爆壹爆

視帝細佬行古惑

去開中環 happy hour,爆哥發現身邊 OL,個個都話好鍾意視帝「炭頭」,佢又靚仔又有錢,個個港女發開口夢要嫁俾佢,查實江湖傳聞,呢個娛樂紅人,係勝和前坐館「雞腳黑」的門生,爆哥舊年去雞腳黑壽宴,同一眾大哥吹喇叭,雖然炭頭冇親自道賀,不過佢派咗親細佬出席,炭頭細佬同佢阿哥簡直同一個餅印,但就脹爆一個碼,但一樣靚仔。

Ads by Google

炭頭入行前曾經打劫而踎監,人生一大污點,唔講唔知,佢兩兄弟入行前,曾經喺佐敦做馬伕,後來有人見佢哋青靚白淨,於是搵佢哋「服侍」闊太,非常旺場。
不過炭頭為人講義氣,有江湖中人十多年前問佢借過百萬,炭頭二話不說便借錢,更從來冇催過佢還錢。仲有佢出名孝順,一家人由佢養,佢都冇怨言。計我爆哥話,英雄莫問出處,睇炭頭今時今日名成利就,怪唔得唔少港女都爭住嫁俾佢啦!

搵鬼神俾貼士

爆哥有時都會賭馬,仲會買馬經睇排位同貼士,爆哥由細睇到大嘅《老五馬經》,呢份馬經由任達年喺一九五○年創立,依家仲有得賣,最特別係以扶乩嚟揀賽馬貼士,例如乩文係「十萬橫磨劍」嘅十字,咁就揀十號馬,又或者「四五六開大,一二三開小」,咁就暗示隻馬係「好好計」,依家仲有馬迷喺討論區研究乩文。
雖然扶乩揀馬,冇科學根據,但原來任達年喺中上環開檔,有六十四年歷史,真係唔到爆哥唔服,爆哥曾經同朋友上《老五馬經》報社八過吓,想親自走上去拜訪任老先生,可惜佢年事已高,依家好少回報社。間報社不單歷史悠久,所在地址也大有來頭,大廈前身係孫中山先生當年習醫嘅道濟會堂舊址。

娛樂圈老叔父過身

爆哥呢幾日收到好多電話,話 14K超級元老「馬交文」近排過身,終年七十幾歲。馬交文好傳奇,爆哥第一時間同大家八吓佢老人家生平,原來馬交文在六、七十年代,已叱咤娛樂圈,阿叻都係佢嘅「後輩」,以往馬交文生日,阿叻同成班明星都一定請佢老人家食飯。
馬交文八十年代移民去咗澳洲,變得低調,直至志偉二○○一年在街上被打,盛傳佢被邀出山做和事老,事件先告一段落。跟住佢又回流香港養老,但據聞生活並唔富裕,晚年要靠門生幫忙。
馬交文其中一個得意門生「差佬文」,○八年喺澳門因欠債被肢解,兇手原來係同門的「九指華」。九指華的大佬是「馬交馮」,爆哥聽班老江湖講, 14K馬交文和馬交馮感情甚深,因為同樣來自澳門,所以個朵都有馬交二字。二人門生搞到相殘,江湖中人個個都好感慨。

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!

    全站熱搜

    tvb4life 發表在 痞客邦 留言(0) 人氣()