錶面似 SEVENFRIDAY,錶殼似 LINDE WERDELIN,擺到明係集大成……六千幾蚊(應該有價講),算係咁。 

ILIKE

買質感

Ads by Google

行過旺角「手錶街」(即係仁安大廈),見街頭「 VC」個櫥窗放咗幾隻瑞士錶以外嘅手錶,一睇,「 ANCON」,哦,即係之前出過一批銅殼錶……咦,個錶面設計咁似 SEVENFRIDAY……入去搵老闆「柏席」問個究竟啦,梗係。

 

原來,此錶名為 X-35 Concept(乜都好啦), 316鋼殼加 PVD處理,直徑 45mm,厚 16mm,用 24mm膠帶,配日本 Miyota( Citizen旗下) 82S7自動機芯, 42小時動力儲存,有「日與夜」顯示……六千幾蚊。老實講,個樣唔算差,造工都過得去,係冇乜易手價囉……買個質感囉。@劉定邦


每隻錶都有唔同嘅,細心睇睇,就係啲指針同埋幾個數字,唔同色㗎。 

藍牙雙拼

做運動,好難唔聽歌,時間過得快啲又無咁辛苦。不過早幾個月,運動型藍牙耳機無咩新款推出,今個月,突然熱鬧,除咗 Plantronics隻 Backbeat FIT($998)之外, Jabra都有隻 ROX Wireless($899),玩勻晒兩款,前者為咗要聽到外界聲音,避免太自閉發生意外,唔會太貼耳道,搞到聲音虛虛浮浮;反而隻 Jabra,音質夠紮實,諗住大隻易跌,點知幾穩陣,每邊耳筒裝有磁石,啪埋,黐實,自動熄機,細心到要俾個 Like。@劉耀祥


成隻耳筒只重 19g,無聽歌時,掛喺頸度,用磁石黐埋,唔會吊吊揈。 

重溫歌手

而家買部 tablet真係平到笑,唔計品質無保證嘅國產貨,有品牌嘅都只係千零蚊一部,價錢鬥到爛晒! Philips就醒,橫掂唔少人買 tablet都係為煲劇,新機 PI4010GB1唔同你鬥平(售$2,099),但送六個月免費 now電視(只限 tablet上睇)同埋 MOOV音樂服務,兩樣服務正價加埋要成六百蚊,減番條數其實只係用咗千零蚊買機,但就有得煲劇同埋聽歌,計落有着數。@潘健文


之前已經想重溫《我是歌手 2》,但大陸網站全部 block晒香港 IP,而家可以用部 tablet睇 now芒果台狂煲。 

超抵小喇叭

玩了大半年,對於 Bose隻藍牙 SoundLink mini喇叭非常滿意,不過始終太重,近排已經好少拎出街用。最近見到隻 Rapoo A500小喇叭,有藍牙、 NFC,只係賣$530,當然第一時間問代理借嚟試聽。隻喇叭機仔細細,得 216g重,拎出街全無負擔。無線接駁手機聽歌時,雖然力量唔及 Bose嘅一半,但中高音都夠清晰準確,合格。最令人驚喜,係內置電池可以連續播足十個鐘,夠晒玩。@林勇


喇叭只賣五百幾蚊,質素絕對收貨。 


text:科技組

    全站熱搜

    tvb4life 發表在 痞客邦 留言(0) 人氣()