室外營造法國街頭 café感覺,不過香港天氣又熱又焗,冇想像中咁浪漫。 

試食王

PMQ時裝 café 好睇唔好食

Ads by Google

荷李活道元創方( PMQ)係中環最 hit蒲點,早排搞夜市吸引唔少人去湊熱鬧,多間餐廳話會喺四月開張,但到今日仍然冇聲氣,暫時只得最近門口的 bread n butter café率先開業。時裝品牌搞飲食,在香港成功例子寥寥可數, agnès b.同泰國品牌 Greyhound叫站得住腳。 bread n butter找來海南少爺、 AMMO老闆 Tony Cheng幫手設計餐牌,似乎想打響名堂。

 

Café位於精品店後面,一邊牆身鋪上假植物,配上白色枱椅及雕花天花板,一室法國少女情懷,幾靚。室內只有三張二人枱及一張四人枱,室外大得多,有玻璃頂遮頭,裝飾如白色手推車、灰色木窗框同雀籠座位都好靚。不過現實係風扇都冇把,大熱天時,室外再靚都唔願坐出去。採用自助形式,於吧枱點菜俾錢,再自行提取食物。吧枱內年輕侍應有禮貌,可惜唔夠主動,見客人企定定考慮都唔推介吓。
主打法式薄餅,鹹甜加埋十七款,價錢由$68至$108,唔算親民。除咗大路的火腿芝士、煙三文魚,亦有鹹牛肉、港式奶醬多等創新口味。落單後好快就有得食,先出甜味的奶醬多,賣相唔錯,醬汁餡料亦夠多,加埋脆身的果仁粒,層次豐富,另一款檸檬吉士則嫌太漏唔夠清新。伴碟的雪糕夠滑,而且見到一粒粒雲呢拿籽,感覺真材實料。至於鹹味薄餅就麻麻哋,蕎麥薄餅皮質地較軟腍,唔似正宗的帶少許煙韌,蕎麥味唔重,反而芝士好鹹,另一款番茄芝士亦有同樣問題,食到一半已經覺得口渴。最後試埋個招牌甜品 Fondant Pudding,侍應提醒即焗要十五至二十分鐘,上層係一塊脆麵包,入面有流心的醬汁加埋麵包布甸,似浸濕咗的麵包,質感好怪,而且一味得個甜字,最好食係伴碟的紅桑子同藍莓。雖然好多人食嘢最緊要靚字行頭,不過味道都唔可以咁馬虎,想在創意地標入面省招牌,要再加把勁。


室內座位少,布置優雅,就算平日午飯時間都有少女來幫襯。 

Café Latte$36咖啡及茶選擇多,拉花幾靚,味道亦夠濃,而且夠大杯。 

Hong Kong$68餡料有煉奶、花生醬、椰絲及果仁,足料好吃,粗粒花生醬夠香濃,同法式薄餅好夾,推介。

Crepe Seafood$108海鮮得蝦同魷魚,切到細細粒,冇咬口,茄醬及芝士夠多,偏鹹,唔值$108。 

Signature Bread n Butter Fondant Pudding$48最扣分,未切開時賣相還可以,一落刀已經爛晒,得個甜字,完全食唔出醬汁係咩味。 

評分

食物:★★ 1/2
服務:★★★
環境:★★★★
抵食:★★★

 

bread n butter café
地址:中環鴨巴甸街 35號元創方地下 HG01-05號鋪
電話: 2110 3668

試食王

喜歡外出用膳,也喜歡誠實,不相信飲食網站的所謂評分,也怕了所謂食家獲得優待後的意見,情願隱姓埋名,真金白銀,測試飲食雜誌飲食網頁捕捉不到的真實一面。

Kitty禮盒 Macaron Day做善事

Macaron名牌 Pierre Herme,將 6月 21日定為 Macaron Day,當日與願望成真基金合作,在店內捐錢$20或以上,即免費獲贈 macaron一件,當天更會有多至三十種口味。 6月 1日至 21日推出 Hello Kitty禮盒,全港限量 200個,售$790, fans必搶! Macaron Day及禮盒部分收益將捐贈給願望成真基金,邊食邊做善事。

Pierre Herme
電話: 2833 5700( ifc)、 2155 3866(海港城)

新款迎夏 凍冰冰朱古力

上年夏天, GODIVA首次推出朱古力軟雪糕,質感幼滑可可味濃郁,驚喜十足!天氣潮濕悶熱之時,軟雪糕再次登場,今年更新出綠茶白朱古力凍飲($45),香甜之中滲着抹茶的甘香,冰涼消暑之餘,可以當甜品。另外松露朱古力亦推出全新口味,草莓芝士蛋糕、蘋果焦糖和軟心松露黑朱古力,雙層餡料,似吃甜品。

GODIVA
電話︰ 2805 0518


草莓芝士蛋糕松露牛奶朱古力 5顆裝$68 


撰文、攝影:試食王

    全站熱搜

    tvb4life 發表在 痞客邦 留言(0) 人氣()