔錯。

作為樂隊的靈魂人物,容和身兼曲、詞、唱、結他部分,連彈琴都難佢唔到,下次都唔知仲有乜絕招可以出。 

鼓手敏赫唔可以好似隊友咁周圍走,一到 MC時間,立刻企起身同 fans打招呼,仲驚 fans見佢唔到呀。 

地道廣東話顯誠意

入鄉隨俗,嚟到香港梗係要學番幾句廣東話, CNBLUE深明呢個道理,嚟咗四次咁多,再講「大家好」、「我愛你」,難度太低了吧?四位成員喺 MC時間,全程只講英文同廣東話,連翻譯出場嘅機會都無,親切感立即大增。而且對白唔係交行貨,講得出完整句子:「已經一年無見喇」、「我好掛住你哋」等等,發音點都準過「厚多士」,非常有誠意。 CNBLLUE咁努力學廣東話, fans都做好功課先入場,有幾首歌容和叫大家大合唱,歌迷唔再係口擘擘夾口形,真係跟到一齊唱,氹到佢哋好開心,承諾下年要再嚟香港開演唱會。嘩,咁快講定下年?


容和好幾次叫觀眾大合唱,為免大家忘記歌詞冇反應,大熒幕播出歌詞俾大家跟住,認真貼心。 

結他手宗泫 5月 15日 24歲生日,成員喺 encore時同佢慶祝, 3D蛋糕照住佢哋嚟整。 

撰文:關錦雯

    全站熱搜

    tvb4life 發表在 痞客邦 留言(0) 人氣()