Geek友講場

長焦快拍 DC伴蝶狙擊

Ads by Google

黃金周已過,相信香港暫時都不會再現「蝗金」,相機不用狙擊便便,不如用嚟影本土好風光。最近無論 DC仔定單反,新相機都強調變焦倍率或對焦系統,最適合生態攝影。近年就流行影蝴蝶,因其易上手、器材豐儉尤人,加上香港蝴蝶品種原來超過 250種,初玩生態攝影一定要狙蝶!今次《 FACE》先睇 Olympus紅點瞄準長炮 DC同 Sony快拍王 A77 II,再搵專家教你換鏡影蝶,睇完人人都可以講句:攝影撲蝶,其實唔難。

影相靠自己


《 FACE》 Gadget版監修人 903 DJ Donald 

我 mood到都會去影貓貓,去南生圍踩單車都見到好多人影雀,但鏡頭要好勁,冇我份。蝴蝶雖然我未有興趣,但支持。世界咁多煩惱,走一走,到大自然行一行也是好事。不過不支持為影相做出瘋狂行為,例如釘蟲蟲引雀仔或用蜜糖引昆蟲。影相,靠你自己囉!

鷹眼紅點照準  Olympus Stylus SP-100EE

半專業 DC近年都以長 zoom做賣點, Olympus呢部 SP-100EE最遠有 1,200mm超長焦距,為了更易對焦佢更設有世界首創紅點瞄準器。由於長 zoom時視角會變窄,只要拍攝主體有少少移位就好難搵,而 SP-100EE就可以改用紅點瞄準主體,以節省 zoom來 zoom去嘅時間。實際試影,紅點位置同鏡頭中央對焦點略有差距,好難完全唔望芒或 EVF構圖,但輔助作用大,尤其係蝴蝶背後有大片雜草的話,用瞄準器就可輕鬆拍到萬綠叢中一隻蝶。

紅點瞄準使用法

 


使用長焦距會令視角變窄,好難喺 live view搵到主體。 

面對此情況,其他機可能要 zoom out搵主體,但 SP-100EE嘅紅點瞄準就可以更易搵到主體。 

瞄準紅點同實際對焦點雖略有差異,但必要時用嚟快拍,命中率都唔低。

試相

唔少蝴蝶喺食嘢或交配時會完全靜止,對快門、高 ISO等要求不大,長炮 DC已經夠影,但要留意 zoom盡難以對準細物,用 10倍變焦影蝶已經好夠。

Spec.

像素: 1,600萬
等效焦距: 24-1,200mm
光圈: f/2.9-6.5
感光元件: 1/2.3" CMOS
感光度: ISO 125至 12,800
快門: 1/1,700至 30秒
屏幕: 3" LCD
記憶: SDXC
體積: 121× 91× 133mm
重量: 589g
售價:$3,698( a)

另一選擇  Canon PowerShot G1X Mark II

小蝴蝶停頓時間較多,唔使下下用長炮,好多場合焦距 100mm已足以應付。追求畫質可選擇另一部輕巧半專業相機 Canon PowerShot G1X Mark II。佢用上 1.5吋感光元件,比 M43片幅更大,再備有等效 24-120mm F2.0-3.9五倍變焦鏡頭。最大進步係近拍距離由上代 20cm減至 5cm,特寫影蝶、影蟲保證細緻。

Spec.

1,500萬像素. 1.5" CMOS. 24-120mm焦距. f2.0-3.9. 1/4,000至 60秒快門. ISO100-12,800. SDXC. 116.3× 74.0× 66.2. 553g
售價:$6,480( b)

換鏡快拍王  Sony A77 II

半專業長炮 DC可以話係影生態入門機,想再靚啲就要添置換鏡 DC。呢期換鏡機唔盲目鬥像素,改為力 sell對焦點多、連拍夠快。而常有創新舉動嘅 Sony亦不甘後人,久休多時嘅 A-mount系列再次出動,推出 APS-C連拍王 A77 II。自動對焦點由 19點激增至 79點,連拍亦達至每秒 12張,比得上 Canon 1DX、 Nikon D4s等單反機王。定價卻平易近人得多,淨機身唔使過萬,最啱用嚟快拍主體郁唔停既生態攝影。

Spec.

像素: 2,470萬
感光元件: APS-C CMOS
感光度: ISO 50-25,600
快門: 1/8,000-30s,支援 B快門
屏幕: 3" OLED可轉多角度 LCD
記憶: SDXC
體積: 142.6× 104.2× 80.9mm
重量: 647g
售價:$8,990(淨機身)、$13,990(連 SAL 16-55mm鏡頭)( c)

單反對焦 No. 2

A77 II同上代 A77同樣採用半透明反光鏡設計,反光板唔似傳統單反會喺快門運作時升降,令連拍更有優勢!因此 A77 II可做到每秒連拍 12張嘅頂級水平,只輸給 Canon機王 1Dx,加上一口氣可儲存達 60張相,以速度來說穩佔單反第二寶座。至於自動對焦點 A77 II則由上代嘅 19點一口氣增加至 79點,當中有 15點十字型感應器,實試連拍時比有 179點對焦點嘅同廠無反 A6000更準,可見點不在多,質素更重要。

試高 ISO

上一代 A77高 ISO表現略為遜色, A77 II轉用了新處理器,推到 ISO 1,600仍然可用。

Detail's Check

 


A77 II原來係首台 A-mount相機加入 WiFi、 NFC功能, Sony唔係只偏心 E-mount㗎! 

可轉式 LCD設計精妙,直度拍攝時都可以向上反芒,啱晒要影視平角度嘅生態攝影用。 

對焦模式於機身下方鏡頭旁,除咗單次對焦 AF-S同追焦 AF-C外,仲有介乎兩者間嘅 AF-A。

試連拍

轉體動作相當快速,但仍能拍到實淨手指影像,可見 12fps連拍威力,追焦能力亦相當理想。




3大連拍王

部部相機都話自己係連拍王,其實唔同相機定位各有分別。 Canon 1DX地上最強但貴到上天, Nikon無反 V3數字上最快,但 1吋感光元件又唔係人人啱。以下挑選咗 3部連拍性能強勁嘅相機,總有一款啱你心水。

至尊地位  Canon 1DX

JPEG最高連拍達每秒 14張,連 RAW都可以每秒連拍 12張,連拍儲存更達 100張,推出近兩年都仲係換鏡機連拍王,但售價亦屬專業級。

Spec.

1,810萬像素.全片幅 CMOS. 1/8,000至 30秒快門. ISO100-51,200. CF. 158× 164× 83mm. 1,530g
售價:$51,800(淨機身)( b)

抵玩連拍  Sony A6000

自動對焦點達 179點,最高每秒 11張連拍,連拍儲存可達 49張,可說是無反連拍王之一,性價比極高。不過無反對焦系統始終有局限,同 A77 II比連拍時較易走焦。

Spec.

2,470萬像素. APS-C CMOS. 1/4,000至 30秒快門. ISO100-25,600. SDXC. 120× 66.9× 45.1mm. 344g
售價:$5,990(淨機身)( c)

全球最速  Nikon 1 V3

採用 Nikon 1獨有 1吋感光元件,追焦連拍達全球最快嘅每秒 20張!連拍儲存張數達 20張,但只用 microSD存相,連拍時 load相要啲時間。

Spec.

1,839萬像素. 1" CMOS. 1/4,000至 30秒快門. ISO160-12,800. microSD. 110.9× 65× 33.2mm. 324g
售價:$7,680(連 10-30mm鏡頭)( d)

狙蝶選鏡攻略

睇完新機係時候實戰,今次搵嚟鳳園顧問潘瑞輝同讀者分享狙蝶心得。潘生可謂香港蝶王,唔只影相叻,而且更蝶識淵博,參與著作多本蝴蝶生態書。佢話影蝴蝶,兩個字:一長一短。不外乎長、短鏡兩種選擇,各有所長,就聽吓蝶王點教路。

燕鳳蝶

利用長焦距 300mm,視平角度拍攝,留意燕鳳蝶吸水時翅膀會不停地震動,所以快門速度不可太低。燕鳳蝶愛於正午吸水,最佳拍攝時間是陽光普照早上 10時至下午 2時左右。

影蝶小 tips

1.注意視平角度,盡量同蝴蝶成水平角度影過去,背景先會有深度。
2.初學者宜用 f6.3光圈,避免 sharp唔晒成隻蝴蝶。
3.構圖方面冇話絕對,可考慮將蝴蝶放於中間,背景盡量簡潔,反而可以找些碎石、水窪作前景。
4.閃光燈影蝶冇問題,微距拍攝時可以配上 ring flash補光。
5.長鏡可以考慮加添 external tube,縮短最近對焦距離方便近拍。

查詢:

a) Olympus( 2376 2150)、 b) Canon( 3191 2333)、 c) Sony( 2345 2966)、 d) Nikon( 2882 3936)

香港蝶園 鳳園保育區

大埔嘅鳳園保育區係香港影蝶聖地,交通方便,有超過 200種蝴蝶在此活動,佔全港蝴蝶品種 8成。工作人員花咗好多心機營造蝴蝶棲息地,例如回收年桔種於園內為蝴蝶提供樹汁,亦保留了不少舊鳳園圍村風貌,為蝴蝶提供最自然嘅居所。
地址:大埔汀角路鳳園村 150號
交通:巴士 74K、 73、 75K(於鳳園路/大發街下車),小巴 20B、 20C、 20K(於鳳園路路口下車)
查詢:鳳園保育區( 3111 7344)

長鏡影大蝶


影蝶 200-300mm已算長焦距,唔使去到天文鏡咁大支。長鏡有兩大優勢,一來唔使行咁近嚇走小蝶;二來焦距長,散景突出之餘更能壓縮背景,本來一條條草嘅背景都變一片輕柔綠畫布。不過缺點係 detail冇咁出,尤其係影細蝶時,所以通常都係用長鏡影大蝶。

柑桔鳳蝶

蝶王短評:「利用長焦距 300mm,可令雜亂背景變成柔和散景,使主體更突出,留意燕鳳蝶飛行吸食花蜜時翅膀會不停地拍動,所以最好使用較高快門速度。」

推薦器材
Sony A7R+Sony SEL70200G FE 70-200mm


資深攝影師愛用 C、 N兩大老牌,但細細部玩全片幅嘅 Sony A7R近期亦大受歡迎。而行貨最近亦推出 FE遠攝鏡,焦距 70-200mm,恆定光圈 4.0,拎上手意外地 fit身輕手,潮玩生態攝影之選。
售價:$16,990(淨機身)、$11,690(鏡頭)( c)

曲紋紫灰蝶

蝶王短評:「利用短焦距 60mm, 3.5大光圈做出模糊前景效果。留意曲紋紫灰蝶喜愛停留在寄主植物蘇鐵上,容易構圖亦易於接近,是初學拍攝蝴蝶的好對象。」

推薦器材
Olympus OM-D EM5+M. Zuiko Digital ED 60mm f/2.8 Macro

細蝶休息時唔會亂飛,對相機要求相對較低,唔使用咁 pro嘅相機都影到。用輕巧 M43加支微距鏡,一邊影蝶一邊欣賞大自然更加自在。
售價:$8,990(淨機身)、$4,390(鏡頭)( a)

生態攝影講禮儀


左起: Nelson、潘生 

生態攝影本是好事,卻有人將影硬照方式硬搬落去,無意中破壞生態環境,甚至用壞習慣教壞新手!所以潘生同鳳園項目主任 Nelson想提醒吓正確嘅生態拍攝態度。
Nelson:「最唔好係直接郁蝴蝶,除咗整傷,不少蝴蝶一生只得一次交配機會,交配時騷擾佢直接影響繁殖率。最主要原則係眼看手勿動,生態攝影除咗影靚相,更重要係欣賞大自然。」
潘生:「有人會鍾意折斷樹枝、添加物品擺景,但慣咗擺景你就變咗張張相都咁影,生態攝影好玩在投入大自然,每張相影出嚟都會有分別。」

推薦器材
Olympus OM-D EM5+M. Zuiko Digital ED 60mm f/2.8 Macro

 


撰文:司徒港燊
攝影:傅新發、彭自維、被訪者提供

    全站熱搜

    tvb4life 發表在 痞客邦 留言(0) 人氣()